រដ្ឋាភិបាលកម្ពុជាថាវិស័យសំណង់ ទេសចរណ៍ និងអចលទ្រព្យ នៅក្នុងឆ្នាំ២០១៧នេះបានថយចុះ ខណៈដែលវិស័យកសិកម្មហាក់បានងើបឡើងវិញបន្ទាប់ពីវិស័យនេះស្ទើតែគ្មានកំណើនសោះក្នុងរយៈពេលឆ្នាំ៣ឆ្នាំចុងក្រោយ។
ក្នុងការវាយតម្លៃកំណើនសេដ្ឋកិច្ចកម្ពុជាឆ្នាំ២០១៧ ក្រសួងសេដ្ឋកិច្ចបានប៉ានប្រមាណថាកំណើនសេដ្ឋកិច្ចកម្ពុជាអាចរក្សាបានក្នុងរង្វង់ ៧,០%។ ការរក្សាបានកំណើននេះដោយសារតែ វិស័យឧស្សាហកម្មដែលនៅតែបន្តដើរតួនាទីជាក្បាលម៉ាស៊ីនជំរុញកំណើនសេដ្ឋកិច្ច ដឹកមុខដោយវិស័យកាត់ដេរ និងការរីកធំធាត់នៃវិស័យមិនមែនកាត់ដេរ ហើយវិស័យកសិកម្មនៅឆ្នាំ២០១៧នេះមានកំណើនល្អដោយសារអាកាសធាតុ និងការងើបឡើងនៃតម្លៃទំនិញ។
ក្រសួងបានវាយតម្លៃថា វិស័យសេវាកម្មអាចនិងមានកំណើនយីតជាងឆ្នាំមុន ដោយសារការថមថយនៃវិស័យទេសចរណ៍ និងអចលនទ្រព្យ ចំណែកឯវិស័យសំណង់ដែលធ្លាប់តែកើនឡើងនោះក្រសួងមើលឃើញថាមានការថយចុះនៅឆ្នាំ២០១៧នេះ។
បើទោះបីជាយ៉ាងណាក្រសួងនៅតែអះអាងថា ផលិតផលសរុបក្នុងស្រុកក្នុងឆ្នាំ២០១៧នេះ អាចនឹងកើនឡើងដល់២២,២ពាន់លានដុល្លារ ដែលធ្វើឲ្យចំណូលប្រចាំឆ្នាំរបស់ប្រជាជនកម្ពុជាម្នាក់បាន១ ៤៣៤ដុល្លា ដែលកើនពី ១ ១៥៨ដុល្លានៅឆ្នាំ២០១៦៕