សមាជិកសភាគណបក្សប្រជាជនបានវាយប្រហារទៅលើការិយាល័យឧត្តមស្នងការសហប្រជាជាតិ ថាបានលូកដៃចូលកិច្ចការផ្ទៃក្នុងកម្ពុជា និងថាត្រៀមចាត់វិធានការនានាទៅលើការជ្រៀតជ្រែកនេះ ដើម្បីឲ្យមានការគោរពច្បាប់របស់កម្ពុជា។
សមាជិកសភារបស់គណបក្សប្រជាជនកម្ពុជា២រូប ដែលចូលរួមប្រជុំនៅព្រឹទ្ធសភានៅថ្ងៃនេះ ដើម្បីពិនិត្យនិងការពារសេចក្តីស្នើច្បាប់ស្តីពីគណបក្សនយោបាយ បានឆ្លៀតវាយប្រហារទៅលើការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិ ថាបានលូកដៃចូលកិច្ចការផ្ទៃក្នុងកម្ពុជា និងពុំស្គាល់ច្បាប់របស់ប្រទេសកម្ពុជា។
សមាជិកព្រឹទ្ធសភាលោក គង់ សារាជ មានប្រសាសន៍ថា ខណៈដែលព្រឹទ្ធសភា កំពុងរៀបចំនីតិវិធីនៃការពិនិត្យច្បាប់ស្តីពីគណបក្សនយោបាយនោះ កាលពីថ្ងៃទី២៤ កុម្ភះ ការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិ បានដាក់លិខិតមកសុំជួបប្រធានព្រឹទ្ធិសភា ពិភាក្សាពីច្បាប់នេះ។ លោកចាត់ទុកថា អង្គការនេះកំពុងតែបំពានទៅលើរដ្ឋធម្មនុញ្ញរបស់កម្ពុជា មិនអាចទទួលយកបាន និងថាត្រៀមចាត់វិធានការនានាចំពោះការជ្រៀតជ្រែតនេះ។
សមាជិករដ្ឋសភាលោក ឈាង វុន បានបន្ថែមពីលើលោក គង់ សារាជ ថាការិយាល័យនេះគួរតែត្រូវបានបញ្ចប់ទំនាក់ទំនងជាមួយកម្ពុជាជាយូរមកហើយ។ លោកថាលោកសោកស្តាយដែលការិយាល័យនេះ នៅតែបន្តព្យាយាមជ្រៀតជ្រែកចូលកិច្ចការផ្ទៃក្នុងកម្ពុជាបន្តទៀត បើទោះបីកម្ពុជាព្យាយាមធ្វើយ៉ាងណាឲ្យការិយាល័យនេះគោរពអធិបតេយ្យរបស់កម្ពុជាក៏ដោយ។
វីអូឌីមិនទាន់អាចសុំការឆ្លើយបំភ្លឺពីការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបាននៅឡើយទេនៅរសៀលថ្ងៃទី២៨ខែកុម្ភះនេះ។
សាស្ត្រាចារ្យវិទ្យាសាស្ត្រនយោបាយលោក ឯម សុវណ្ណារ៉ា ថាកម្ពុជាមានអធិបតេយ្យភាពរបស់ខ្លួនមែន តែអធិបតេយ្យនេះត្រូវបានចងដោយរដ្ឋធម្មនុញ្ញអង្គការសហប្រជាជាតិ ច្បាប់សិទ្ធិមនុស្សអន្តរជាតិ ហើយការិយាល័យឧត្តមស្នងការសិទ្ធិមនុស្សនេះ មានសិទ្ធិក្នុងការអន្តរាគមន៍ ឲ្យកម្ពុជាគោរពតាមអ្វីដែលកម្ពុជាបានចុះហត្ថលេខា។ លោកយល់ថា ប្រតិកម្មរបស់សមាជិកសភាបក្សកាន់អំណាចនេះគឺជាការខំប្រឹងសំដែងពីភាពរឹងមាំរបស់ខ្លួន និងព្យាយាមបំបាក់ស្មារតីរបស់ពលរដ្ឋមួយចំនួនដែលចង់ទាមទារសេរីភាព។
គួររំលឹកផងដែរថាកាលពីថ្ងៃទី១៩ខែធ្នូ២០១៦ រដ្ឋាភិបាលកម្ពុជា និងការិយាល័យឧត្តមស្នងការសិទ្ធិមនុស្សអង្គការសហប្រជាជាតិ បានចុះអនុស្សរណៈនៃការយោគយល់ដើម្បីឲ្យអង្គការអន្តរជាតិនេះបន្តការងារនៅកម្ពុជា សម្រាប់រយៈពេល ២ឆ្នាំទៀត។
មុននឹងឈានដល់ការចុះអនុស្សរណៈជាថ្មីនេះ រដ្ឋមន្រ្តីការបរទេសកម្ពុជា លោក ប្រាក់ សុខុន កាលពីថ្ងៃទី២២ខែវិច្ឆិកាឆ្នាំ២០១៦ បានផ្ញើលិខិតទៅកាន់ឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅទីក្រុងហ្សឺណែវ (Geneva) ដោយព្រមានបញ្ឈប់កិច្ចប្រតិបត្តិការ ឬ បិទបញ្ចប់ការិយាល័យនេះ ដោយចោទថា បានជ្រៀតជ្រែកចូលកិច្ចការផ្ទៃក្នុងរបស់កម្ពុជា៕