Voice of Democracy

តើការប្តឹងលើស្រ្តីតំណាងរាស្ត្របក្សប្រឆាំង រឿងរំដោះអ្នកភូមិបុរីកីឡាផ្អែកលើច្បាប់អ្វី?

ដោយ អ៊ឹង ប៊ុនថន ថ្ងៃច័ន្ទ ទី20 កុម្ភៈ ឆ្នាំ2012 ម៉ោង09:55

borikila-khorn ការប្តឹងលើតំណាងរាស្ត្រគណបក្សប្រឆាំង ពីបទរំដោះអ្នកភូមិបុរីកីឡានោះ ត្រូវបានអ្នកច្បាប់និងអ្នកវិភាគបញ្ហាសង្គម ចាត់ទុកថា ជារឿងនយោបាយ ហើយមិនមានច្បាប់ណាអាចយកទៅដាក់ទោស ស្រ្តីអ្នកតំណាងរាស្ត្ររូបនេះបានទេ។

ក្រុមអ្នកវិភាគនិងអ្នកច្បាប់ដែលសំឡេងប្រជាធិបតេយ្យ បានសម្ភាសន៍នៅថ្ងៃសុក្រ ទី១៧ ខែកុម្ភៈ ឆ្នាំ២០១២នេះ បានអះអាងប្រហាក់ប្រហែលគ្នាថា ករណីលោកស្រី មួរ សុខហូរ ដែលរងការប្តឹងពីសំណាក់ប្រធានមណ្ឌលសង្គមកិច្ចព្រៃស្ពឺ ពីបទរំដោះអ្នកភូមិក្នុងជម្លោះដីធ្លី ចេញពីមណ្ឌលសង្គមកិច្ចដែលជាកន្លែងសម្រាប់ដាក់មនុស្សវិកលចរិត និងមនុស្សអណាថាគ្មានទីលំនៅពិតប្រាកដនោះ។

នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា មានប្រសាសន៍ថា បើប្រធានមជ្ឈមណ្ឌលនោះចោទប្រកាន់អ្នកតំណាងរាស្ត្រ ពីបទរំដោះពលរដ្ឋ នោះមានន័យថា ប្រធានមជ្ឈមណ្ឌលនោះទទួលស្គាល់ថា ខ្លួនពិតជាបានឃុំខ្លួនពលរដ្ឋមែន។ តែលោកមេធាវី សុក សំអឿន បានចោទសួរថា បើការឃុំខ្លួននោះមិនមានដីកាពីតុលាការទេដូចនេះ ការដែលពលរដ្ឋនាំគ្នាឡើងរបងចេញពីមណ្ឌលដោយខ្លួនឯងមិនចាត់ទុកថា ជាការំដោះពលរដ្ឋនោះទេ ៖ “បើសិនជាការឃុំខ្លួននោះវាអត់ស្របច្បាប់ អញ្ចឹងក៍គ្មានការរត់គេចដែរ លើកលែងតែការឃុំខ្លួនហ្នឹងវាស្របច្បាប់ ហើយនិយាយរួមទៅ ឃុំខ្លួនបណ្តោះអាសន្ន មានតែចៅក្រមស៊ើបសួរទេដែលអាចអោយបញ្ជាអោយឃុំខ្លួនបាន”។

ស្តាប់សម្លេង៖

អ្នកវិភាគនយោបាយឯករាជ្យ លោកបណ្ឌិត សុខ ទូច មានប្រសាសន៍ថា ការចោទនណារម្នាក់ថាបានរំដោះមនុស្សនៅក្នុងមណ្ឌលរបស់ខ្លួន លុះត្រាអ្នកនោះ មានមធ្យោបាយដូចជា វាយកំទេចរបងមជ្ឈមណ្ឌល លើកកំលាំងទ័ពទៅរំដោះ ឬមធ្យោបាយផ្សេងទៀត ដើម្បីអោយអ្នកនៅក្នុងមណ្ឌលនោះ ឡើងចេញមកក្រៅទើបជាការរំដោះ។ លោកថា បើករណីបុគ្គលណាមួយគ្រាន់តែទៅសួរភាគីពាក់ព័ន្ធរកឯកសារច្បាប់ ក្នុងការឃុំឬឃាត់ខ្លួនពលរដ្ឋ ហើយពលរដ្ឋនោះធ្វើសកម្មភាពឡើងរបងដោយខ្លួនឯង លោកចាត់ទុកថា មិនមែនជាបទល្មើសរំដោះពលរដ្ឋនោះទេ ៖ "ប្រសិនជា មួរ សុខហួរ ឬក៏គណបក្សណាមួយ ប្រជាជនក៏ដោយ គណបក្សប្រឆាំងក៏ដោយ ខ្ញុំអត់និយាយអារឿងគណបក្សយកមកលាយឡំទេ ដោយគាត់បានបញ្ចុះជណ្តើរ គាត់បានយកឡានតូច ឬក៏គាត់យកឡានស្អី ហើយធ្វើជាចរន្តណាមួយ ធ្វើអោយអ្នកនោះរត់រួច អាហ្នឹងបានហៅរំដោះ បើគ្រាន់តែទៅសំរាប់សួររកផ្លូវច្បាប់ ផ្លូវអី ខ្ញុំជឿជាក់ថា អាហ្នឹងមិនមែនហៅរំដោះទេ ការរកខុសត្រូវតាមប្រព័ន្ធច្បាប់”។

បច្ចុប្បន្ននេះលោកស្រី មូរ សុខហួរ មិនទាន់ទទួលបានអភ័យឯកសិទ្ធិពីសភាមកវិញទេ បើទោះជាលោកស្រីត្រូវបានរដ្ឋសភា កាត់ប្រាក់ខែគ្រប់ចំនួន បង់ជំងឺចិត្តទៅឲ្យលោកនាយករដ្ឋមន្រ្តីហ៊ុន សែន និងកាត់ប្រាក់ខែសម្រាប់បង់ពិន័យចូលរដ្ឋ ទៅតាមសាលក្រមរបស់សាលាដំបូងរាជធានីភ្នំពេញ ពីបទបរិហារកេរ្តិ៍លោកនាយករដ្ឋមន្រ្តី ហ៊ុន សែន ក៏ដោយ។

ចំណែកប្រធានមជ្ឈមណ្ឌលសិទ្ធិមនុស្សកម្ពុជា និងជាអ្នកវិភាគព្រឹត្តិការណ៍សង្គមផងនោះ លោក អ៊ូ វីរៈ មានប្រសាសន៍ថា លោកមានការព្រួយបារម្ភ ករណីនេះ ខណៈប្រព័ន្ធតុលាការនៅកម្ពុជាមិនឯករាជ្យ។ លោក អ៊ូ វីរៈ ចាត់ទុកថា ការប្តឹងរបស់មន្រ្តីរដ្ឋាភិបាលទៅលើមន្រ្តីគណបក្សសមរង្ស៊ី នៅពេលនេះ ថាជាការគំរាមកំហែង ស្របពេលការបោះឆ្នោតសំខាន់ៗ ចូលមកដល់។ ៖ “បើសិនជាតុលាការយើងឯករាជ្យ ពាក្យបណ្តឹងបែបហ្នឹងអត់មានអីខុសទេ តាមពិតនោះ ជាទូទៅនៅប្រទេសណាក៏ដោយ ក៏គេមានសិទ្ធប្តឹងដែរ ប៉ុន្តែការប្តឹងនេះ ខ្ញុំមើលទៅ យើងយល់ថា ពិបាកក្នុងការទុកចិត្តទៅលើតុលាការហើយ អញ្ចឹងការប្តឹងមួយនេះ វាអាចមានរូបភាពគំរាមកំហែងទៅលើគណបក្សប្រឆាំង”។

កាលពីថ្ងៃទី១៨ ខែមករា ឆ្នាំ២០១២ អតីតអ្នកភូមិបុរីកីឡា ចំនួន២០នាក់ រួមទាំងកុមារ២នាក់ផង បាននាំគ្នាផ្លោះរបងចេញពីមណ្ឌលសង្គមកិច្ចព្រៃស្ពឺ ខណៈតំណាងរាស្ត្រ២រូបមកពី គណបក្សប្រឆាំងសមរង្ស៊ី គឺលោកស្រី មួរ សុខហួរ និងលោក សុវណ្ណ វិសាខា ទៅសួរនាំរឿងចាប់ខ្លួនអ្នកភូមិបុរីកីឡា ទៅឃុំដោយមិនមានដីកាបង្គាប់ពីតុលាការ។ ករណីនេះ កាលពីថ្ងៃព្រហស្បតិ៍សប្តាហ៍មុន លោក វ៉ាន់ ងាត ប្រធានមណ្ឌលសង្គមកិច្ចព្រៃស្ពឺនេះ បានដាក់ពាក្យបណ្តឹងទៅតុលាការដោយចោទថា អ្នកតំណាងរាស្ត្រទាំងនោះ រំដោះអ្នកភូមិបុរីកីឡាចេញពីកន្លែងដែលខ្លួនកំពុងគ្រប់គ្រង៕

ចែករំលែកព័ត៌មាននេះ