ជាថ្មីម្តងទៀត លោក ហ៊ុន សែន ប្រធានគណបក្សប្រជាជនកម្ពុជាបញ្ជាផ្ទាល់មាត់ឲ្យលោក ស ខេង រដ្ឋមន្រ្តីក្រសួងមហាផ្ទៃ ពិនិត្យផ្លូវច្បាប់ដើម្បីចាត់វិធានការលើបន្ទប់ស្ថានការណ៍បោះឆ្នោតដែលជាបណ្តុំអង្គការសង្គមស៊ីវិល។
ក្នុងពិធីរំលឹកខួប៦៦ឆ្នាំនៃការបង្កើតគណបក្សប្រជាជនកម្ពុជានៅថ្ងៃនេះ ដែលជួបជុំអ្នកគាំទ្ររាប់ពាន់នាក់នៅកោះពេជ្រ លោក ហ៊ុន សែន បានចោទប្រកាន់បន្ទប់ស្ថានការណ៍ថាជាទីតាំងបញ្ជាឲ្យមាន «បដិវត្តន៍ពណ៌»។ លោកចោទថាសកម្មភាពរបស់បន្ទប់ស្ថានការណ៍ស្ថិតនៅក្រៅសំណាញ់ច្បាប់។
លោកមានប្រសាសន៍ថា៖ «យើងបានដឹងហើយថាអង្គការក្រៅរដ្ឋាភិបាលមួយៗបានចុះឈ្មោះប៉ុន្តែរបស់ដែលហៅថាបន្ទប់ស្ថានការណ៍ដែលជាអ្នកខោកក្បាលទៅលើគណៈកម្មាធិការជាតិរៀបចំការបោះឆ្នោត។តើពួកគេមានសិទ្ធិបង្កើតនូវទីតាំងបែបនេះឬក៏ទីតាំងបែបនេះជាមូលដ្ឋានបញ្ជានៃគោលការណ៍បដិវត្តន៍ព័ណ៌?ប្រសិនបើយ៉ាងដូច្នោះ ក្រសួងមហាផ្ទៃត្រូវចាត់ការបន្ទាន់នូវអ្វីដែលពួកគេបាននិងកំពុងធ្វើក្រោមលេសតាមពិនិត្យមើលការបោះឆ្នោត»។
សមាជិកបន្ទប់ស្ថានការណ៍លោក សំ គន្ធាមី មានប្រសាសន៍ថា ការលើកឡើងរបស់ លោក ហ៊ុន សែន គឺជាការយល់ច្រឡំ ដោយថា បន្ទប់ស្ថានការណ៍ជាបណ្តុំអង្គការសមាគម ដែលស្របច្បាប់ បង្កើតឡើងរយៈពេលខ្លី ដើម្បីឃ្លាំមើលដំណើរបោះឆ្នោតតែប៉ុណ្ណោះ។
លោកបន្តថា បន្ទប់ស្ថានការណ៍មិនមែនជាមូលដ្ឋានគាំទ្រឲ្យមានបដិវត្តន៍ពណ៌ដូចលោក ហ៊ុន សែន យល់ឃើញនោះទេ។
លោកបន្ថែមថា៖ «បន្ទប់ស្ថានការណ៍នេះ ជាបណ្តុំអង្គការសមាគមមិនមែនរដ្ឋាភិបាលហើយអង្គការនីមួយៗ ជាអង្គការស្របច្បាប់ ហើយបន្ទប់ស្ថានការណ៍នេះបង្កើតតែរយៈពេលខ្លីទេធ្វើការ ជាមួយគ្នាជាក្រុមហ្នឹងតែរយៈពេលខ្លីមួយសម្រាប់លើដំណើរការបោះឆ្នោតឥលូវចប់បោះឆ្នោត យើងរំសាយវិញអស់ហើយៗ ពួកយើងគ្មានគំនិតធ្វើជាមូលដ្ឋានស្អីទេ ខ្ញុំសូមបដិសេធថា អត់មានជាមូលដ្ឋានជាបដិវត្តិពណ៌ទេ នេះជាចម្លើយរបស់ខ្ញុំ គាត់យល់ច្រឡំហើយ»។
លោកមេធាវី ហុង គឹមសួន មានប្រសាសន៍ថា ប្រសិនបើបន្ទប់ស្ថានការណ៍ធ្វើការដោយមានការអនុញ្ញាត្តពីគ.ជ.បត្រឹមត្រូវនោះ គឺមិនមានអ្វីខុសច្បាប់ទេ។
លោកបន្ថែមថា៖ «បើនិយាយពីរឿងច្បាប់ខុស ម៉េចគេអនុញ្ញាត្តឲ្យពួកគាត់ធ្វើការងាររហូតដល់បញ្ចប់ ព្រោះគាត់ដាក់ពាក្យសុំ ឬ ក៏គ.ជ.បយល់ព្រមទេ កាលពួកគាត់ទៅបង្កើតអាហ្នឹងនៅអី ហ្នឹងបាននោះ យើងពិនិត្យអាហ្នឹងសិន បើសិនជាថា កាលក្រុមការងារនេះចូលទៅធ្វើការជាមួយនឹងគ.ជ.ប ឬក៏បង្កើតទីតាំងដោយមានការអនុញ្ញាត្តពីគ.ជ.ប អាហ្នឹងអត់ខុសច្បាប់ទេ»។
បន្ទប់ស្ថានការណ៍ ដែលជាបណ្តុំអង្គការសង្គមស៊ីវិលបានដាក់អ្នកសង្កេតការណ៍ប្រហែលមួយម៉ឺននាក់ ឃ្លាំមើលដំណើការបោះឆ្នោតក្រុមប្រឹក្សាឃុំសង្កាត់ កាលពីថ្ងៃទី៤ខែមិថុនា។
បន្ទប់ស្ថានការណ៍បានវាយតម្លៃដំណើការបោះឆ្នោតនេះថា បានប្រព្រឹត្តិទៅដោយសន្តិវិធី ល្អជាងការបោះឆ្នោតលើកមុនៗ តែស្នើឲ្យកែលម្អចំណុចខ្វះខាតមួយចំនួនដូចជា ការគំរាមកំហែងមុនបោះឆ្នោត ការទិញទឹកចិត្តអ្នកបោះឆ្នោត និងការធ្វើទុក្ខបុកម្នេញលើសកម្មជនគណបក្សប្រឆាំងជាដើម៕
រាយការណ៍បន្ថែមដោយ ឃុត សុគុណ
