គណៈកម្មការចម្រុះព្រំដែន កម្ពុជា-ឡាវ ឯកភាពគ្នាថានឹងចុះពិនិត្យបង្គោលព្រំមួយចំនួនដែលគណៈកម្មការនេះអះអាងថា នៅមានភាពចម្រូងចំរាស់ដើម្បីដោះស្រាយឈានទៅរកការបោះបង្គោលព្រំដែនបញ្ជាប់រវាងប្រទេសទាំងពីរ។
ការចុះពិនិត្យព្រំដែននេះ គឺជាឯកភាពគ្នាក្រោយពីមន្រ្តីជំនាញព្រំដែននៃគណៈកម្មការចម្រុះព្រំដែន កម្ពុជា – ឡាវ បានបើកកិច្ចប្រជុំវិសាមញ្ញនៅកម្ពុជាកាលពីថ្ងៃទី២៥ មករា ឆ្នាំ២០១៧នេះ ខណៈការបោះបង្គោលនៅសល់ប្រមាណ២៤បង្គោលទៀត។
ក្នុងសេចក្តីប្រកាសព័ត៌មាន គណៈកម្មការចម្រុះព្រំដែន កម្ពុជា-ឡាវ ឲ្យដឹងថានៅពេលឆាប់ៗខាងមុខនេះ ភាគីកម្ពុជា-ឡាវ នឹងចុះពិនិត្យព្រំដែនរួមគ្នាលើដីជាក់ស្តែងក្នុងតំបន់ពីរ គឺនៅត្រង់បង្គោលលេខ០០២-០០៣ បង្គោលភ្លោះលេខ០២៩ និងលេខ០៣០។
សេចក្តីប្រកាសព័ត៌មានដដែលឲ្យដឹងថា ភាគីទាំងពីរនឹងបង្កើតក្រុមការងារមួយដើម្បីសិក្សាលទ្ធភាពស្តីពីការបោះបង្គោលព្រំដែនបំពេញបន្ថែមរួមគ្នាដែលភាគីទាំងពីរមិនទាន់ឯកភាព។
ទេសរដ្ឋមន្រ្តីទទួលបន្ទុកកិច្ចការព្រំដែនលោក វ៉ា គីមហុង មិនឆ្លើយនឹងសំណួររបស់VODដែលសួរបន្ថែមលើបញ្ហានេះទេ ដោយលោកថាជាប់រវល់ប្រជុំ។
អ្នកស្រាវជ្រាវពីការអភិវឌ្ឍសង្គមនិងនយោបាយ លោក គឹម សុខ ហាក់ពុំដឹងច្បាស់ថា តំបន់ដែលភាគីកម្ពុជា -ឡាវ គ្រោងចុះទៅពិនិត្យរួមគ្នានោះមានបញ្ហាអ្វីកើតឡើងខ្លះទេ។ តែយ៉ាងណា លោកស្នើឲ្យរដ្ឋាភិបាលដោះស្រាយបញ្ហាបព្រំដែនជាមួយឡាវនេះ ត្រូវផ្អែកលើផលប្រយោជន៍ជាតិនិងប្រជាពលរដ្ឋជាធំ។
លោកបន្ថែម៖ «ការចុះពិនិត្យបែបហ្នឹងវាមិនទាស់ខុសអីទេ សំខាន់ប្រទេសជាតិមួយៗជាពិសេស ប្រទេសកម្ពុជាយើងរដ្ឋាភិបាលត្រូវស្មារតីជាក់ច្បាស់នៅក្នុងការពារទឹកដីរបស់ខ្លួន ហើយរឿង ដែលសំខាន់ត្រូវស្តាប់សំលេងពលរដ្ឋនៅតាមព្រំដែន ហើយមួយទៀតសម្រាប់ប្រទេសកម្ពុជា យើងគួរតែមានគណៈកម្មការចំរុះដែលមានទាំងគណបក្សប្រឆាំងដើម្បីជាសាក្សីរស់។
កន្លងមកលោក វ៉ា គឹមហុង ធ្លាប់ប្រាប់អ្នកសារព័ត៌មានថា ប្រទេសកម្ពុជានិងប្រទេសឡាវមានព្រំដែនជាប់គ្នាប្រវែង៥៤០គីឡូម៉ែត្រដែលត្រូវបោះបង្គោលព្រំដែនប្រមាណ១៤៥បង្គោល ប៉ុន្តែរហូតដល់ពេលនេះភាគីទាំងពីរបានចំនួន១២១បង្គោលហើយស្មើនឹង៨៣ភាគរយ នៅសល់ប្រមាណ២៤បង្គោលទៀតនោះស្ថិតក្នុងខេត្តព្រះវិហារនិងខេត្តស្ទឹងត្រែង ដូចជានៅចំណុចទន្លេល្ពៅ ទន្លេសាឡាំផៅ ទន្លេសេកុង តំបន់អូរតាង៉ាវជាដើម៕