Voice of Democracy

ការអភិវឌ្ឍន៍នៅក្នុងរាជធានីភ្នំពេញ រដ្ឋាភិបាលមិនគិតលើផលប៉ះពាល់រយៈពេលវែង និងយល់ខុស!

ដោយ អៀត ដារ៉ាវុធ ថ្ងៃសុក្រ ទី17 កុម្ភៈ ឆ្នាំ2012 ម៉ោង14:39

កាលពីថ្ងៃទី២២ ខែវិច្ឆិកា ឆ្នាំ២០១០ ជាថ្ងៃពិធីបុណ្យអុំទូកបញ្ចប់ មានមនុស្ស ៣៥៣នាក់ស្លាប់ និងរាប់រយនាក់ទៀតបានរងរបួស ដោយសារតែជាប់គនៅលើគ្នា។ ការស្លាប់និងរបួសនេះ លោកនាយករដ្ឋមន្ត្រី ហ៊ុន សែន បានប្រកាសថា ជាការទទួលខុសត្រូវរួម មិនមែនអ្នកណាម្នាក់ត្រូវបានដាក់ទោសទេ។

ទោះជាមានការស្លាប់មនុស្សច្រើនបែបនេះមែន ប៉ុន្តែអ្នកវិភាគ និងអ្នកនយោបាយមួយចំនួន មើលឃើញថា ការអភិវឌ្ឍន៍រាជធានីបច្ចុប្បន្ន នៅតែបង្កើតកំហុសតាមរយៈការបណ្តោយ ឲ្យមានសាងសង់អាគារខ្ពស់ៗ នៅតាមសួនច្បារ និងផ្លូវសាធារណៈជាដើម។ ដូចជានៅពេលបច្ចុប្បន្ននេះ មានផ្លូវមួយទៀតដែលមានទទឹង៤០ម៉ែត្រ នៅខាងកើតក្រសួងការបរទេស ដែលតភ្ជាប់ពីផ្លូវសុធារស រហូតដល់ផ្លូវអមដៃព្រែកបាសាក់ ត្រង់ចំណុចស្ពានពេជ្រនៃតំបន់កោះពេជ្រ ក្នុងសង្កាត់ទន្លេបាសាក់ ខណ្ឌចំការមន ត្រូវបានគេសាងសង់អាគារបិទផ្លូវ។

ស្តាប់សម្លេង៖

អ្នកស្រាវជ្រាវឯករាជ្យ លោក កែម ឡី បានបង្ហាញថា សំណង់អាគារខ្ពស់ៗ បានដុះឡើងដូចផ្សិត នៅកណ្តាលរាជធានីភ្នំពេញ ប៉ុន្តែរាល់ការសាងសង់ទាំងនោះ រដ្ឋាភិបាលមិនបានសិក្សាអំពីផលប៉ះពាល់ឲ្យបានវែងឆ្ងាយទេ គឺពឹងផ្អែកទៅលើតែការសិក្សារបស់ក្រុមហ៊ុន ដែលចង់កេងផលពីការវិនិយោគរបស់ពួកគេតែប៉ុណ្ណោះ។ លោក កែម ឡី បង្ហាញថា នៅប្រទេសម៉ាឡេស៊ី និងប្រទេសអភិវឌ្ឍន៍ដទៃទៀត គេមិនដែលសង់អាគារខ្ពស់ មណ្ឌលពាណិជ្ជកម្ម ឬកន្លែងប្រជុំធំៗរបស់រដ្ឋាភិបាល ដូចកម្ពុជាទេ ហើយថាបើគេចង់បង្កើតអ្វីទាំងនោះ គឺគេត្រូវបង្កើតក្រុងរណបមួយ ដែលអាចធ្វើឲ្យប្រជាពលរដ្ឋរកប្រាក់បានកាន់តែច្រើនតាមរយៈសេវាដឹកជញ្ជូន។ លោក កែម ឡី បានបញ្ជាក់ថា ក្នុងរយៈពេល៥ទៅ១០ឆ្នាំ ខាងមុខរាជធានី នឹងជាកន្លែងកកស្ទះចរាចរណ៍ខ្លាំងបំផុត ៖ "ខ្ញុំមិនដែលឃើញរបកគំហើញស្តីអំពីផលប៉ះពាល់ជាវិជ្ជមាន ឬអវិជ្ជមានមកលើផែនការអភិវឌ្ឍន៍រូបវន្តហ្នឹងវែងឆ្ងាយទេ កាលណាគាត់ចង់ធ្វើកន្លែងណា គាត់ធ្វើការសិក្សាផលប៉ះពាល់កន្លែងហ្នឹងតិចទៅ ហើយផលប៉ះពាល់របស់គាត់ហ្នឹង គឺមិនមានការសិក្សាតាមស្ថាប័នឯករាជ្យទេ ច្រើនតែក្រុមហ៊ុនហ្នឹងគាត់មានលុយជួលអ្នកសិក្សាស្រាវជ្រាវ ហ្នឹងហើយដែលធ្វើអោយមានផលវិបាកនៅក្នុងការអភិវឌ្ឍន៍កន្លងមក"។

នៅក្នុងរាជធានីភ្នំពេញបច្ចុប្បន្ន មានផ្លូវតូចៗ និងមានអាគារទំនើបៗ ជាច្រើន។ អាគារខ្លះ ត្រូវបានគេសាងសង់នៅលើសួនច្បារសាធារណៈ និងលើផ្លូវសាធារណៈ។

បណ្ឌិតផ្នែកវិទ្យាសាស្ត្រនយោបាយ លោក សុខ ទូច ក៏អធិប្បាយមិនខុសពីអ្នកវិភាគដទៃទៀតដែរ។ លោកមើលឃើញថា វិបត្តិរាជធានី នឹងកើតមានកាន់តែអាក្រក់ទៅៗ។ លោកបានលើកឧទាហរណ៍ថា ផ្លូវកកស្ទះជារៀងរាល់ថ្ងៃ ពិសេសពេលមានអគ្គីភ័យ និងពេលមានពិធីប្រជុំធំៗរបស់រដ្ឋាភិបាល ចរាចរណ៍កាន់តែកកស្ទះខ្លាំងថែមទៀត។ លោកបន្តថា រាជធានីភ្នំពេញ គួរតែរក្សារចនាបទចាស់ ហើយថាបើចង់សាងសង់អាគារខ្ពស់ៗទំនើបៗ គឺមានតែរដ្ឋាភិបាលបង្កើតក្រុងរណប ៖ "ថ្មីៗហ្នឹង យើងឃើញអាគារមួយដែរនៅលើសួនច្បារដែរ របស់កូរ៉េ ឃើញកំពុងដាក់ជួលជាប៊ូរ៉ូអញ្ចឹង អាហ្នឹងហើយដែលវាបាត់បង់នូវសោភណ្ឌភាពទីក្រុង ហើយទីក្រុងវាលែងទៅជាទីក្រុងស្ថាបត្យកម្ម វាទៅជាទីក្រុងចំរុះពណ៌ដូចសួនច្បារដែលមានពណ៌ចំរុះអញ្ចឹង នៅជិតជុំវាំងអីក្តីហ្នឹង ថាមើលខាងត្រើយម្ខាងហ្នឹងវាលប់ហើយ វាបិទខ្យល់មុខវាំងហ្នឹងបាត់ហើយ អញ្ចឹងគេអាចសាងសង់បែបណាដែលមិនអោយបាត់បង់នូវស្ថាបត្យកម្មរបស់វាំង ប៉ុន្តែបាត់តាំងពីសោភណ្ឌភាពស្អីៗហ្នឹង"។

សម្រាប់អ្នកតំណាងរាស្រ្តគណបក្សសមរង្ស៊ី លោក សុន ឆ័យ វិញ មានប្រសាសន៍ថា រដ្ឋាភិបាលយល់ខុស ពីការអភិវឌ្ឍន៍ក្រុង ដោយខំប្រឹងផ្ញុកឲ្យមានការសាងសង់អាគារខ្ពស់ និងសំណង់ទំនើបៗនៅក្នុងរាជធានី ដោយថែមទាំងមានការដេញប្រជាពលរដ្ឋឲ្យចេញទៅនៅជាយក្រុង។ លោក សុន ឆ័យ បន្តថា ការអភិវឌ្ឍន៍ក្រុងបែបនេះ មិនមែនសម្រាប់បំរើផលប្រយោជន៍សាធារណៈទេ ផ្ទុយទៅវិញ គឺធ្វើឡើងដោយសារតែអំពើពុករលួយតែប៉ុណ្ណោះ។ ទាក់ទងនឹងការសង់អាគារបិទផ្លូវដែលមានទទឹង៤០ម៉ែត្រ នៅខាងកើតក្រសួងការបរទេសវិញ លោក សុន ឆ័យ មានប្រសាសន៍ថា ៖ "ការប្រើប្រាស់សិទ្ធផ្លូវថ្នល់ ដើម្បីនឹងធ្វើសំណង់ ឬក៏បិទដើម្បីផលប្រយោជន៍ជាឯកជនណាមួយ ហើយដែលអាចប៉ះពាល់ទៅដល់សន្តិសុខនៃការធ្វើដំណើរនេះ វាត្រូវតែមានវិធានការទប់ស្កាត់ ហើយយើងនឹងពិនិត្យទៅលើស្ថានភាពហ្នឹង ហើយនិងធ្វើការសួរដេញដោលជាបន្ទាន់ ដើម្បីធ្វើយ៉ាងម៉េចទប់ស្កាត់ពីដើមទីទៅ ព្រោះយើងឃើញហើយសំណង់ខុសច្បាប់ និងការលួចយកដីផ្លូវទៅធ្វើសំណង់ជាច្រើនកើតនៅរាជធានីភ្នំពេញនេះ គឺធ្វើដោយមានការស៊ុំកាលុម"។

នៅក្នុងការអភិវឌ្ឍន៍រាជធានីនេះ លោកបណ្ឌិត សុខ ទូច បានលើកទឡហីករណ៍ថា ៖ "សូម្បីតែមន្ទីរបញ្ចកោណដែលជាមន្ទីរទំនើបរបស់សហរដ្ឋអាមេរិកហ្នឹង ក៏គេអត់អោយធ្វើខ្ពស់ជាងផ្ទះសដែរ ព្រោះវា បើអ្នកឯងចង់ធ្វើខ្ពស់អ្នកឯងទៅញ៉ូយកទៅ"។

ផ្ញើពត៌មាននេះ