Voice of Democracy

អ្នកគ្រូបង្រៀនម្នាក់នៅខេត្តសៀមរាប រងការចោទថា ធ្វើទារុណកម្មលើកូនសិស្ស

ដោយ បូ សាវី និង អ៊ឹង ប៊ុនថន ថ្ងៃពុធ ទី22 កុម្ភៈ ឆ្នាំ2012 ម៉ោង15:29

អ្នកគ្រូបង្រៀនម្នាក់ នៃសាលាបឋមសិក្សាបន្ទាយចាស់ ក្នុងសង្កាត់ស្លក្រាម ក្រុងសៀមរាប រងការចោទប្រកាន់ពីអាណាព្យាបាលសិស្សថាបានសំឡុត បំបាក់ស្មារតី និងធ្វើទារុណកម្មកូនគាត់ ដោយសារតែកូនសិស្សស្រី អាយុ ៦ឆ្នាំរូបនោះ មិនចេះលំហាត់មេរៀនដែលគ្រូដាក់ឲ្យ។

អ្នកស្រី លីន ណា រស់នៅភូមិចុងកៅស៊ូ សង្កាត់ស្លក្រាម ត្រូវជាម្ដាយកុមារីរងគ្រោះ បានប្រាប់សំលេងប្រជាធិបតេយ្យទាំងទឹកមុខក្រៀមក្រំ នៅព្រឹកថ្ងៃពុធនេះថា កូនរបស់គាត់មានឈ្មោះ សោម ពេជ្រចរណៃ អាយុ៦ឆ្នាំ រៀនថ្នាក់ទី១(ខ) នៃសាលាបឋមសិក្សាបន្ទាយចាស់ ត្រូវបានអ្នកគ្រូបង្រៀនវាយនឹងបន្ទះឈើ ហើយបង្ខាំងទុកក្នុងថ្នាក់រៀនមិនអោយចេញលេង ឬមិនចង់អោយចេញមកផ្ទះ ដោយសារកូនរបស់គាត់មិនចេះអានអក្សរ។

អ្នកស្រីអះអាងថា កូនរបស់គាត់មានការភ័យខ្លាចនិងតក់ស្លុត មិនចង់ទៅរៀនទៀតទេ ព្រោះតែទង្វើរបស់គ្រូបង្រៀនម្នាក់នោះ ៖ "

កុមារី សោម ពេជ្រចរណៃ បានរៀបរាប់ថា អ្នកគ្រូឈ្មោះ ទេស សុភ័ក្រ បានទាញសក់របស់នាង ដើម្បីបង្វិលមុខអោយមើលក្ដារខៀន និងបានវាយនាង៣រំពាត់ កាលពីរសៀលថ្ងៃអង្គារម្សិលមិញ ហើយគំរាមថា បើសិស្សណាមិនចេះអានអក្សរ គឺអ្នកគ្រូមិនអោយចេញលេងខាងក្រៅថ្នាក់ទេ ៖ "

អ្នកគ្រូ ទេស សុភ័ក្រ ដែលរងការចោទប្រកាន់នេះ មិនអាចសុំការឆ្លើយបំភ្លឺបានទេ។ ពាក់ព័ន្ធទៅនឹងករណីនេះ លោក ជូ សុទ្ធា នាយកសាលាបឋមសិក្សាបន្ទាយចាស់បដិសេធថា លោកមិនបានដឹងពីបញ្ហានេះទេ។ តែលោកថា បើសិនជា មានការវាយធ្វើបាបសិស្សឬគំរាមកំហែងពីលោកគ្រូអ្នកគ្រូមែននោះ លោកនឹងមានវិធានការហៅគ្រូមកធ្វើការអប់រំ។

ដោយឡែកប្រធានមន្ទីរអប់រំ យុវជន និងកីឡាខេត្ដសៀមរាប លោក អ៊ុង សេរីឌី មានប្រសាសន៍ថា ប្រសិនមានលោកគ្រូអ្នកគ្រូបានប្រព្រឹត្តដូចការចោទប្រកាន់ពីអាណាព្យាបាលសិស្សមែន នាយកសាលាត្រូវរាយការណ៏ ឬទៅមន្ទីរអប់រំដើម្បីងាយស្រួលដោះស្រាយតាមផ្លូវច្បាប់ ពីព្រោះគ្រូបង្រៀនត្រូវគោរពក្រមសីលធម៌ជាគ្រូ ៖ "

លោក រ៉ុង ឈុន ប្រធានសមាគមគ្រូបង្រៀនឯករាជ្យ បានមានប្រសាសន៍ថា ទង្វើរបស់គ្រូបង្រៀនធ្វើមកលើសិស្សនេះ គឺជាកំហុសដ៏ធ្ងន់ធ្ងរ បើទោះបីសិស្សបានធ្វើខុសយ៉ាងណាក៏ដោយ។

កាលពីថ្ងៃទី១០ ខែធ្នូ ឆ្នាំ២០១១ កន្លងទៅ អង្គការផ្លែនអន្តរជាតិកម្ពុជានៅខេត្តសៀមរាប បានបើកយុទ្ធនាការមួយដែលមានសិស្សានុសិស្សចូលរួមចំនួន១២៥០នាក់ ដើម្បីលើកកំពស់ប្រសិទិ្ធភាពការអប់រំ ដោយមិនឲ្យប្រើអំពើហឹង្សា ឬធ្វើទារុណកម្មទៅលើកុមារ នៅតាមសាលារៀន គេហដ្ឋាន សហគមន៏ ដោយមានកាន់បដាពាក្យស្លោកជាច្រើន ដែលមានអត្ថន័យថា បើខ្ញុំធ្វើខុសសូមជួយណែនាំជំនួសការវាយដំឬស្ដីបន្ទោសអោយខ្ញុំ គ្រួសារមានអំពើហឹង្សា គឺនាំអោយបាត់បង់សុភមង្គល ”កុមារល្អត្រូវស្ដាប់ដំបូន្មានឪពុកម្ដាយ លោកគ្រូអ្នកគ្រួ” ៕

ចែករំលែកព័ត៌មាននេះ