Voice of Democracy

តើការលើកព្រះនាមសម្ដេច សីហនុ ក្នុងសាលាក្ដីជាការបំពានរដ្ឋធម្មនុញ្ញដែរឬយ៉ាងណា?

ដោយ នួន បូរិន ថ្ងៃពុធ ទី15 កុម្ភៈ ឆ្នាំ2012 ម៉ោង11:50

នៅក្នុងសប្ដាហ៍នេះ ព្រះនាមរបស់អតីតព្រះមហាក្សត្រកម្ពុជា ព្រះបាទ នរោត្តម សីហនុ ត្រូវបានលើកមកនិយាយជាសាធារណៈនៅក្នុងសវនាការ នៃសាលាក្ដីខ្មែរក្រហម ដែលក្នុងនោះសហព្រះរាជអាជ្ញាបរទេសបានដកស្រង់សម្តីរបស់លោក ខៀវ សំផន អំពីទំនាក់ទំនងរវាងសម្ដេច សីហនុ, ប៉ុល ពត និងលោក ជូ អេនឡាយ (Zhou Enlai) អតីតនាយករដ្ឋមន្ត្រីនៃសាធារណរដ្ឋប្រជាមានិតចិន នៅចុងទសវត្សឆ្នាំ១៩៦០ ។ ប៉ុន្តែ ឯកសារដាក់បង្ហាញនោះ ត្រូវបានអះអាងថា សម្ដេចព្រះបាទ នរោត្ដម សីហនុ បានពាក់ព័ន្ធនឹងការស្លាប់របស់អតីតកម្មាភិបាលជាន់ខ្ពស់ ២រូប ក្នុងសម័យខ្មែរក្រហម គឺលោក ហ៊ូ យន់ និង ហ៊ូ នឹម។

យោងតាមរដ្ឋធម្មនុញ្ញកម្ពុជា ស្ដីពីព្រះមហាក្សត្រ ត្រង់មាត្រា៧ បានចែងថា ព្រះមហាក្សត្រ ទ្រង់គ្រងរាជសម្បតិ្ត ប៉ុន្តែទ្រង់មិនកាន់អំណាចឡើយ។ ព្រះមហាក្សត្រទ្រង់ជាព្រះប្រមុខរដ្ឋ មួយជីវិត។ អង្គព្រះមហាក្សត្រ មិនអាចនរណា រំលោភបានឡើយ។ ហើយសំរាប់អតីតព្រះមហាក្សត្រព្រះបាទ នរោត្តម សីហនុ ក៏មានច្បាប់ពិសេសមួយការពារបុព្វសិទ្ធរបស់ព្រះអង្គដែរ។ ប៉ុន្តែកន្លងមក គេនៅតែឃើញនិងលឺ ព្រះនាមព្រះអង្គ ត្រូវបានគេយកមកនិយាយ នៅក្នុងសាលាក្ដីខ្មែរក្រហម គឺដូចខាងលើនេះ ដែលករណីនេះ ធ្វើអោយមានចំណោទមួយសួរថា តើការលើកយកព្រះនាមរបស់ព្រះអង្គមកចោទសួរដូចនេះ ជាការប៉ះពាល់ធ្ងន់ធ្ងរនឹងរដ្ឋធម្មនុញ្ញកម្ពុជាដែរឬទេ?

ស្តាប់សម្លេង៖

ករណីនេះ ត្រូវបានអ្នកវិភាគ គិតថា ជាការប៉ះពាល់មួយដ៏ធ្ងន់ធ្ងររបស់ព្រះនាមរបស់ព្រះអង្គ ដែលត្រូវការពារដោយរដ្ឋធម្មនុញ្ញកម្ពុជា ប៉ុន្តែអ្នកវិភាគខ្លះគិតថា ជាសិទ្ធិរបស់សាលាក្ដី ព្រោះគេថា វិធានរបស់សាលាក្ដីនេះ ចែងមិនច្បាស់ត្រង់ចំនុចមួយដែលថា តើនាមរបស់មេដឹកនាំកំពូល កម្ពុជា គួរត្រូវបាន យកមកនិយាយ ឬក៏ត្រូវអនុញ្ញាតអោយលោកឡើង?

លោក ជាម យៀប សមាជិកសភាម្នាក់នៃគណបក្សកំពុងគ្រប់គ្រងអំណាច គិតថា ករណីយកព្រះនាមព្រះមហាក្សត្រ យកមកលាតត្រដាងជាសាធារណៈ ហើយមានពាក្យពេជន៍ខ្លះថា ព្រះអង្គមានជាប់ករណីខ្មែរក្រហមទៀតនោះ គឺជាប្រការមួយគួរថ្កោលទោស ព្រោះលោកគិតថា ជាការរំលោភលើរដ្ឋធម្មនុញ្ញកម្ពុជា ៖ “អ្នកដែលបានលើកហ្នឹង គឺថាពិសេសបើមិនថាខ្មែរ គឺគាត់ប៉ះពាល់ទៅដល់កិត្តិយសរបស់ព្រះមហាក្សត្រ ឬអ្វីផ្សេងទៀតដែលច្បាប់រដ្ឋធម្មនុញ្ញហាមឃាត់។”

សំរាប់លោក ជាម យៀប គិតថា ករណីនេះឧទ្ទកាល័យព្រះបរមរាជវាំង គួរតែមានប្រតិកម្មជាផ្លូវការ។

នៅក្នុងសវនាការកាលពីថ្ងៃអង្គារ ទី១៤ ខែកុម្ភៈ សាលាក្ដីខ្មែរក្រហម បានលើកឡើងត្រង់ចំនុចមួយ ហើយការលើកព្រះនាម របស់ព្រះបាទ នរោត្តម សីហនុ ដោយបានស្រង់សំដីរបស់អតីតប្រមុខរដ្ឋក្នុងរបបខ្មែរក្រហម គឺជនត្រូវចោទ ខៀវ សំផន មកធ្វើសំអាង។

នៅក្នុងឯកសារខ្សែភាពយន្ត ដែលអតីតប្រមុខរដ្ឋក្នុងរបបកម្ពុជាប្រជាធិបតេយ្យ លោក ខៀវ សំផន បានផ្តល់បទសម្ភាសន៍ជាមួយអ្នកកាសែតបរទេសមួយរូប ដែលត្រូវបានលើកមកចាក់បញ្ចាំងនៅក្នុងអង្គសវនាការ លោក ខៀវ សំផន មានប្រសាសន៍ថា នៅពេលដែលសហរដ្ឋអាមេរិចទំលាក់គ្រាប់បែកនៅកម្ពុជា គឺមានកងកម្លាំងចំនួនពីរ ដែលប្រឆាំងនឹងសហរដ្ឋអាមេរិកនោះ គឺកម្លាំងរបស់សម្តេចសីហនុ ដែលមិនមានអាវុធ និងកងកម្លាំងរបស់ខ្មែរក្រហម ដែលមានបំពាក់អាវុធ។

ករណីនេះត្រូវបានអ្នកវិភាគឯករាជ្យម្នាក់ គឺបណ្ឌិត សុខ ទូច គិតថាទំនងប្រហែលជាមានភាពខ្វះចន្លោះ នៃច្បាប់របស់សាលាក្ដីខ្មែរក្រហមនេះ ហើយបានជាមានការលើកយកព្រះនាមរបស់អតីតព្រះមហាក្សត្រ ដែលការពារដោយច្បាប់កំពូលរបស់កម្ពុជា ៖ “ពីព្រោះលក្ខណរបស់យើង គឺដាក់ទំលាក់អ្នកដឹកនាំកំពូលៗ ហើយកំពូលហ្នឹងអត់បញ្ជាក់ទៀត ថាកំពូលអី? អាហ្នឹងហើយ ការចែងលក្ខខណ្ឌនេះ មិនទាន់បានសុក្រឹត្យភាព តុលាការគឺអនុវត្តទៅតាមអ្វីដែលមាន យល់ព្រមទៅលើទ្វាភាគីដែលមានកម្ពុជា និងសាលាកូនកាត់ហ្នឹងឯង។”

បើតាមឯកសារនានា រកឃើញថា អតីតព្រះមហាក្សត្រ ធ្វើជាប្រមុខរដ្ឋរបស់របបកម្ពុជាប្រជាធិបតេយ្យបានមួយរយៈខ្លី ក៏ព្រះអង្គសំរេចលាលែង ដោយព្រះអង្គមិនអាចទ្រាំធ្វើប្រមុខរដ្ឋប្រទេសមួយ ដែលយកប្រជាជនខ្លួនឯងជាទាសករ។ ហើយក្រោយមក ទើបបក្សកុម្មុយនិស្តខ្មែរ លើកលោក ខៀវ សំផន អោយធ្វើប្រមុខរដ្ឋជំនួសព្រះអង្គ។

តែបើយ៉ាងនេះក្ដី អតីតព្រះមហាក្សត្រ ព្រះបាទ នរោត្តម សីហនុ បានបោះពុម្ភផ្សាយមួយដែរនូវសៀវភៅប្រវត្តិសាស្ត្រខ្មែរក្រហម ដោយដាក់ចំនងជើងថា អ្នកទោសខ្មែរក្រហម ។

នៅក្នុងសៀវភៅនេះ ព្រះអង្គបានលើកឡើងជាច្រើន ពីទុក្ខសោករបស់រាជវង្សរបស់ព្រះអង្គ ដោយព្រះអង្គមានបន្ទូលថា សូម្បីញាតិវង្សរបស់ព្រះអង្គ ក៏ត្រូវខ្មែរក្រហមធ្វើគត់ដែរ។

ប៉ុន្តែ លោកមេធាវី សុក សំអឿន ជានាយកប្រតិបត្តិនៃក្រុមអ្នកច្បាប់ការពារសិទិ្ធកម្ពុជា បានពន្យល់ថា ការលើកឡើងព្រះនាម របស់ព្រះបាទ នរោត្តម សីហនុ គឺជាការឆ្លុះបញ្ចាំង ពីអ្វីកើតមាន នៅក្នុងរបបខ្មែរក្រហម ហើយថា ជាការពិត គឺជាការការពារកិត្តិយសរបស់ព្រះអង្គទៅវិញ ៖ “រឿងរ៉ាវដែលកើតឡើងក្នុងសម័យខ្មែរក្រហម ព័ត៌មានខ្លះអាចធ្វើឲ្យប្រជាជន លែងសង្ស័យទៅលើព្រះវីរក្សត្រទៅវិញទេ ហើយបើក្នុរករណីបែបហ្នឹង តើវាជាការប៉ះពាល់ ឬជាការ ការពារ?”

នៅមុនសវនាការលើរបបខ្មែរក្រហម ចាប់ផ្ដើមគេបានឃើញ គេហទំព័ររបស់អតីតព្រះមហាក្សត្រ បានចុះផ្សាយថា ព្រះអង្គមានហឬទ័យ ចង់បំភ្លឺការជាប់ពាក់ព័ន្ធរបស់ព្រះអង្គជាមួយនឹងរបបខ្មែរក្រហម ប៉ុន្តែក្រោយមកព្រះអង្គមាន បន្ទូលថា សាលាក្ដីនេះនឹងមិនមានអត្ថប្រយោជន៍សំរាប់យុត្តិធម៌ជូនជនរងគ្រោះទេ ហើយមិនត្រូវចំណាយប្រាក់ដោយឥតប្រយោជន៍នោះទេ គឺយកប្រាក់នោះ មកជួយរាស្ត្រគឺប្រសើរជាង៕

ផ្ញើពត៌មាននេះ