ក្រុមអ្នកឃ្លាំមើលការបោះឆ្នោត បន្តអំពាវនាវរកថវិកា ដើម្បីបានដាក់អ្នកសង្កេតការណ៍នៅទូទាំងប្រទេស ខណៈការបោះឆ្នោតជិតមកដល់ ដោយអះអាងថាបើធ្វើបែបនេះបាន នឹងទប់ស្កាត់ជម្លោះនយោបាយក្រោយបោះឆ្នោត។
ក្នុងសន្និសីទសារព័ត៌មាន ស្តីពីការចាប់ផ្តើមដំណើរការបន្ទប់ស្ថានការណ៍បោះឆ្នោតឆ្នាំ២០១៧ នាថ្ងៃទី២៨មីនានេះ សមាជិកបន្ទប់ស្ថានការណ៍ លោក ជាង សុខា លើកឡើងថា ការដាក់អ្នកសង្កេតការណ៍ នៅទូទាំងប្រទេស សម្រាប់ឃ្លាំមើលពីដំណើរការបោះឆ្នោត លោកថា អាចជួយទប់ស្កាត់មិនឲ្យមានជម្លោះនយោបាយក្រោយការបោះឆ្នោតដូចអាណត្តិមុនៗ។
លោកថា៖ «ក្នុងរយៈពេល៥ឆ្នាំនេះ ខ្ញុំគិតថាជាឱកាសល្អមែនទែនដែលយើងប្រើតែ២២ដុល្លារ ដើម្បីជួយរក្សាឆន្ទះម្ចាស់ឆ្នោត។ ហើយបើសិនជាធ្វើបែបនឹងបានស្រុកយើង អាទំនាស់នៃការបោះឆ្នោតចុងក្រោយនឹងវានឹងត្រូវកាត់បន្ថយហើយ។ អញ្ចឹងបោះឆ្នោតហើយយើងមានឱកាសក្នុងការប្រកបមុខរបរចិញ្ចឹមជីវិត ជាជាងបោះឆ្នោតហើយយើងនៅបន្តឈ្លោះគ្នាតទៅទៀត»។
ប៉ុន្តែលោក ជាង សុខា លើកឡើងថា គិតត្រឹមថ្ងៃទី២៤មីនា បន្ទប់ស្ថានការណ៍ មិនទាន់ទទួលបានថវិកាឧបត្ថម្ភ គ្រប់គ្រាន់ សម្រាប់បើកវគ្គបណ្តុះបណ្តាលនិងចំណាយផ្សេងៗ ដល់អ្នកសង្កេតការណ៍ជាង២ម៉ឺននាក់(២២១៤៨) សម្រាប់ដាក់ពង្រាយនៅគ្រប់ការរិយាល័យបោះឆ្នោតនៅទូទាំងប្រទេសបានទេ។ លោកថា បន្ទប់ស្ថានការណ៍ត្រូវការថវិកាប្រមាណជាង២០ម៉ឺនដុល្លារទៀត។
នាយកប្រតិបត្តិអង្គការឃ្លាំមើលការបោះឆ្នោតហៅខុមហ្វ្រែល លោក គល់ បញ្ញា លើកឡើងថា បើទោះបីជាពេលនេះ បន្ទប់ស្ថានការណ៍មិនទាន់ទទួលបានថវិកាគ្រប់គ្រាន់ក៏ដោយ លោកថាបន្ទប់ស្ថានការណ៍នឹងដំណើរ ទៅជាជំហ៊ានៗតាមថវិកាដែលផ្តោតលើអ្នកសង្កេតការណ៍ចំនួន១៤៥០០នាក់សិន។
លោកថា៖ «បើសិនជាយើងអនុវត្តន៍១៤៥០០នាក់នេះ ម្នាក់ត្រូវមើល២ការិយាល័យ។ អញ្ចឹងទេវាជាបន្ទុកទៅលើអ្នកសង្កេតការណ៍យើងខ្លាំងណាស់ បើបានម្នាក់មួយការរិយាល័យ វាជារឿងសំខាន់សម្រាប់យើង។ ហើយយើងអាចធ្វើកិច្ចការក្តាប់ព័ត៌មានលទ្ធផលបោះឆ្នោតហ្នឹងទាន់ពេល បើយើងគិតមើលពីកម្រិតលំអៀងនៃរបាយការណ៍ទាន់ពេលហ្នឹង រហូតដល់៩៨ភាគរយ បើយើងមានម្នាក់មើលក្នុងមួយការរិយាល័យ»។
លោក គល់ បញ្ញា ឲ្យដឹងដែរថា តាមរយៈអ្នកសង្កេតការណ៍ បន្ទប់ស្ថានការណ៍នឹងបង្ហោះរបាយការណ៍បោះឆ្នោត នៅលើគេហទំព័ររបស់ខ្លួន ភ្លាមៗក្រោយរាប់សន្លឹកឆ្នោតរួច ដើម្បីបង្ហាញពីតម្លាភាព។
លោកថា៖ «លទ្ធផលបោះឆ្នោតត្រូវតែដាក់នៅលើវេបផ្សាយ មិនមែនដាក់តែតួលេខទេ ត្រូវមានភស្តុតាង [ទម្រង់១១០២]រូបហ្នឹងដើម្បីឲ្យគេអស់ចិត្ត»។
បើតាមលោក គល់ បញ្ញា ការប្រើបច្ចេកវិទ្យាទំនើបប្រកាសព័ត៌មានដូចគ្នានៅលើគេហទំព័រនេះ ក៏នឹងជំរុញទៅ គណៈកម្មាជាតិរៀបចំការបោះឆ្នោតផងដែរ ដែលលោកថា ដើម្បីទប់ស្កាត់ជម្លោះក្រោយការបោះឆ្នោត។លោកថា៖ «មិនបាច់ទៅឈ្លោះគ្នាទាមទារបើកកញ្ចប់សុវត្ថិភាព បើកមិនបើកនោះទេ ព្រោះរឿងហ្នឹងគ្មានស្អីត្រូវលាក់ការ បើបិទនៅការរិយាល័យបោះឆ្នោតហើយ មកដាក់ក្នុងការសម្ងាត់ស្អីទៀតវាត្រូវតែដាក់បង្ហាញទៅសាធារណជន»។
ទោះជាយ៉ាងណាលោក គល់ បញ្ញា បញ្ជាក់ថា អ្នកសង្កេតការណ៍ដែលត្រូវបានជ្រើសរើស ពួកគេទទួលបានបណ្តុះបណ្តាលផ្នែកជំនាញអង្កេត ក្រមសីសធម៌ និងជំនួយផ្នែកច្បាប់ពីគ្រូបង្គោល។
នៅសប្តាហ៍នេះមេដឹកនាំបក្សកាន់អំណាច លោកនាយករដ្ឋមន្ត្រី ហ៊ុន សែន និងមេដឹកនាំបក្សប្រឆាំង លោក កឹម សុខា ហាក់បង្ហាញជំហរួមគ្នាថា ពួកគេចង់ឃើញដំណើរការ បោះឆ្នោត ខាងមុខ ប្រព្រឹត្តទៅដោយសេរី ត្រឹមត្រូវនិងយុត្តិធម៌ និងគ្មានការគំរាមកំហែង។
ទោះជាយ៉ាងណា សមាជិកបន្ទប់ស្ថានការណ៍ ម្នាក់ទៀត លោក អំ សំអាត អះអាងថា ក្រុមការងារនឹងស្វែងរកកិច្ចសហការពី គជប ស្ថានទូតនានា ប្រចាំកម្ពុជា ការរិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ដើម្បីជំរុញតម្លាភាពនៃដំណើរការបោះឆ្នោតនេះ ដើម្បីទប់ស្កាត់ជម្លោះនយោបាយ ក្រោយការបោះឆ្នោត៕