មានការចាប់អារម្មណ៍គួរសមបន្ទាប់ពីហ្វេសប៊ុកផ្លូវការរបស់តារាចម្រៀងដែលធ្លាប់ល្បីឈ្មោះកាលពីច្រើនឆ្នាំមុន គឺអ្នកនាង ផាន់ ណាវី បានបង្ហាញថាអ្នកនាងបានមកដល់ប្រទេសកម្ពុជាតាំងពីយប់ថ្ងៃទី២៨ មករា ដោយអ្នកនាងបញ្ជាក់ថាមិនមែនជាដំណើរចុះមកលេងស្រុកជាលើកទី១របស់ខ្លួននោះទេ គឺមកច្រើនដងមកហើយ។
យ៉ាងណាមិញ អ្នកនាងនៅតែប្រកាសថាមិនអាចទទួលឡើងឆាកនិងបង្ហាញមុខលើឆាកតន្ត្រីក្នុងស្រុកបានទេ
ដោយសារតែអ្នកនាងបញ្ជាក់ថាចុះមកលើកនេះ ក្នុងភាពតក់ក្រហល់។ អ្នកនាង ផាន់ ណាវី ដែលត្រូវគេស្គាល់យូរមកហើយថាជាតារាចម្រៀងក្នុងក្រុមរ៉ៃមាស ក្នុងជំនាន់អ្នកនាង អ៊ិត ស្រីពីន និង ឈួន សុវណ្ណឆៃ ជាដើមនោះ បានអះអាងថា អ្នកនាងចុះមកប្រទេសកម្ពុជាលើកនេះ គឺមកបានតែ៧ថ្ងៃប៉ុណ្ណោះ ដោយសារតែអ្នកនាងសុំច្បាប់ការងារនៅអាមេរិកបានតែរយៈពេលខ្លី ហើយក៏មានការងារត្រូវបំពេញនៅឯអាមេរិកជាច្រើនរង់ចាំ
មិនអាចបន្តស្នាក់នៅប្រទេសកំណើតបានលើសការកំណត់។
អ្នកនាងថាហេតុផលដែលខ្លួនចុះមកលេងនេះ មិនមែនមកលេងទេ គឺមកមានការទើបអ្នកនាងគ្រាន់តែចុះមកភ្លាម ក៏រួសរាន់ចាត់ការការងារដែលត្រូវចាត់ចែង ហើយអ្នកនាងនឹងឡើងយន្តហោះទៅអាមេរិកវិញភ្លាមនៅថ្ងៃអង្គារ៍ទី៦កុម្ភៈ ដោយមិនមានគម្រោងពន្យារពេលទេ ដោយសារតែអ្នកនាងមកតែម្នាក់ឯង ហើយមិនចង់អោយកូនប្រុស២នាក់ចោល ក្នុងពេលដែលស្វាមីរបស់អ្នកនាងក៏រវល់នឹងការងារមិនសូវនៅផ្ទះផងដែរ។
អ្នកនាងថាគ្រាន់តែមកដល់ប្រទេសកម្ពុជាភ្លាម មានការទាក់ទងច្រើនអោយអ្នកនាងឡើងឆាក និងផ្ដល់កិច្ចសម្ភាសន៍ជាដើម ប៉ុន្តែមកពីអ្នកនាងត្រូវរត់ទៅខេត្តផង និងមិនបានត្រៀមខ្លួនផង ទើបបានទទួលទាំងអស់
ដើម្បីកុំអោយទទួលអ្នកនាងនេះមិនទទួលអ្នកនោះហើយធ្វើអោយផលិតករ ដែលធ្លាប់រាប់អានជាមួយអ្នកនាងអន់ចិត្ត។
អ្នកនាងអោយតែមកប្រទេសកម្ពុជាម្ដងៗ គឺអ្នកនាងចុះមកក្នុងលក្ខខណ្ឌការងារ និងចុះមកមើលគ្រួសារបែបនេះជាប្រចាំ ទើបអ្នកនាងមកលេងស្រុកបានច្រើនដង ប៉ុន្តែឱកាសឡើងឆាកនិងឡើងបង្ហាញខ្លួននៅលើកញ្ចក់ទូរទស្សន៍មិនសូវបានធ្វើ។ យ៉ាងណាមិញ អ្នកនាងថានៅឯសហរដ្ឋអាមេរិក គឺអ្នកនាងនៅតែទទួលច្រៀងជាមួយតារាចម្រៀងឡើងពីស្រុកខ្មែរ និងនៅទីនោះជាធម្មតាទេ បើទោះជាអ្នកនាងក៏មានការងារត្រូវមើលកូន
និងរវល់ច្រើន។
ដំណើរមកលេងស្រុកលើកនេះ អ្នកនាងមិនបានបញ្ជាក់លម្អិតថាមកដើម្បីធ្វើកិច្ចការអ្វីអោយប្រាកដនោះ
ទេ ប៉ុន្តែគេឃើញអ្នកនាងបង្ហោះពីសកម្មភាពទៅមើលផ្ទះចាស់ដែលអ្នកនាងធ្លាប់រស់នៅដោយក្នុងផ្ទះនោះក៏មានបើកជាហាងលក់សម្ភារៈកីឡាផងនៅម្ដុំវិទ្យាល័យវត្តភ្នំ។
ក្រៅពីនោះអ្នកនាងបង្ហាញតែសកម្មភាពជួបជុំជាមួយគ្រួសារនិងមិត្តភ័ក្រ្តនៅក្រៅសិល្បៈប៉ុណ្ណោះ។ អ្នកនាងបញ្ជាក់ថាខ្លួនមកក្នុងកិច្ចការតិចតួច តែអ្នកនាងមិនចង់លាតត្រដាងថានោះជាកិច្ចការអ្វីនោះទេ។ អ្នកនាងបញ្ជាក់ថាស្វាមីរបស់អ្នកនាងគឺជាអណិកជនរស់នៅសហរដ្ឋអាមេរិក ដោយក្រោយពីរួមរស់ជាមួយគ្នា អ្នកនាង និងស្វាមី ទទួលបានកូនប្រុស២នាក់ហើយ។
អ្នកនាង ផាន់ ណាវី នៅតែអះអាងថាចង់បង្ហាញខ្លួនរាល់ពេលចុះមកដល់កម្ពុជាម្ដងៗ ប៉ុន្តែមកពីអ្នកនាងក៏មិនបានត្រៀមខ្លួន ហើយក៏ច្រើនតែមកក្នុងលក្ខខណ្ឌប្រថុចញុចទើបអ្នកនាងសុខចិត្តអោយគេថាអ្នកនាងឡើងចុះកម្ពុជាស្ងាត់ៗ ហើយមិនចាប់អារម្មណ៍អោយឆាកអោយមហាជនខ្មែរបានឃើញ។
តារាចម្រៀងដែលធ្លាប់សាងភាពល្បីតាមរយៈផលិតកម្ម«រ៉ៃមាស»និងផលិតកម្មក្រៅស្រុករូបនេះ បន្តថាតាំងពីអ្នកនាងបានចេញទៅរស់នៅអាមេរិកអ្នកនាងចុះមកដល់ប្រទេសកម្ពុជា៥លើកសរុបទាំងលើកនេះហើយ
ប៉ុនែ្តមកពីអ្នកនាងត្រូវចុះមកក្នុងរយៈពេលខ្លីពេក ទើបនៅតែមិនអាចទទួលឡើងឆាក តបតាមការអញ្ជើញ។
ម្យ៉ាងមកពីអ្នកនាងចេះតែខ្លាចរឿងអ្នកគាំទ្រភាគច្រើនសើចរឿងអ្នកនាងឡើងគីឡូជាងមុនផង ទើបចេះតែរអាឆាកទូរទស្សន៍ ហើយមិនទាន់ត្រៀមខ្លួនទទួលឡើងឆាក រាល់ពេលចុះមកកម្ពុជាម្ដងៗ។ យ៉ាងណាមិញ អ្នកនាងថានៅក្នុងឱកាសក្រោយ អ្នកនាងនឹងទទួលឡើងឆាក និងផ្ដល់កិច្ចសម្ភាសន៍ក្នុងដំណើរចុះមកដល់កម្ពុជារបស់ខ្លួនអោយខានតែបាន ដើម្បីផ្ញើក្ដីនឹករលឹកដល់បងប្អូនខ្មែរក្នុងស្រុកដែលធ្លាប់គាំទ្រ តែក៏លុះត្រាតែអ្នកនាងចុះមកក្នុងរយៈពេលមួយយូរជាងនេះ ដែលមានស្វាមី និងកូនទាំង២មកជាមួយ ដែលមិនធ្វើអោយអ្នកនាងបារម្ភរឿងម្នាក់នៅខាងនេះ ឯម្នាក់នៅខាងនោះនោះផងដែរ៕
