Voice of Democracy

តើកម្ពុជាទុកអោយអោយលោក សម រង្ស៊ី នៅក្រៅប្រទេសរហូត រឺយ៉ាងណា?

ដោយ នួន បូរិន ថ្ងៃពុធ ទី22 កុម្ភៈ ឆ្នាំ2012 ម៉ោង13:20

SRP_picture_from_CamNews ក្រុមគណបក្សប្រឆាំងនៅកម្ពុជា នៅក្នុងសប្ដាហ៍នេះបានកំពុងតែស្វែងរកមធ្យោបាយមួយ ដើម្បីអោយលោក សម រង្ស៊ី បានវិលចូលកម្ពុជាវិញអោយបានមុនការបោះឆ្នោតក្រុមប្រឹក្សាឃុំសង្កាត់ ដែលនឹងចូលមកដល់នៅប៉ុន្មានខែទៀតនេះ។

ដូចកាលពីថ្ងៃអង្គារ ទី២១ ខែកុម្ភៈនេះ ប្រធានក្រុមអ្នកតំណាងរាស្ត្រគណបក្សសមរង្ស៊ី គឺលោក សុន ឆ័យ បានជួបនៅក្រុងភ្នំពេញជាមួយសមាជិកព្រឹទ្ធសភាអាមេរិកម្នាក់ ដែលកំពុងធ្វើទស្សនកិច្ច គឺលោកស្រី នីគី ធីស៊ុងហ្គាស ។

ក្នុងជំនួបនេះ លោក សុន ឆ័យ បានស្នើអោយអាមេរិកជួយអន្តរាគមន៍អោយ លោក សម រង្ស៊ី បានវិលចូលកម្ពុជាវិញ ប្រយោជន៍ដើម្បីជាការពង្រឹងលទិ្ធប្រជាធិបតេយ្យនៅកម្ពុជា ដែលជំនួបនេះធ្វើអោយអ្នកតំណាងរាស្ត្រ បក្សប្រឆាំងរូបនេះ សង្ឃឹមថា ប្រធានគណបក្សរបស់ខ្លួននឹងបានវិលចូលកម្ពុជាវិញ។

ស្តាប់សម្លេង៖

ប៉ុន្តែសំរាប់អ្នកវិភាគនយោបាយនៅកម្ពុជា យល់ថា បើលោក សម រង្ស៊ី មិនអាចវិលចូលកម្ពុជា អោយទាន់មុនការបោះឆ្នោតនោះ មានន័យទីលានប្រកួតប្រជាធិបតេយ្យនៅកម្ពុជាមិនត្រូវបានគេទទួលស្គាល់ថា មានភាពស្មើគ្នានោះទេ នោះបើគេនិយាយពីយុត្តិធម៌របស់អ្នកកីឡា។

លោកស្រី ជា វណ្ណាត អ្នកវិភាគឯករាជ្យម្នាក់មានទស្សនៈយល់ឃើញដូចនេះ ៖”ប្រទេសយើងនៅមិនទាន់មានទំនុកចិត្តថា មិនទាន់ស្គាល់លក្ខណៈមានការប្រណាំងប្រជែង ស្មើភាពគ្នា សុខចិត្តយកសំលេងប្រជាពលរដ្ឋ ដើម្បីធ្វើជាទិសដៅក្នុងការដឹកនាំស្រុក យើងមិនទាន់មានភាព ចាស់ទុំ នៅឡើយ ដូចថាយើងមិនទាន់ច្បាស់ ក្នុងខ្លួនជឿជាក់ជាក់ក្នុងខ្លួន ម្ល៉ោះហើយប្រណាំងប្រជែង មិនមានប្រណាំងប្រជែង ដោយយុត្តិធម៌ដោយត្រឹមត្រូវនៅឡើយទេ”។

យ៉ាងហោចណាស់ លោក សម រង្ស៊ី ត្រូវបានសម្របសម្រួលខាងនយោបាយ មិនតិចជាង ៤ដងទេ បើគេរាប់តាំងពីគាត់មានជម្លោះនយោបាយ ជាមួយលោក ហ៊ុន សែន និងជំលោះខាងប្រព័ន្ធតុលាការ។

លោកស្រី ជា វណ្ណាត បានដាស់តឿនអោយកម្ពុជាធ្វើជាគំរូភូមា គឺមិនត្រូវអោយភូមា ធ្វើគំរូសំរាប់កម្ពុជានោះទេ។ លោកស្រី ជា វណ្ណាត គិតថាប្រទេសភូមាបោះជំហ៊ានលឿនជាងកម្ពុជាមួយកំរិត ហើយបើគេនិយាយពីប្រព័ន្ធប្រជាធិបតេយ្យរបស់ប្រទេស ដែលធ្លាប់គ្រប់គ្រងដោយពួកយោធា ដែលខណៈនេះ មេដឹកនាំបក្ស ប្រឆាំងគឺលោកស្រី អ៊ុង សានស៊ូជី មិនត្រឹមមានសេរីភាពនោះទេ គឺមានសកម្មភាពធ្វើនយោបាយឡើងវិញទៀតផង។

ប៉ុន្តែលោក សុខ ទូច បណ្ឌិតវិទ្យាសាស្ត្រនយោបាយ ដែលគេស្គាល់ថា ជាអ្នកភាគឯករាជ្យម្នាក់ដែរនោះ គិតថា ជាការពិត ការប្រកួតប្រជែងក្នុងការបោះឆ្នោត គឺត្រូវមានអ្នកកីឡាខ្លាំងមកប្រកួតទើបពេញចិត្តអ្នកទស្សនា ដូចករណីលោក សម រង្ស៊ី ជាដើម។ តែលោកថា លោក សម រង្ស៊ី គួរមានឆន្ទៈវិលចូលកម្ពុជាវិញ ដោយភាពក្លាហាន ដោយហ៊ានប្រថុយនឹងទោស ព្រោះលោកគិតថា ករណីរបស់ប្រធានគណបក្សប្រឆាំងគឺជារឿងនយោបាយ។ លោក សុខ ទូច បានបង្ហាញការវិភាគរបស់លោកដូចនេះ ៖”យើងថាទិដ្ឋភាពនយោបាយ យើងត្រូវតែដឹង បើយើងដើរជាអ្នកនយោបាយ គេមិនដែលចាប់យើងក្រៅតែពីទិដ្ឋភាពនយោបាយទេ អញ្ចឹងយើងត្រូវប្រើប្រាស់យន្តការណា ដែលគេចផុត អំពីការដែលគេចាប់អូស អូសដំណើរក្នុងវិស័យនយោបាយហ្នឹង"។

លោក សម រង្ស៊ី មានទោស ៩ឆ្នាំ ករណីដែលគាត់ទៅដកតម្រុយបង្គោលព្រំដែន ជាមួយប្រទេសវៀតណាម ។

សំរាប់លោកបណ្ឌិត ឡៅ ម៉ុងហៃ ជំរុញអោយមេធាវីរបស់ លោក សម រង្ស៊ី ពន្លឿនករណីកូនក្ដីរបស់ខ្លួន អោយបានលឿន ព្រោះលោកថា វាជាករណីនយោបាយ ខណៈតុលាការកម្ពុជា មិនទាន់មានភាពឯករាជ្យ ក្នុងករណីរបស់អ្នកនយោបាយ ៖ ”នេះគឺច្បាប់ខ្មែរក៏ដឹងហើយ ក៏ដឹងដែរថាតុលាការហ្នឹងអត់ទាន់មានឯករាជ្យភាព ឬក៏រួចចាក់ពីការគៀបសង្កត់ផ្នែកនយោបាយ អាហ្នឹងក៏គាត់គង់តវ៉ាតាំងពីអើយមក”។

ក្រោយពីជំនួបជាមួយអ្នកតំណាងរាស្ត្របក្សប្រឆាំងនៅកម្ពុជា លោកស្រី គឺនីគី ធីស៊ុងហ្គាស សមាជិកព្រឹទ្ធសភាអាមេរិក មានប្រសាសន៍ថា លោកយកករណីនេះ ទៅសិក្សា ហើយស្វែងរកជួបគ្នាជាមួយលោក សម រង្ស៊ី នៅពេលខាងមុខនេះ ៖”អ្វីដែលដែលជាក្ដីបារម្ភរបស់គណបក្សសមរង្ស៊ីសំរាប់ខ្ញុំ ខ្ញុំព្យាយាមសិក្សាអំពី ដំនោះស្រាយនេះ ខ្ញុំទទួលយកវាជាបញ្ហាចំបង ។ ខ្ញុំនឹងអញ្ចើញគាត់ទៅ រដ្ឋម៉ាសាឈូសេតនៅពេលមួយ ក្នុងខែមេសា ខ្ញុំនឹងមើលកាលវិភាគខ្ញុំ ដើម្បីជួបគាត់ ខ្ញុំបានសិក្សាពី បញ្ហានេះមួយឆ្នាំរួចមកហើយ ឥឡូវកំពុងតែចាំមើលលទ្ធផល”។

បើទោះជាយ៉ាងណា កាលពីថ្ងៃទី២០ ខែកុម្ភៈ លោក សម រង្ស៊ី ខ្លួនលោកផ្ទាល់បានសរសេរលិខិតជូនទៅមេដឹកនាំពិភពលោកចំនួន ២១ប្រទេស មានទាំងប្រធានាធិបតី នាយករដ្ឋមន្ត្រី និងអគ្គលេខាធិការអង្គការសហប្រជាជាតិ អោយជួយអន្តរាគមន៍ អោយរូបលោកបានវិលចូលកម្ពុជាវិញ នោះបើសិនជាអស់លោកយល់ឃើញថា ត្រូវពង្រឹងលទិ្ធប្រជាធិបតេយ្យនៅកម្ពុជា ជាបន្តទៀតហើយ ការអំពាវនាវរបស់មេបក្សប្រឆាំងរូបនេះ គឺជួនពេលដែលមេដឹកនាំពិភពលោកនឹងមកប្រជុំនៅកម្ពុជា នៅខែវិច្ឆិកា ឆ្នាំ២០១២ នេះ ដែលករណីនេះ ហើយធ្វើអោយអ្នកវិភាគខ្លះ មានសុទិដ្ឋិនិយមថា ទំនងជាឱកាសល្អអោយលោក សម រង្ស៊ី មកកម្ពុជា វិញបាននៅពេលនោះ៕

ផ្ញើពត៌មាននេះ