សហជីព៤​ស្នើ​ទៅ​អន្តរជាតិ​កុំ​យក​វិស័យ​កាត់​ដេរ​ធ្វើ​ជា​ចំណាប់​ខ្មាំង​នយោបាយ

ក្រុម​កម្មករ​រោង​ចក្រ​កាត់ដេរ ​​ធ្វើការ​នៅ​ក្នុង​រោងចក្រ​មួយ​នៅ​ជាយ​រាជធានី​ភ្នំពេញ។ (វីអូឌី)

សហជីពចំនួន ៤ បាន​អំពាវនាវទៅ​សហគមន៍អន្តរជាតិ កុំ​ឲ្យ​យកបញ្ហាសេដ្ឋកិច្ចកម្ពុជា ធ្វើជាចំណាត់ខ្មាំងនយោបាយ ដោយ​បារម្ភ​ពី​ផល​ប៉ះ​ពាល់​ដល់​មនុស្ស​រាប់​លាន​នាក់ ខណៈស្ថានការណ៍នយោបាយកម្ពុជាកំពុងតែមានភាពតានតឹង។

ក្នុងសេចក្តីថ្លែងការរួមចុះថ្ងៃទី២៧ ខែវិច្ឆិកា ឆ្នាំ២០១៧ សហព័ន្ធសជីពមិត្តភាពកម្មករ សម្ព័នសហជីពជាតិ សហព័ន្ធសហជីពដើម្បីកម្មករ និងសមាគមអភិវឌ្ឍន៍ជីវភាពពលរដ្ឋកម្ពុជា បានអំពាវនាវសុំឲ្យ​អង្គការអន្តរជាតិ សហគមនអ៊ឺរ៉ុប សហរដ្ឋអាមេរិក ស្ថានទូតនានា រួមទាំងអ្នកបញ្ជាទិញ ត្រូវអនុគ្រោះពន្ធ និងបន្ថែមការបញ្ជាទិញ​ផលិត​ផល​កាត់​ដេរ​ពី​កម្ពុជាឲ្យកាន់តែ​ច្រើន។

ក្នុង​សេចក្តីថ្លែងការណ៍ដដែល ក្រុមសហជីពបានស្នើ​ទៅ​សហគមន៍អន្តរជាតិ កុំឲ្យ​ភ្ជាប់​វិស័យកាត់ដេរ​​ទៅនឹងរឿងនយោបាយ ដោយថា ប្រសិនបើយកវិស័យនេះទៅពាក់ព័ន្ធរឿងនយោបាយ អាចនឹងធ្វើឲ្យប៉ះពាល់ដល់ផលប្រយោជន៍កម្មកររាប់សែននាក់ ព្រមទាំងប្រជាពលរដ្ឋកម្ពុជារាប់លានផ្សេងទៀត ដែលទទួលផលពីវិស័យនេះ។

ស្ថានការណ៍នយោបាយកម្ពុជាបច្ចុប្បន្ន​នេះ ត្រូវបានមតិជាតិ និងអន្តរជាតិមើលឃើញថា កំពុងមានភាពតានតឹង បន្ទាប់ពី​មេដឹកនាំ​អតីត​បក្ស​ប្រឆាំង លោក កឹម សុខា ត្រូវ​បាន​ចាប់​ខ្លួន​ដាក់​ពន្ធនាគារ​ក្រោម​ការ​ចោទ​ថា «ក្បត់​ជាតិ» ហើយ​បក្ស​ប្រឆាំង​ដ៏​ធំ​ត្រូវ​បាន​រំលាយ​ចោល​កាល​ពី​ថ្ងៃ​ទី​១៦ ខែ​វិច្ឆិកា។

សហគមន៍អ៊ឺរ៉ុប សហរដ្ឋអាមេរិក និងប្រទេសលោកសេរីមួយចំនួនទៀត បានព្រមានដាក់ទណ្ឌកម្មសេដ្ឋកិច្ច និងសើរើទំនាក់ទំនងជាមួយកម្ពុជា ដោយថា កម្ពុជាបានដើរឆ្ងាយពីគន្លងលទ្ធិប្រជាធិបតេយ្យ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ