ក្រសួងពាណិជ្ជកម្មអំពាវនាវទៅប្រជាពលរដ្ឋកុំបារម្ភថាខ្វះអង្ករហើយចាញ់បោកជនឱកាសនិយមមួយចំនួនទៅទិញអង្ករថ្លៃខុសតម្លៃទីផ្សារ បន្ទាប់ពីមានព័ត៌មាននៃការរីករាលដាលនៃវីរុសកូវីដ-១៩(COVID-19)។
ក្រសួងពាណិជ្ជកម្មបានបង្ហោះសេចក្តីប្រកាសព័ត៌មាននៅលើហ្វេសប៊ុករបស់ខ្លួន កាលពីម្សិលមិញថា ដោយសារព័ត៌មាននៃការរីករាលដាលជំងឺឆ្លងកូវីដ-១៩(COVID-19)ធ្វើឲ្យប្រជាពលរដ្ឋមានការព្រួយបារម្ភថា កម្ពុជាអាចនឹងជះឥទ្ធិពលលើតម្លៃស្បៀងអាហារ ជាពិសេសឈ្មួញមួយចំនួនបានតម្លើងថ្លៃអង្ករ។
ករណីនេះ ក្រសួងបានបញ្ជាក់ប្រាប់ប្រជាពលរដ្ឋកុំឲ្យព្រួយបារម្ភថា កម្ពុជាខ្វះអង្ករសំរាប់ផ្គត់ផ្គង់ក្នុងស្រុក ពីព្រោះសហព័ន្ធស្រូវអង្ករកម្ពុជា និងក្រុមហ៊ុនហ្គ្រីនត្រដ នៃក្រសួងពាណិជ្ជកម្ម មានអង្ករគ្រប់គ្រាន់សំរាប់ផ្គត់ផ្គង់ទាំងនៅក្នុងស្រុក និងសំរាប់នាំចេញទៅក្រៅប្រទេស រហូតដល់រដូវប្រមូលផលខាងមុខផងដែរ។
លើសពីនេះទៀត ដើម្បីបញ្ចៀសកុំឲ្យឈ្មួញតម្លើងថ្លៃអង្ករ សហព័ន្ធស្រូវអង្ករកម្ពុជា និងសហការជាមួយក្រុមហ៊ុនហ្គ្រីនត្រដ នៃក្រសួងពាណិជ្ជកម្ម លក់អង្ករក្នុងតម្លៃសមរម្យ នៅទីតាំងផ្សេងៗគ្នា ចាប់ពីថ្ងៃទី៩ ខែមីនា ឆ្នាំ២០២០នេះ។
ទីតាំងទាំងនោះរួមមាន ស្ថិតផ្ទះលេខ ៦៥-៦៧-៦៩ ផ្លូវ១៣៦ សង្កាត់ផ្សារកណ្តាល១ ភ្នំពេញ និងទីតាំងមួយទៀត ស្ថិតនៅផ្លូវជាតិលេខ៥ ភូមិស្ពានខ្ពស់ សង្កាត់គីឡូម៉ែត្រលេខ៦ ខ័ណ្ឌឬស្សីកែវ ភ្នំពេញ រួមទាំងក្រុមហ៊ុនមេគង្គអូរីហ្សា ក្រុមហ៊ុនអេមរ៉ូរាយ ក្រុមហ៊ុនបៃតងកម្ពុជា ក្រុមហ៊ុនខ្មែរហ្វូតគ្រុប រោងម៉ាស៊ីនវង្សប៊ុនហេង អៀង ហ៊ាង និងរោងម៉ាស៊ីនហាក់ សែន ជាដើម។
កាលពីថ្ងៃ៥ ខែមីនា ក្រសួងសុខាភិបាលកម្ពុជាបានដាក់មនុស្ស៤នាក់នៅខេត្តសៀមរាប ស្ថិតនៅក្នុងការតាមដានបន្ទាប់ពីរកឃើញថាមានទំនាក់ទំនងជិតស្និទ្ធជាមួយជនជាតិជប៉ុនម្នាក់ដែលរកឃើញថាមានកូវីដ-១៩ (COVID-19)។ ដោយឡែក មនុស្សប្រមាណ ៤០នាក់ប៉ះពាល់ប្រយោល ក៏ត្រូវដាក់ឱ្យនៅដាច់ដោយឡែកចំនួន ១៤ថ្ងៃ និងតាមដានសុខភាព បើមានចេញរោគសញ្ញាត្រូវយកវត្ថុវិភាគជាបន្ទាន់។
កាលពីម្សិលមិញក្រសួងសុខាភិបាលបានប្រកាសថាក្នុងចំណោមមនុស្សទាំង៤នាក់ មានបុរសជនជាតិខ្មែរម្នាក់មានផ្ទុកកូវីដ-១៩។ ក្រោយពីរកឃើញករណីនេះ រដ្ឋាភិបាលបានសម្រេចបិទសាលាទូទាំងក្រុងសៀមរាប និងលុបចោលកម្មវិធីអង្គរសង្រ្កាន្តផងដែរ ដើម្បីបញ្ចៀសពីការរីករាលដាលនៃវីរុសនេះ៕
