ក្រុមយុវជនស្នើឲ្យរដ្ឋាភិបាលសង់រូបសំណាកលោក កែម ឡី នៅទីកន្លែងដែលគេបាញ់សម្លាប់លោក និងថា ចំពោះទឹកប្រាក់ ដែលលោកនាយករដ្ឋមន្ដ្រីបានឧបត្ថម្ភនោះ មិនសំខាន់ឡើយ បើមិនទាន់រកយុត្ដិធម៌ពិតប្រាកដ។
នៅរសៀលថ្ងៃពុធទី២៦ខែកក្កដាឆ្នាំ២០១៧ ក្រុមយុវជនបានដាក់ញត្តិថ្មីមួយទៀត នៅខុទ្ទកាល័យនាយករដ្ឋមន្ដ្រី ប៉ុន្ដែត្រូវបានមន្ដ្រីនៅទីនោះ បដិសេធមិនទទួលយក ដោយថា ខ្លឹមសារនៅក្នុងញត្តិនោះ មិនមែនជា «ករណីជាក់ស្ដែង»។
បន្ទាប់ពីមន្ដ្រីខុទ្ទកាល័យនាយករដ្ឋមន្ដ្រីបដិសេធ ក្រុមយុវជនបានពាំនាំញត្តិនោះ ទៅដាក់ទៅទីស្ដីគណៈរដ្ឋមន្ដ្រីវិញម្ដង ដោយស្នើដល់រាជរដ្ឋាភិបាល អនុញ្ញាតសាងសង់រូបសំណាក់លោក កែម ឡី នៅលើទីតាំង ម្ដុំស្ដារម៉ាត ក្បែរស្ដុបបូកគោ កែងផ្លូវព្រះមុនីវង្ស និងផ្លូវម៉ៅសេទុង រាជធានីភ្នំពេញ ជាទីកន្លែង ដែលខ្មាន់កាំភ្លើងបាញ់សម្លាប់រូបលោក កាលពីថ្ងៃទី១០កក្កដាឆ្នាំ២០១៦។
សមាជិកសមាគមសម្ព័ន្ធនិសិត្សបញ្ញាវន្ដខ្មែរ លោក គង់ រ៉ៃយ៉ា ឲ្យ VOD ដឹងថា លោកនិងក្រុមយុវជន មិនសង្ឃឹមថា នឹងមានការឆ្លើយតបជាវិជ្ជមាន ទៅនឹងសំណើសុំ សាងសង់រូបសំណាកលោក កែម ឡី នៅការ៉ាស់សាំងកាល់តិច ក្បែរស្ដុបបូកគោ រាជធានីភ្នំពេញ នោះទេ។
ប៉ុន្ដែលោកថា បន្ទាប់ពីឃើញលោកនាយករដ្ឋមន្ដ្រី ហ៊ុន សែន បានប្រកាសជួយឧបត្ដម្ភទឹកប្រាក់ចំនួន៦ម៉ឺនដុល្លារ សម្រាប់ថ្លៃចំណាយបុណ្យខួប១ឆ្នាំ និងថ្លៃសាងសង់ចេតីយលោកបណិ្ឌត កែម ឡី លោក គង់ រ៉ៃយ៉ា យល់ថា លោក ហ៊ុន សែន ពិតជាមានទឹកចិត្តមនុស្សធម៌ មិនមែនជាការសំដែងនោះទេ។
យុវជនដែលធ្លាប់ត្រូវបានជាប់ពន្ធនាគារដែលរដ្ឋាភិបាលចោទថាធ្វើ«បដិវត្តន៍ពណ៌»រូបនេះបន្ថែមថា ប្រាក់ឧបត្តម្ភពីលោកនាយករដ្ឋមន្ដ្រី គឺមិនសំខាន់ទេ ហើយអ្វីដែលសំខាន់នោះ គឺយល់ព្រមតាមសំណើ ដើម្បីសាងសង់រូបសំណាកលោក កែម ឡី និងស្វែងរកយុត្ដិធម៌ពិតប្រាកដជូនក្រុមគ្រួសារថែមទៀត។
លោកថា៖ «ទាក់ទងជាមួយនឹងយុត្ដិធម៌ បើសិនការផ្ដល់លុយហ្នឹង ចេញពីទឹកចិត្ត ពីបេះដូងរបស់គាត់ អាណិតស្រឡាញ់ទៅក្រុមគ្រួសារ ក៏ដូចជាវិញ្ញានក្ខន្ធលោកបណ្ឌិត កែម ឡី គាត់ប្រាដកណាស់ថា នឹងរកយុត្ដិធម៌ពិតប្រាកដ […] ទឹកប្រាក់វាមិនសំខាន់ទេ សំខាន់គឺយុត្ដិធម៌ បើសិនជាគ្មានយុត្ដិធម៌ពិតប្រាដកទេ ទឹកប្រាក់គឺអត់មានតម្លៃ»។
អ្នកនាំពាក្យអង្គភាពព័ត៌មាននិងប្រតិកម្មរហ័ស នៃទីស្ដីការគណៈរដ្ឋមន្ដ្រី លោក ទិត សុធា ថា លោកបានដឹងរឿងនេះទេ ព្រោះលោកមិនមែនជាអ្នកទទួលញត្តិ។
កាលពីថ្ងៃទី១៥ កក្កដាឆ្នាំ២០១៧ លោក ហ៊ុន សែន បានផ្តល់លុយ១ម៉ឺនដុល្លារ សម្រាប់សងថ្លៃជំពាក់ថ្លៃរៀបចំអាហារថ្ងៃបុណ្យខួប១ឆ្នាំ លោក កែម ឡី នៅភូមិអង្គតាកុក ឃុំលាយបូរ ស្រុកត្រាំកក់ ខេត្តតាកែវ។
ក្រោយមក លោក ហ៊ុន សែន អះអាងថា លោកផ្តល់លុយ៥ម៉ឺនដុល្លារបន្ថែមទៀត ដើម្បីសង់ចេតិយ លោក កែម ឡី។
ករណីនេះ ភរិយាលោក កែម ឡី គឺអ្នកស្រី ប៊ូ រចនា បានសំដែងការខកចិត្ត ដោយថា ក្រុមគ្រួសារខាងប្ដីមិនគួរទទួលយកប្រាក់ឧបត្ថម្ភពីលោក ហ៊ុន សែន ទេ ដោយអ្នកស្រីថា គ្រប់គ្នាដឹងច្បាស់ហើយ «អ្នកណានៅពីក្រោយករណីឃាតកម្មនេះ»។
គួរបញ្ជាក់ថា លោក កែម ឡី ត្រូវបានខ្មាន់កាំភ្លើងបាញ់សម្លាប់កាលពីខែកក្កដាឆ្នាំមុន នៅក្នុងម៉ាត ក្បែរការ៉ាស់សាំងកាល់តិច ម្ដុំស្តុបបូកគោ។ ហើយមានបុរសឈ្មោះ អឿត អាង ដែលសមត្ថកិច្ចចោទថាជាខ្មាន់កាំភ្លើង និងហៅថា «ជួប សម្លាប់» តែម្នាក់ប៉ុណ្ណោះ ត្រូវបានចាប់កាត់ទោស ក្នុងសំណុំរឿងឃាតកម្មនេះ៕