រដ្ឋាភិបាល៖ ២៩កក្កដាឆ្នាំ២០១៨ ជាថ្ងៃបោះឆ្នោតជ្រើសតាំងតំណាងរាស្ដ្រនីតិកាលទី៦

លោក ហ៊ុន សែន បោះឆ្នោតនៅការិយាល័យសាលាគរុកោសល្យនិងវិក្រិត្យការក្រុងតាខ្មៅខេត្តកណ្តាលឆ្នាំ២០១៧

រាជរដ្ឋាភិបាល បានកំណត់យកថ្ងៃអាទិត្យ ទី២៩ ខែកក្កដា ឆ្នាំ២០១៨ ជាថ្ងៃនៃការបោះឆ្នោតជ្រើសតាំងតំណាងរាស្ដ្រនីតីកាលទី៦ នៃរដ្ឋសភា នេះបើតាមសេចក្ដីសម្រេច ចុះថ្ងៃទី២៨ខែកក្កដាឆ្នាំ២០១៧ ដែលវីអូឌីទើបទទួលបាន។

បើតាមសេចក្ដីប្រកាសដដែលនេះ រាជរដ្ឋាភិបាលបញ្ជាឲ្យក្រសួងមហាផ្ទៃ និងស្ថាប័នពាក់ព័ន្ធ អនុវត្តសេចក្ដីសម្រេចនេះ ចាប់ពីថ្ងៃចុះហត្ថលេខានេះទៅ។

ដោយឡែក គ.ជ.ប ក៏បានប្រកាសនឹងធ្វើបច្ចុប្បន្នភាពបញ្ជីឈ្មោះបោះឆ្នោតថ្មី ឆ្នាំ២០១៧ ចាប់ពីថ្ងៃទី១ខែកញ្ញា រហូតដល់ថ្ងៃទី៩ ខែវិច្ឆិកា ឆ្នាំ២០១៧ ខាងមុខ ពោលគឺធ្វើឡើង ឲ្យបានមុនការបោះឆ្នោតថ្នាក់ជាតិឆ្នាំ២០១៨។

កាលពីបោះឆ្នោតអាណត្តិទី៥ រដ្ឋាភិបាល បានកំណត់យកថ្ងៃទី២៨កក្កដាឆ្នាំ២០១៣ ជាថ្ងៃបោះឆ្នោតជ្រើសតាំងតំណាងរាស្ដ្រ ដោយពលរដ្ឋគ្រប់អាយុ បានទៅបោះឆ្នោតចំនួន៩,៦៧លាននាក់។ ក្រោយបោះឆ្នោតកាលនោះ គណបក្សធំៗចំនួនពីរ បានទទួលសំឡេងភាគច្រើនក្នុងរដ្ឋសភា ដោយគណបក្សប្រជាជនកម្ពុជា ទទួលបាន៦៨អាសនៈ ចំណែក គណបក្សសង្គ្រោះជាតិទទួលបាន៥៥អាសនៈ។ ប៉ុន្ដែក្រោយប្រកាសលទ្ធផលបោះឆ្នោតឆ្នាំ២០១៣ កាលនោះ គណបក្សសង្គ្រោះជាតិ បានដឹកនាំមហាបាតុកម្មតវ៉ាប្រឆាំងនឹងលទ្ធផលនោះ ដោយគណបក្សប្រឆាំងចោទថា មានភាពមិនប្រក្រតីធ្ងន់ធ្ងរ និងទទូចឲ្យមានស៊ើបអង្កេត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ