Voice of Democracy

អ្នកវិភាគៈ ការពន្យាកិច្ចប្រជុំម្ចាស់ជំនួយដល់ឆ្នាំ២០១៤នឹងធ្វើឲ្យកម្ពុជាឃ្លាតឆ្ងាយពីដៃគូអភិវឌ្ឍន៍

ដោយ ម៉ម មុនីរតន៍ និងអ៊ឹង ប៊ុនថន ថ្ងៃពុធ ទី22 កុម្ភៈ ឆ្នាំ2012 ម៉ោង17:07

មន្រ្តីសង្គមស៊ីវិល និងអ្នកវិភាគបញ្ហាសង្គម និយាយថា ការដែលរដ្ឋាភិបាលកម្ពុជា សម្រេចពន្យាពេលកិច្ចប្រជុំនៃប្រទេសម្ចាស់ជំនួយ រហូតដល់ឆ្នាំ២០១៤ ខាងមុខទៀតនោះ ថានឹងធ្វើឲ្យប្រទេសកំពុងអភិវឌ្ឍន៍មួយនេះ បាត់បង់ការជឿទុកចិត្តពីប្រទេសដៃគូរអភិវឌ្ឍន៍ ដោយព្រមាន លំហូរនៃថវិកា ដែលធ្លាប់ផ្តល់ឲ្យកម្ពុជា អាចនឹងត្រូវធ្លាក់ទៅប្រទេសភូមាវិញ។

នៅក្នុងជំនួបបិទទ្វារដ៏កម្រមួយរវាងក្រុមអង្គការសង្គមស៊ីវិល និងប្រមុខរដ្ឋាភិបាលកម្ពុជា នៅវិមានសន្តិភាព រាជធានីភ្នំពេញ កាលពីថ្ងៃសុក្រ ទី១៧ ខែ កុម្ភៈ កន្លងទៅនេះ មានសេចក្តីរាយការណ៍ថា លោកនាយករដ្ឋមន្រ្តី ហ៊ុន សែន បានសម្រេចពន្យាពេលកិច្ចប្រជុំ ជាមួយក្រុមប្រទេសម្ចាស់ជំនួយ ក្នុងរយៈពេល ២ឆ្នាំខាងមុខទៀត ព្រោះតែវិបត្តិបំណុលរបស់ប្រទេសក្នុងសហគមន៍អឺរ៉ុប ដែលជាបណ្តុំនៃប្រទេសម្ចាស់ជំនួយសម្រាប់កម្ពុជា។

ស្តាប់សម្លេង៖

លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា និងជាអ្នកវិភាគព្រឹត្តិការណ៍សង្គម ព្រមានថា ក្នុងរយៈពេល ២ឬ៣ឆ្នាំ ខាងមុខទៀត ប្រទេសផ្តល់ជំនួយ អាចនឹងដកសេចក្តីទុកចិត្តពីប្រទេសកម្ពុជា ដោយងាកទៅរកប្រទេសភូមាវិញ។ លោកថា កន្លងមក ក្រុមប្រទេសអ្នកផ្តល់ជំនួយ ដូចជាប្រទេសអង់គ្លេស ជាដើម ត្រូវបោះបង់ការផ្តល់ជំនួយសម្រាប់កម្ពុជា ដោយសារកម្ពុជាយឺតយ៉ាវក្នុងការកែទម្រង់ប្រព័ន្ធគ្រប់គ្រង ពិសេសអំពើពុករលួយ ៖ "បើសិនជាប្រទេសកម្ពុជានៅតែបង្ហាញថា គ្មានឆន្ទៈក្នុងការកែទម្រង់ក្នុងវិស័យចាំបាច់សំខាន់មួយចំនួនទេ អាហ្នឹងទេ គឺម្ចាស់ជំនួយអាចជ្រើសរើស ដកថវិកាចេញពីប្រទេសកម្ពុជា ទៅប្រទេសភូមា និងប្រទេសផ្សេងទៀត ព្រោះអីខ្ញុំមើលទៅពីដើមមកយើងឃើញថា ជំនួយពីអង់គ្លេស ជំនួយពីនីដា គឺសុទ្ធតែបានដកដោយសារមានបញ្ហាទាំងអស់នេះ ដែលពួកគាត់មានការតឹងចិត្ត"។

ប្រទេសកម្ពុជា ធ្លាប់បានរៀបចំវេទិកា រវាងរដ្ឋាភិបាល និងម្ចាស់ជំនួយ ព្រមទាំងដៃគូអភិវឌ្ឍន៍ រៀងរាល់១៨ខែម្តង ដើម្បីពិនិត្យមើលពីយន្តការអនុវត្ត កំណែទម្រង់វិស័យសំខាន់ៗ ដូចជាអភិបាលកិច្ចល្អ និងលទ្ធិប្រជាធិបតេយ្យជាដើម ដែលបានព្រមព្រៀងគ្នាកន្លងមក។

លោក កែម ឡី អ្នកស្រាវជ្រាវឯករាជ្យជាន់ខ្ពស់ ហៅការពន្យាពេលនៃកិច្ចប្រជុំ ជាមួយប្រទេសម្ចាស់ជំនួយដែលមិនធ្លាប់មាននេះថា ជាផ្នែកមួយដែលផលប៉ះពាល់ធ្ងន់ធ្ងរ ជាប្រព័ន្ធនៃគំរោងរបស់រដ្ឋាភិបាល និងក្រុមអង្គការសង្គមស៊ីវិល ដែលអាចឈានទៅរកការផ្តាច់ជំនួយទាំងស្រុង ក្នុងពេលខាងមុខ ៖ "បើរដ្ឋាភិបាលលប់កិច្ចប្រជុំដៃគូរអភិវឌ្ឍន៍ហ្នឹង បានន័យថា លុយកម្ចីនឹងកើនឡើង ហើយជាពិសេសគឺមកពីប្រទេសកុម្មុយនីស្ត ចំនុចសំខាន់បំផុតគឺវាធ្វើអោយមានផលប៉ះពាល់ដល់គំរោងមួយចំនួន ដែលត្រូវបន្ត ឧទាហរណ៍ កិច្ចប្រជុំហ្នឹង មានលុយមួយចំណែកធំ ផ្តល់មករដ្ឋាភិបាល លុយមួយចំណែកធំ ផ្តល់ទៅអង្គការក្រៅរដ្ឋាភិបាល ហើយលុយមួយចំណែកទៀតផ្តល់ទៅអ្នករងគ្រោះ គេហៅថា Community base organization តែម្តង"។

យ៉ាងនេះក្តី នៅក្នុងកិច្ចប្រជុំ កាលពីថ្ងៃសុក្រចុងសប្តាហ៍មុន មានសេចក្តីរាយការណ៍ថា លោកនាយករដ្ឋមន្រ្តី ហ៊ុន សែន ថ្លែងនៅចំពោះមុខអង្គការសង្គមស៊ីវិលថា ប្រសិនបើប្រទេសម្ចាស់ជំនួយ កាត់បន្ថយជំនួយសម្រាប់កម្ពុជាមែននោះ លោកថា រដ្ឋាភិបាលរបស់លោកនឹងធ្វើការតែជាមួយដៃគូជាបុគ្គលវិញ ជាជាងការរៀបចំឲ្យមានជាវេទិកានេះឡើងវិញ។

រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន មានប្រសាសន៍ថា ការពន្យាពេលកិច្ចប្រជុំជាមួយប្រទេសអ្នកផ្តល់ជំនួយនេះ ពុំមែនជាឧបសគ្គ និងភាពខ្មៅងងឹត សម្រាប់ក្រុមប្រទេសអ្នកផ្តល់ជំនួយនោះទេ។ លោកបន្តថា តែផ្ទុយមកវិញ វាបានបន្ធូរបន្ថយភាពស្មុគស្មាញ ដល់ដៃគូអភិវឌ្ឍន៍ទាំងនោះ ខណៈវិបត្តិបំណុលកំពុងតែបន្តគំរាមកំហែងធ្ងន់ធ្ងរនោះ ៖ "ដែលកំពុងនិងជួបវិបត្តិហិរញ្ញវត្ថុ ដូច្នេះហើយកម្ពុជា ឆ្លើយតបនឹងស្ថានភាពបែបនេះ ដូច្នេះកម្ពុជានៅតែរក្សានូវការគោរព នៃការពិបាកនៃប្រទេសជាដៃគូរនោះឯង អាស្រ័យហេតុដូច្នេះ សម្តេចតេជោ ហ៊ុន សែន លោកយល់ថា គួរតែយល់ចិត្តនៃភាគីដៃគូ"។

ក្រុមអ្នកវិភាគស្ថានការណ៍សង្គម ព្រមានថា ប្រសិនបើជំហរ របស់រដ្ឋាភិបាលកម្ពុជា នៅតែមានទុទិដ្ឋិនិយម ចំពោះចលនាជំនួយនេះ ប្រទេសកំពុងអភិវឌ្ឍន៍មួយនេះ នឹងប្រឈមទៅនឹងកំណើននៃប្រាក់កម្ចីកាន់តែខ្ពស់ទៅៗ។ ប្រទេសកម្ពុជា ត្រូវបានគេដឹងថា ធ្លាប់បានទទួលជំនួយពីបរទេស ក្នុងមួយឆ្នាំៗ ប្រហែលមួយពាន់លានដុល្លារ សំរាប់ការចំណាយប្រចាំឆ្នាំ។

ទោះជាយ៉ាងណា ប្រទេសអ្នកផ្តល់ជំនួយសំខាន់ៗ សម្រាប់កម្ពុជា ដូចជាធនាគារពិភពលោក World Bank បដិសេធក្នុងការអត្ថាធិប្បាយជុំវិញករណីនេះ ខណៈសហភាពអឺរ៉ុប ឬ EU និងធនាគារអភិវឌ្ឍន៍អាស៊ី ឬADB ប្រចាំកម្ពុជា ជាដើម បញ្ជាក់ថា ត្រូវរង់ចាំការសម្រេចពីក្រុមប្រឹក្សាជាន់ខ្ពស់របស់ខ្លួន ជាមុនសិន៕

ផ្ញើពត៌មាននេះ