ខុសពីការគ្រោងទុកដែលគ្រាន់តែមានបំណងចង់ឈ្នះលើកីឡាករថៃ Phat Num Noeng ក្នុងជំនួបប្រកួតជាលក្ខណៈអន្តរជាតិកាលពីព្រឹកថ្ងៃអាទិត្យទី២៥ មិថុនា កីឡាករវ័យក្មេងឃីម បូរ៉ា មិនត្រឹមតែបានឈ្នះដោយជោគជ័យប៉ុណ្ណោះទេ គឺបានទាំងទទួលប្រាក់២តង់ពីការប្រកួតនោះផង។ នេះជាជោគជ័យដែលធ្វើអោយគេឈានឡើង ក្នុងពេលដែលការប្រដាល់របស់គេកន្លងមក ត្រូវគេកត់សម្គាល់ថាពេលខ្លះក៏ល្អ ពេលខ្លះក៏ធ្លាក់ដៃពិបាកអោយអ្នកគាំទ្រទុកចិត្តពេញទំហឹងចំពោះ ឃីម បូរ៉ា។
ការប្រកួតដែលបានធ្វើឡើងនៅលើសង្វៀនទូរទស្សន៏អាស៊ីអាគ្នេយ៍នោះ គឺជាការប្រកួតអន្តរជាតិសំខាន់មួយដែលត្រូវគេប្រកាសថាសម្រិតសម្រាំងសម្រាប់ចុងខែមិថុនា ដោយកីឡាករដែលបានឡើងប្រកួតក៏ត្រូវបានគេប្រកាសថានឹងផ្ដល់ប្រាក់រង្វាន់ចំនួន១លានរៀលបន្ថែមពីលើតម្លៃខ្លួនផងដែរ ប្រសិនបើភាគីកម្ពុជាមានសមត្ថភាពវាយផ្ដួលអោយបរទេសបោះបង់ការប្រកួតមុនចប់ទឹកទី៣។ កីឡាករ ឃីម បូរ៉ា ដែលមានឈ្មោះឡើងប្រកួតនៅក្នុងព្រឹត្តិការណ៍នោះ ហាក់មិនមានអ្នកគាំទ្រច្រើនណាស់ណាទេទុកចិត្តថាលោកនឹងឈ្នះការប្រកួតមុនទឹកទី៣ ដើម្បីអាចទទួលបានប្រាក់រង្វាន់បន្ថែមពីលើតម្លៃខ្ពស់ដែលត្រូវគេដឹងថាមានចំនួនមិនក្រោម៣០០ដុល្លារសម្រាប់កីឡាករខ្មែរលើសង្វៀនអន្តរជាតិ ដោយសារតែគូប្រកួតរបស់គេគឺជាជើងខ្លាំងដែលមានប្រវត្តិវាយផ្ដួលកីឡាករកម្ពុជាខ្លាំងៗរាប់មិនអស់នាពេលកន្លងមក។ ផ្អែកតាមប្រវត្តិ កីឡាករថៃ Phat Num Noeng មកប្រកួតនៅទូរទស្សន៍អាស៊ីអាគ្នេយ៏ច្រើនលើក គឺមានប្រវត្តិប្រកួតឈ្នះ និងស្មើកីឡាករកម្ពុជាសឹងតែគ្រប់លើក ក្នុងពេលដែលកីឡាករថៃរូបនេះក៏ត្រូវគេស្គាល់ថាមានបច្ចេកទេសម៉ាត់ និងវាយកែងបានរស់រវើក ពិបាករកអ្នកទប់។
អ្នកតាមដានការប្រកួត បានត្រឹមតែរំពឹងថាកីឡាករកម្ពុជានឹងឈ្នះដោយពិន្ទុ ជាពិសេសបន្ទាប់ពីមើលការប្រកួតក្នុងទឹកទី១ និងទី២ ហើយឃើញកីឡាករឃីម បូរ៉ា វាយមិនចុះនឹងកណ្ដាប់ដៃដ៏ខ្លាំងរបស់កីឡាករថៃ។ ប៉ុន្តែការយល់ឃើញនេះ បានប្រែក្លាយជារឿងភ្ញាក់ផ្អើល ហើយក្លាយជាសំលេងបន្ទរយ៉ាងកងរំពងវិញ នៅពេលដែលទឹកទី៣ចូលមកដល់ កីឡាករកម្ពុជាស្រាប់តែអាចប្ដូរកណ្ដាប់ដៃ និងជង្គង់ វាយអោយកីឡាករជើងខ្លាំងរបស់ថៃរាប់ដល់ទៅ៣ដងផ្ទួនៗគ្នាត្រឹមតែមួយទឹក ដែលអ្នកណាៗក៏នឹកស្មានមិនដល់។ ជ័យជម្នះត្រូវបានធ្លាក់លើឃីម បូរ៉ាយ៉ាងគួរអោយសរសើរ បើទោះជាអ្នកគាំទ្រកីឡាករថៃត្រូវគេឃើញទម្លាក់ទឹកមុខព្រោះតែមិនចង់ជឿ។
នេះជារឿងនឹកស្មានមិនដល់ ដែល កីឡាករកម្ពុជាសម្រេចបាន ដោយក្រៅពីអាចជាប់ឈ្មោះបានឈ្នះកីឡាករថៃជើងខ្លាំងហើយ គឺបានទាំងទទួលទឹកប្រាក់ក២តង់ទៅទៀត គឺតម្លៃខ្លួនសម្រាប់ការប្រកួតមួយតង់ និងទឹកប្រាក់រង្វាន់ដែលផ្ដួលគូប្រកួតបានមុនចប់ទឹកទី៣ចំនួន១លានរៀលទៀត។ សរុបទាំងទឹកប្រាក់ដែលមានការឧបត្ថម្ភពីអ្នកទស្សនាដោយផ្ទាល់ក្រោយពីទទួលជ័យជម្នះទៀតមានការប៉ាន់ស្មានថា លោកបានទទួលសឹងនឹងប្រហាក់ប្រហែល១ពាន់ដុល្លារត្រលប់ទៅខេត្តបន្ទាយមានជ័យវិញ ដើម្បីយកទៅអោយប្រពន្ធដែលបើកមុខរបរចិញ្ចឹមជ្រូកនៅឯស្រុកកំណើតនោះ។
កីឡាករឃីម បូរ៉ាត្រូវគេឃើញសប្បាយចិត្តឡើងកញ្ជ្រោលលើរេញ បន្ទាប់ពីឃើញកីឡាករថៃត្រូវរាប់ជាលើកទី៣ក្នុងទឹកទី៣ ប៉ុន្តែលោកក៏បុកពោះមិនតិចផងដែរក្នុងពេលដែលគូប្រកួតវាយត្រូវច្រើនដៃតែហាក់មិនរង្គើក្នុងទឹកទី១ និងទី២។ លោកថាខ្លួនបានហ្វឹកហាត់ចំនួនមួយអាទិត្យនៅខេត្តបន្ទាយមានជ័យមុនពេលឡើងមកប្រកួតជាមួយកីឡាករ Phat Num Noeng ប៉ុន្តែមិនបាបនឹកថានឹងឈ្នះក្នុងទឹកទី៣តាមការចង់បាននោះទេ ដោយសារតែលោកដឹងថាកីឡាករថៃជាគូប្រកួត គឺជាជើងខ្លាំងម្នាក់ ពិសេសដៃ កែង និងជើងក្រោម។ យ៉ាងណាមិញ លោកថាគេមានចំណុចខ្សោយត្រង់ពោះ ហើយដោយសារតែលោកលូកត្រូវមួយជង្គង់ធ្វើអោយប្រែប្រួលស្ថានការណ៍ប្រយុទ្ធ ទើបលោកប្ដូរពីវាយផ្នែកខាងលើ មកទាត់ធ្វេងទាត់ស្ដាំ និងរកផ្លូវអុកជង្គុងដដែលៗបណ្ដាលអោយកីឡាករថៃរាប់ម្ដងហើយម្ដងទៀត ក្នុងទឹកទី៣។ លោកមិនភ័យរឿងកីឡាករថៃសុំសងសឹកនោះទេ បន្ទាប់ពីអាចវាយអោយគេបោះបង់ការប្រកួតក្នុងទឹកទី៣ក្រោយជំនួបលើកនេះ។
លោកទទួលស្គាល់ថាកីឡាករថៃគេមានចំណុចខ្លាំង ជាពិសេសក្នុងទឹកទី២គឺលោកអត់មានសង្ឃឹមតែម្ដង ថានឹងឈ្នះកីឡាករថៃដោយអាចទទួលបានប្រាក់២តង់។ លោកបានចាត់ទុកថាជ័យជម្នះដែលខ្លួនសម្រេចបាន គឺជាការវាយឆ្លាតក្រោយពីអាចរកឃើញចំនុចខ្សោយត្រង់ពោះ តែលោកក៏នៅតែមិននឹកស្មានគេនឹងបោះបង់ការប្រកួតក្នុងទឹកទី៣នោះដែរ ដោយបានត្រឹមតែសង្ឃឹមថានឹងឈ្នះការប្រកួតមុនចប់ទឹកទី៥ប៉ុណ្ណោះ។ លោកខ្លួនមានអារម្មណ៍សប្បាយចិត្តដែលអាចវាយឈ្នះជើងខ្លាំងរបស់ថៃគឺកីឡាករ Phat Num Noeng ហើយឈ្នះក្នុងទីតាំងដែលជួយអោយលោកទទួលបានទឹកប្រាក់១លានរៀលលើសពីតម្លៃខ្លួនដែលត្រូវបាន មុនត្រលប់ទៅខេត្តបន្ទាយមានជ័យវិញ។
លោកក៏ប្រកាសស្វាគមន៍អោយមានការរៀបចំការប្រកួតជាមួយកីឡាកររូបនេះជាថ្មីអោយបានឆាប់ផងដែរ ដើម្បីអោយលោកដឹងថាតើការជួបប្រកួតជាថ្មីតើលោកនឹងឈ្នះដដែល ឬមានលទ្ធផលខុសពីនេះ។ យ៉ាងណាមិញសម្រាប់ជំនួបលើកក្រោយលោករំពឹងត្រឹមឈ្នះដោយពិន្ទុប៉ុណ្ណោះដោយសារតែកីឡាករថៃរូបនេះគឺល្អបច្ចេកទេសមិនធម្មតា៕