Voice of Democracy

ក្រុមសិទ្ធិមនុស្សជម្រុញឲ្យតុលាការចាត់ការដោយឯករាជ្យរឿងមន្រ្តីបៀតបៀនកេរ្តិ៍ភេទស្រ្តីរត់តុ

ដោយ កែវ រតនៈ និង អ៊ឹង ប៊ុនថន ថ្ងៃពុធ ទី22 កុម្ភៈ ឆ្នាំ2012 ម៉ោង11:56

អង្គការសិទ្ធិមនុស្ស និងសហជីពដែលធ្វើការជាមួយស្ត្រីផ្សព្វផ្សាយស្រាបៀរ ជំរុញឲ្យតុលាការខេត្តបន្ទាយមានជ័យ ធ្វើការដោយឯករាជ្យ ករណីបណ្តឹងរបស់ស្រ្តីអ្នករត់តុម្នាក់ នៅភោជនីយដ្ឋានស្ទឹងសែន ខេត្តបន្ទាយមានជ័យ ដែលប្តឹងមន្រ្តីនៅខេត្តនោះ ពីបទបៀតបៀនកេរ្តិ៍ខ្មាស់។

ការជំរុញនេះ ធ្វើឡើងបន្ទាប់ពីសមាគមការពារសិទ្ធិមនុស្សអាដហុក ទទួលបានលិខិតមួយច្បាប់កាលថ្ងៃអង្គារម្សិលមិញនេះ ដែលមានខ្លឹមសារថា លោក ហ៊ុន សាន ប្រធានគ្រប់គ្រងរដ្ឋបាលនៃសហគ្រាសសាធារណៈភ្នាក់ងារកម្ពុជានាវាចរណ៍ ហៅកាត់ (កាំសាប) និងជាបងបង្កើតរបស់លោកនាយករដ្ឋមន្រ្តី ហ៊ុន សែន បានសុំឲ្យលោកព្រះរាជអាជ្ញាតុលាការខេត្តបន្ទាយមានជ័យ លោក ផាន់ សុវណ្ណរ័ត្ន បិទបញ្ចប់សំណុំរឿងបៀតបៀនកេរ្តិ៏ភេទ របស់ស្រ្តីអ្នករត់តុម្នាក់ឈ្មោះ ហ៊ី ធាវី នោះ។

ស្តាប់សម្លេង៖

ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា បានប្រាប់សំឡេងប្រជាធិបតេយ្យថា ប្រសិនបើតុលាការទទួលសម្ពាធពីមន្រ្តីអ្នកមានអំណាចមែននោះ នឹងធ្វើឲ្យករណីដើមបណ្តឹងជាស្ត្រី ជាជនរងគ្រោះនឹងមិនទទួលបានយុត្តិធម៌ ពីប្រព័ន្ធតុលាការទេ ៖” ការពិតវាអញ្ចឹងហើយ ត្រង់ហ្នឹងហើយយើងមិនចង់អោយមានឥទ្ធិពល ពីខាងក្រៅ មកលើប្រព័ន្ធតុលាការ ព្រោះកាលណាមានមក វាត្រូវតែមានយកទៅលើការសំរេចចិត្តឯករាជ្យរបស់ចៅក្រម និងព្រះរាជអាជ្ញា ទៅដល់កិត្តិនាមប្រព័ន្ធតុលាការជាតិ “។

អនុប្រធានសហព័ន្ធសហជីពកម្មករ ចំណីអាហារ និងសេវាកម្មកម្ពុជា លោកស្រី ទេព ផល្លីន ដែលធ្វើការជាមួយស្រ្តីផ្សព្វផ្សាយស្រាបៀរ មានប្រសាសន៍ថា ការចេញលិខិតសុំអន្តរាគមន៍ពីមន្រ្តីមានអំនាចលើប្រព័ន្ធតុលាការនេះនឹងធ្វើឲ្យនារីអ្នករត់តុ ដែលរងគ្រោះការបៀតបៀនកេរ្តិ៍ខ្មាស់ កាន់តែមានការភ័យខ្លាច និងរងគ្រោះមួយកំរិតទៀត។ លោកស្រីអំពាវនាវឲ្យតុលាការខេត្តបន្ទាយមានជ័យធ្វើការដោយឯករាជ្យ បើទោះជាមានការអន្តរាគមន៍ពីភាគីអ្នកមានអំណាចក៏ដោយ ៖” ខ្ញុំគិតថាអ្វី ដែលជាបញ្ហាសំខាន់ វាអាចធ្វើអោយសាមីជនរងគ្រោះ គាត់មានអារម្មណ៍ភ័យខ្លាចទៅលើសុវត្ថិភាព នេះជារឿងចំបងរបស់គាត់ពេលដែលឃើញថា មានអ្នកមានអំនាចនៅពីក្រោយខ្នង អញ្ចឹង ចង់មិនចង់ក៏សាមីខ្លួនមាន អារម្មណ៍ រអាដែរ មួយវិញទៀតអាចធ្វើអោយសាមី ខ្លួន ដកខ្លួនដោយឯកឯងនៅ ពេលដែលគាត់ទៅអោយព្រះ រាជអាជ្ញាដកបណ្ដឹងអាជ្ញាចោល"។

នៅថ្ងៃនេះសំឡេងប្រជាធិបតេយ្យ មិនអាចទាក់ទងព្រះរាជអាជ្ញាសាលាដំបូងខេត្តបន្ទាយមានជ័យ លោក ផាន់ សុវណ្ណរ័ត្ន ដើម្បីអត្ថាធិប្បាយពីចំណាត់ការរបស់តុលាការ ស្តីពីករណីនេះនៅឡើយទេ។

យោងតាមលិខិតរបស់ លោក ហ៊ុន សាន បងប្រុសបង្កើតឲ្យលោកនាយករដ្ឋមន្រ្តី ហ៊ុន សែន ដែលសមាគមអាដហុកទទួលបាននោះ បានសំដៅដល់បណ្ដឹងបៀតបៀនកេរ្តិ៏ភេទ តាមបណ្ដឹងរបស់ស្ត្រីរត់តុ ម្នាក់ឈ្មោះ ហ៊ី ធាវី អាយុ២៥ឆ្នាំ ដែលប្ដឹងភ្ញៀវ ២នាក់ ឈ្មោះ អ៊ុំ សុជាតិ ប្រធានសាខាមជ្ឈមណ្ឌលកំចាត់មីនកម្ពុជាប្រចាំខេត្តបន្ទាយមានជ័យ និងឈ្មោះ ថុង ពិសិដ្ឋ ជាពាណិជ្ជករ ដោយចោទប្រកាន់ទាក់ទងនឹងការលូកស្ទាបរាងកាយនាង នៅពេលដែលកំពុងតែបម្រើ ភេសជ្ជះ នៅហាងបៀរហ្គាឌិន មួយកន្លែង ក្នុងក្រុងសេរីសោភ័ណ្ឌ កាលពីខែវិច្ឆិកា ឆ្នាំ២០១១កន្លងទៅ។ លិខិតរបស់លោក ហ៊ុន សាន បានសុំឲ្យព្រះរាជអាជ្ញាបញ្ចប់រឿងក្តីនេះ ដោយអះអាងថា បុរសពីរនាក់ដែលរងការចោទប្រកាន់នោះ មិនបានប្រព្រឹត្តិខុសច្បាប់ទេ៕

ផ្ញើព័ត៌មាននេះ