គ្មានអ្នកណាមិនដឹងនោះទេ ថាតារាចម្រៀងវ័យក្មេងលោក ជ័យ សុវ៉ាត គឺកូនកំព្រាទាំងឪពុក និងម្ដាយ ដោយសារតែឪពុករបស់លោកទទួលមរណភាពក្នុងពេលដែលលោកស្ថិតនៅក្នុងផ្ទៃ៧ខែ ហើយម្ដាយបានទទួលមរណភាពក្នុងពេលដែលលោកមានវ័យ៧ឆ្នាំ ខណៈដែលទាំងម្ដាយនិងឪពុករបស់លោកសុទ្ធតែទទួលមរណភាពក្នុងវ័យ៥១ឆ្នាំដូចគ្នា និងដោយសារតែជំងឺលើសឈាមដូចគ្នា។
លោកថាក្រោយអត់ពីឪពុកម្ដាយ បងៗទាំង៤របស់លោកមិនខុសពីយកលោកទៅបំបរបំបង់ចោលទេដោយសារតែចាត់ទុកថាលោកថាជាកូនចង្រៃ ហើយបណ្ដោយលោករសាត់អណ្ដែងមករស់នៅនៅក្នុងមណ្ឌលកុមារកំព្រា ក្នុងពេលដែលលោកមិនដែលបានស្គាល់ភាពកក់ក្ដៅទាល់តែសោះតាំងពីបានកើតមក។
យ៉ាងណាមិញ លោកថាបើគ្មានការបោះបង់របស់គ្រួសារ ក៏លោកមិនស្គាល់ឪពុកម្ដាយចិញ្ចឹមសព្វថ្ងៃ និងមិនបានក្លាយខ្លួនជាតារាសាន់ដេដែលទើបបានចូលកុងត្រានេះ។ តារាដែលមានឈ្មោះបោះសំឡេងតាំងពីក្នុងកម្មវិធី ផ្កាយរះក្នុងសួន មួយនេះបានថ្លែងនៅចំពោះមុខម្ដាយចិញ្ចឹមក្នុងកិច្ចសម្ភាសន៍ពីជីវិតដ៏កម្សត់ថា ក្រោយពេលឪពុកម្ដាយស្លាប់ចោលលោកមិនដែលគិតចង់ទៅរស់នៅជាមួយអ្នកណា ក្រៅពីបងប្រុសបងស្រីបង្កើតរបស់ខ្លួននោះទេ ប៉ុន្តែប្រហែលជាភ័ព្វវាសនារបស់លោកមិនល្អ ទើបលោកសឹងតែគ្មានបងប្អូនណាម្នាក់ទទួលចិញ្ចឹមដោយក្ដីស្រឡាញ់ ដោយមានតែបងស្រីធំម្នាក់ ក៏ចិញ្ចឹមអោយលោកបានបាយហូបដោយពាក្យសម្ដីមិនល្អ
និងប្រើអោយលោកមើលតែកូន និងធ្វើការងារលក់នំលក់ចំណីតាមភូមិស្ទើរតែគ្មានពេលសម្រាក។
លោកចាត់ទុកថាខ្លួនបានចូលសាលាដោយសារតែមានអាណិតរបស់អ្នកជិតខាងនិងសាច់ញាតិដែលស្នើអោយលោកមករស់នៅមណ្ឌលកុមារកំព្រាប៉ុណ្ណោះ ទើបលោកចេះតែមានឱកាសបានស្គាល់អ្នកឧបត្ថម្ភមណ្ឌល ហើយរហូតមានស្រ្តីជាជនជាតិកាណាដាម្នាក់ស្រឡាញ់ និងផ្ដល់ប្រាក់ចិញ្ចឹមក្នុងមួយខែ៨០ដុល្លារ អោយលោកបានរៀនសូត្រ ក្រោយពេលដែលមណ្ឌលត្រូវបានរំសាយ បញ្ចប់ការផ្គត់ផ្គង់ក្មេង។
លោកកាន់តែមានវាសនារសាត់អណ្ដែតនៅក្នុងផ្ទះជួលតែឯងនៅរាជធានីភ្នំពេញ ហើយក៏បានដាក់ពាក្យចូលប្រលងក្នុងកម្មវិធី«ផ្កាយរះក្នុងសួន»កាលពីឆ្នាំ២០១៣ ជំនាន់ទី១របស់ទូរទស្សន៍អប្សរា ដោយទទួលបានចំណាត់ថ្នាក់លេខ២។
ឱកាសបានច្រៀងនៅក្នុងកម្មវិធីនោះហើយ ដែលខ្សែជីវិតរបស់លោកត្រូវបានគេលាតត្រដាងជាសាធារណៈ
រហូតត្រូវបានអ្នកមានស្ដុកស្ដម្ភម្នាក់ដែលមានស្វាមីជាមន្ត្រីជាន់ខ្ពស់នៅក្រសួងសេដ្ឋកិច្ច និងមានភរិយាជាអ្នកជំនួញនៅខេត្តក្រចេះ ជ្រើសជាកូនចិញ្ចឹម ដោយបានចិញ្ចឹមបីបាច់លោកតាំងពីឆ្នាំ២០១៤រហូតមក ដោយប្រកាសអោយក្លាយជាកូនស្របច្បាប់នៅក្រោមបន្ទុកផង។
លោកត្រូវគេឃើញផ្លាស់ប្ដូរពីជីវិតក្មេងកំព្រា ទុរគត និងក្រីក្រ ក្លាយជាក្មេងមានផ្ទះវីឡាទំនើបរស់នៅនិងមានរថយន្តយ៉ាងហ៊ឺហារជាមធ្យោបាយរាល់ថ្ងៃ ដោយលោកនិងគ្រួសារថ្មីគឺមិនខុសពីសាច់ឈាមតែមួយនោះទេ
បើទោះជាគ្រួសាររបស់ឪពុកម្ដាយចិញ្ចឹមលោកមានកូនប្រុសស្រីពេញកំលោះក្រមុំ២នាក់រួចទៅហើយ។
អ្វីដែលគេកត់សម្គាល់ទៅទៀតនោះ គឺលោកបានត្រូវបានផលិតកម្មសាន់ដេកុងត្រាអោយក្លាយជាអ្នកចម្រៀងពេញសិទ្ធិរហូតដល់រយៈពេល៧ឆ្នាំកាលពីដើមខែធ្នូ ក្នុងឆ្នាំ២០១៧មុននេះនោះផង ទើបធ្វើអោយម្នាក់កោតសរសើរពីជោគវាសនារបស់តារារូបនេះហួសប្រមាណ។
លោក ជ័យ សុវ៉ាត និយាយថាមុនជួបឪពុកម្ដាយចិញ្ចឹមលោកមិនខុសពីក្មេងដែលត្រូវគេបោះបង់ចោលនោះ ដោយសារតែមានបងៗ៤នាក់ តែសុទ្ធតែមិនអាចផ្ដល់ភាពកក់ក្ដៅអោយលោករស់នៅជាមួយបាន ដោយលោកគិតមានអារម្មណ៍មិនចង់រស់ម្ដងៗនោះផង ជាពិសេសក្នុងពេលដែលលោកមិនទាន់មានឱកាសបានទទួលប្រាក់ជំនួយពីម្ដាយធម៌នៅប្រទេសកាណាដាដែលអាចអោយលោកឡើងមកជួលផ្ទះគេបានរៀនបន្ត។
សព្វថ្ងៃក្រៅពីជាតារាចម្រៀងសាន់ដេ ដែលទើបចេញបទបើកឆាកក្រោមចំណងជើងថា «ក្រចេះស្នេហ៍ខ្ញុំ» ក្ដៅៗ លោកក៏ជានិស្សិតពេទ្យឆ្នាំទី៥ផងដែរ ដោយលោកប្រកាសអ្វីៗដែលទទួលបាននាពេលនេះ គឺសុទ្ធតែជាកើតចេញពីការប្រឹងប្រែងក្រោកឈរក្រោយពីខ្វះភាពកក់ក្ដៅរបស់គ្រួសារក្រោយពីឪពុកម្ដាយស្ដាប់ចោលទាំងអស់។
យ៉ាងណាមិញលោកបានសរសើរដល់បងៗរបស់ដែលបានប្រគល់លោកមកអោយឪពុកម្ដាយចិញ្ចឹមសព្វថ្ងៃ ដោយមិនដែលមករំខានដល់ជីវិតរបស់លោកនោះទេ គឺដូចជាប្រគល់អោយដាច់ហើយឈប់រវល់នឹងភាពមានបានរបស់លោកតែម្ដង ទើបធ្វើអោយលោកមិនមានអារម្មណ៍ខ្លាចចិត្តរបស់ឪពុកម្ដាយចិញ្ចឹមនៅពេលមានការរំខានពីគ្រួសារដើម។
លោកថានឹងខំប្រឹងពង្រឹងជំហរអោយបានរឹងមាំទាំងការសិក្សានិងអាជីពចម្រៀងក្រោយចូលសាន់ដេ ហើយលោកក៏នឹងខំធ្វើជាកូនដ៏ល្អរបស់ឪពុកម្ដាយចិញ្ចឹមទាំង២ ដោយមិនអោយមានឈ្មោះថាជាកូនអកត្តញ្ញូនោះដែរ បើទោះជាលោកនិងឪពុកម្ដាយចិញ្ចឹមមិនជាប់ឈាមនឹងគ្នា៕