មន្ត្រីការពារសិទ្ធិមនុស្ស និងអគ្គលេខាធិការរងគ.ជ.ប ដែលត្រូវបានដោះលែងឲ្យនៅក្រៅឃុំ កាលពីល្ងាចថ្ងៃទី២៩ខែមិថុនាម្សិលមិញ បានបញ្ចេញមតិយោបល់ខុសគ្នាពីដោះលែង និងថាពួកគេស្ទើរតែមិនជឿរអំពីការដោះលែងនេះទេ។
មន្ត្រីការពារសិទ្ធិមនុស្សទាំង៥រូបនោះ ត្រូវបានចាប់ខ្លួនដោយអង្គភាពប្រឆាំងអំពើពុករលួយ កាលពីចុងខែមេសាឆ្នាំ២០១៦ ខណៈស្ថានការណ៍នយោបាយកំពុងឡើងកម្តៅ។ បើតាមមេធាវីការពារក្តី លោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី រួមទាំងមន្ដ្រី គ.ជ.ប លោក នី ចរិយា ត្រូវបានឃុំខ្លួនជាបណ្តោះអាសន្នដោយគ្មានភស្ភុតាងដាក់បន្ទុកនៅឡើយទេ។
ក្នុងដីកាបង្គាប់ឲ្យដោះលែងចុះថ្ងៃទី២៩មិថុនាឆ្នាំ២០១៧ ចៅក្រមស៊ើបសួរលោក ធាម ច័ន្ទពិសិដ្ឋ បានបញ្ជាទៅកាន់ប្រធានពន្ធនាគារភ្នំពេញ និងប្រធានមណ្ឌលអប់រំទី១ ឲ្យដោះលែងអ្នកទាំង៥នាក់នេះ ដោយពុំបានបញ្ជាក់ពីមូលហេតុនៃការដោះលែងទេ។
ដើរចេញពីពន្ធនាគារក្នុងសំលៀកបំពាក់ស៊ីវិល អគ្គលេខាធិការរងគ.ជ.ប លោក នី ចរិយា មានប្រសាសន៍ទៅកាន់អ្នកសារព័ត៌មានថា លោកមានអារម្មណ៍សប្បាយរីករាយជាខ្លាំង ចំពោះការដោះលែងនេះ តែលោកសុំមិនបញ្ចេញមតិយោបល់លើការដោះលែងនេះទេ ដោយថា រឿងនេះ កំពុងស្ថិតនៅក្នុងនីតិវិធីតុលាការនៅឡើយ។
លោកថា៖ «ខ្ញុំមិនអាចធ្វើអត្ថាធិប្បាយពាក់ព័ន្ធនឹងនីតិវិធីតុលាការទេ ព្រោះរឿងនេះ កំពុងស្ថិតក្នុងនីតិតវិធីតុលាការនៅឡើយ។ … ខ្ញុំមានអារម្មណ៍សប្បាយចិត្តដូចប្រជាពលរដ្ឋខ្មែរយើងដទៃទៀតដែរណា ព្រោះខ្ញុំបានជួបគ្រួសារខ្ញុំវិញ។ »
ងាកទៅកាន់ទីស្នាក់ការសមាគមន៍អាដហុកឯណោះវិញ មន្ត្រីសមាគមអាដហុកទាំង៤រូប បានជួបជុំអ្នកធ្វើការជាមួយខ្លួន និងបានធ្វើសន្និសិទកាសែត ដើម្បីថ្លែងអរគុណទៅដល់គ្រប់ស្ថាប័នពាក់ព័ន្ធ ដែលតែងគាំទ្រខ្លួនតាំងពីដើមរហូតមកដល់ពេលនេះ។
មន្ត្រីអាដហុក លោក យី សុខសាន្ត មានប្រសាសន៍ថា លោកអរគុណជាខ្លាំងចំពោះសារព័ត៌មាន អង្គការ សមាគមន៍ជាតិអន្តរជាតិ អង្គទូតទាំងអស់ និងប្រជាពលរដ្ឋដែលនៅគាំទ្រពួកលោករហូតមកដល់ពេលនេះ។ លោកថា លោកមានក្តីសង្ឃឹមពីការដោះលែងនេះ ហើយថានេះ ទំនងជាធ្វើឡើងគឺបន្ទាប់ពីអគ្គរដ្ឋទូតសហរដ្ឋអាមេរិកបានទៅជួបជាមួយនាយករដ្ឋមន្ត្រីដោយផ្ទាល់ក្នុងសប្តាហ៍នេះ។ លោក យី សុខសាន្ត ក៏បានស្នើថា កុំដោយសារនយោបាយរវាងមនុស្សពីរនាក់ ធ្វើឲ្យមានពលរដ្ឋរងគ្រោះ និងចលាចលនៅទូទាំងប្រទេសនេះបន្តទៀត។
លោកថា៖ «ល្ងាចមិញ ខ្ញុំគ្មានសង្ឃឹមថា ខ្ញុំមានសេរីភាពទេ ហើយមន្ត្រីពន្ធនាគារម្នាក់គាត់ប្រាប់ខ្ញុំថា ពូគេឲ្យពូចេញហើយតែខ្ញុំមិនចង់ជឿរទេ ប៉ុន្តែនៅពេលដែលគេនាំខ្ញុំទៅស្លៀកពាក់ និងចេញមក ខ្ញុំថាអូនគេឲ្យខ្ញុំមានសេរីភាពហើយ។…បន្ទាប់ពីខ្ញុំទទួលពត៌មានថា ឯកអគ្គរដ្ឋទូតសហរដ្ឋអាមេរិក ទៅជួបជាមួយសម្តេច ថាប្រហែលជាឲ្យមានការបោះឆ្នោតសេរីនឹងយុត្តិធម៌ លើកស្ទួយសិទ្ធិមនុស្ស ហើយមានការធ្វើពាណិជ្ជកម្មរួមគ្នា ខ្ញុំគិតថា ប្រាកដជាមានចំណុចណាមួយដែលអាចនាំឲ្យជជែកគ្នាឲ្យខ្ញុំបាននៅក្រៅឃុំ»។
ចំពោះលោក ណៃ វង់ដា មានប្រសាសន៍ថា លោកក៏ស្ទើតែមិនជឿរថា លោកអាចមានសេរីភាពពេលនេះទេ ដោយលោកបដិសេធមិននិយាយអ្វីបន្ថែមទេ ទាក់ទងនឹងការដោះលែងនៅពេលនេះទេ។
លោកថា៖ «ជារួម ខ្ញុំមានការត្រេកអរ និងថ្លែងអំណរគុណដល់អ្នកសារព័ត៌មានទាំងអស់ អង្គការសង្គមស៊ីវិល បងប្អូននិងប្រជាពលរដ្ឋ ដែលបានទាមទារអត់ឈប់អត់ឈរដល់ការដោះលែង ហើយក៏សុំអរគុណដល់អ្នកដែលបានដោះលែងផងដែរ ដល់រដ្ឋាភិបាល តុលាការ ព្រោះគាត់យល់ថា ពួកយើងអត់មានកំហុសបានដោះលែង។ … ខ្ញុំមិនចង់និយាយអីវែងឆ្ងាយទៀតទេ ព្រោះឥឡូវនេះ ជាពេលវេលាសប្បាយជួបជុំបងប្អូនប្រពន្ធកូន រឿងអ្វីផ្សេងទៀតសុំមិនទាន់និយាយពេលហ្នឹងទេសុំអធ្យាស្រ័យ»។
ឯកមកលោកស្រី លឹម មុនី ឲ្យដឹងថាលោកស្រី មិននឹកស្មានថា អ្វីដែលលោកស្រីធ្វើការតាមវិជ្ជាជីវៈរបស់ខ្លួននេះ ត្រូវបានរដ្ឋាភិបាលចាប់យកទៅដាក់ពន្ធនាគារនោះទេ តែទោះជាយ៉ាងណា លោកស្រីនៅតែមានសង្ឃឹមពីសេរីភាព ថ្វីបើមិនទាន់មានការបង្ហាញពេលវេលាជាក់លាក់។
លោកស្រីថា៖ «ខ្ញុំគិតថា ការងារខ្ញុំដែលជួយសង្គម បានច្រើនជាការងារដែលជួយស្ត្រីបានច្រើន ហើយកន្លងមកដែលខ្ញុំជាប់ឃុំ ជាងមួយឆ្នាំនេះ ខ្ញុំតែតែគិតដល់គាត់គ្រប់ពេលវេលា ចំពោះជនរងគ្រោះខ្លះដែលខ្ញុំមិនទាន់ជួយដល់គាត់ខ្ញុំនៅតែគិតពីគាត់ ហើយខ្ញុំសង្ឃឹមថា ទង្វើររបស់ខ្ញុំនឹងអាចជួយឲ្យខ្ញុំមានសេរីភាពវិញនៅពេលណាមួយ ហើយនៅពេលនេះ ក៏ជាលទ្ធផលមួយតាមការំពឹងទុក ក៏ប៉ន្តែទៅមុខទៀតមិនដឹងជាយ៉ាងមិច! »។
អ្នកនាំពាក្យសមាគមអាដហុក លោក សំ ចាន់គា ថាលោកក៏មានការភ្ញាក់ផ្អើលដូចអ្នកដែលជាប់ឃុំទាំង៥នាក់នោះដែរ ដោយថា សមាគមព្យាយាមដាក់ពាក្យសុំឲ្យនៅក្រៅឃុំនេះចំនួន៥លើកពីមុន គឺត្រូវបានតុលាការបដិសេធជានិច្ច តែការដាក់ពាក្យនៅក្រៅឃុំលើកចុងក្រោយនេះ ត្រូវបានតុលាការយល់ព្រម។
លោកយល់ មានប្រសាសន៍ថា ការដោះលែងនេះ អាចមកពីតុលាការមើលឃើញពីការលំបាក និងសុខភាពរបស់អ្នកជាប់ឃុំទាំង៥នាក់។ បើតាមលោក សំ ចាន់គា រហូតមកដល់ពេលនេះ អ្នកទាំង៤នាក់ ត្រូវបានអនុញ្ញាតឲ្យសម្រាក និងតាមដានសុខភាពជាមុនសិន មុនអនុញ្ញាត្តិឲ្យចូលធ្វើការវិញ។
លោកថា៖ «យើងអត់ទាន់ច្បាស់ទេ ចាំមើលប្រជុំនៅគណៈគ្រប់គ្រង តើយើងមានលទ្ធភាពប៉ុណ្ណា យើងនឹងមើលពេទ្យខាងក្នុងស្រុកហ្នឹងថា មានលទ្ធភាពប៉ុណ្ណាដែល ប្រសិនជាត្រូវបញ្ជូនចេញព្យាបាលនៅខាងក្រៅយើងនឹងបញ្ជូនទៅក្រៅបាទ!…សុខភាពដែលខ្សោយជាងគេគឺលោក នី សុខា និងលោក យី សុខសាន្ត ឯលោក ណៃ វ៉ង់ដា ខ្សោយដែរ ជាក់ស្តែងពេលចេញសវនាការនៅតុលាការកំពូល លោកមិនអាចអង្គុយបានផង ប្រហែលជាចំណុចហ្នឹងហើយ ដែលតុលាការមើលឃើញនឹងឲ្យពួកគាត់ចេញក្រៅ»។
មន្ត្រីការពារសិទ្ធិមនុស្សសមាគមអាដហុក និងអគ្គលេខាធិការរងគ.ជ.ប ទាំង៥នាក់នោះ ត្រូវតុលាការសម្រេចឃុំខ្លួនបណ្តោះអាសន្ននៅពន្ធនាគារព្រៃសជាងមួយឆ្នាំហើយ ដោយតុលាការចោទប្រកាន់ពីបទ «សូកប៉ាន់សាក្សី» ទាក់ទិនសំណុំរឿងដ៏ចម្រោងចម្រាស់ជាមួយនឹងកញ្ញា ខុម ចាន់តារាទី ហៅ “ស្រីមុំ”។ ហើយបើតាមមេធាវីការពារក្តី តុលាការ ហាក់នៅមិនទាន់រកមិនឃើញភស្តុតាងគ្រប់គ្រាន់ ដើម្បីដាក់បន្ទុកនិងកាត់ទោសនៅឡើយ។
ក្រោយមានការឃុំខ្លួនអ្នកទាំង៥ ស្ថាប័នជាតិនិងអន្តរជាតិជាច្រើន បានប្រតិកម្មនិងទទូចឲ្យមានការដោះលែងអ្នកទាំងនោះនាក់ជាបន្ទាន់ ដោយពួកគេចាត់ទុកថា ការបន្តឃុំខ្លួននេះ ជាការរំលោភសិទ្ធិមនុស្សយ៉ាងធ្ងន់ធ្ងរ និងជាចេតនានយោបាយ៕
