Voice of Democracy

គណបក្សសមរង្ស៊ី៖ សមាជិកសភាអឺរ៉ុប ព្រមានព្យួរការវិនិយោគនៅកម្ពុជាព្រោះដកអភ័យឯកសិទ្ធិតំណាងរាស្ត្រ

ដោយ ពៅ មេត្តា និង អ៊ឹង ប៊ុនថន ថ្ងៃពុធ ទី22 កុម្ភៈ ឆ្នាំ2012 ម៉ោង17:22

ខុទ្ទកាល័យគណបក្សសមរង្ស៊ី អះអាងថា សមាជិកសភាអឺរ៉ុប ជម្រុញឲ្យសភាកម្ពុជា ផ្តល់អភ័យឯកសិទ្ធិដល់លោក ចាន់ ចេង តំណាងរាស្ត្រមណ្ឌលកណ្តាលឡើងវិញ បន្ទាប់ពីបានសិក្សាថា ការដកភ័យឯកសិទ្ធិអ្នកតំណាងរាស្ត្របក្សប្រឆាំងរូបនេះ គឺជារឿងនយោបាយ។

យោងតាមលិខិតរបស់ខុទ្ធកាល័យរបស់គណបក្សសមរង្ស៊ី នៅថ្ងៃពុធនេះ បានឲ្យដឹងថា ការចាប់អារម្មណ៏របស់សភាអឺរ៉ុប បានធ្វើឡើងស្របពេលដែលលោក ចាន់ ចេង កំពុងស្ថិតក្នុងប្រទេសបារាំង ហើយបើតាមខុទ្ធកាល័យរបស់គណបក្សនេះ លោក ចាន់ ចេង នឹងវិលមកកម្ពុជាវិញក្នុងពេលដ៏ឆាប់ខាងមុខនេះ។

ប៉ុន្តែសេចក្តីថ្លែងការណ៍របស់សភាអឺរ៉ុប បានព្រមានថា ករណីរបស់លោក ចាន់ ចេង ត្រូវតែផ្តល់ភាពស្របច្បាប់ដល់អ្នកតំណាងរាស្ត្របក្សប្រឆាំងរូបនេះវិញ ហើយថា បើមិនអាចធ្វើបានទេ សភាអឺរ៉ុបអាចនឹងសើរើកិច្ចសន្យា ការដាក់ទុន នៅកម្ពុជាឡើងវិញ។

ស្តាប់សម្លេង៖

មន្ត្រីអ្នកនាំពាក្យគណបក្សសមរង្ស៊ី លោក យឹម សុវណ្ណ បញ្ជាក់ថា ថ្ងៃនេះ លោក ចាន់ ចេង កំពុងធ្វើដំណើរពីប្រទេសបារាំងមកកម្ពុជាវិញ ៖ "តាមខ្ញុំដឹង គាត់ជិតមកដល់ស្រុកខ្មែរ ឬគាត់មកដល់ហើយក៏មិនដឹង”។

មន្ត្រីអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា បច្ចុប្បន្ន រដ្ឋាភិបាលកម្ពុជា និងសហភាពអឹរ៉ុប កំពុងសហការគ្នាជិតស្និទ ក្នុងការអភិវឌ្ឍន៍ ហើយថាលើកឡើង ឬការស្នើឡើងណាមួយ របស់គណបក្សប្រឆាំង ដែលចង់ឲ្យសភាពអឺរ៉ុបដាក់សម្ពាធលើកម្ពុជានោះ មិនអាចទៅរួចទេ ៖ "អ្វីហ្នឹង ដែលយើងចង់ជំរាបថា ការសុំហ្នឹង វាខុសនឹងនិតិវិធីរួចស្រេចទៅហើយ ដោយសារសហគមន៍អឺរ៉ុប គឺដាច់ដោយឡែកពីអធិបតេយ្យ និងឯករាជ្យរបស់កម្ពុជា”។

សូមរំលឹកថា លោក ចាន់ ចេង តំណាងរាស្ត្រមណ្ឌលកណ្តាល របស់គណបក្សសមរង្ស៊ី ត្រូវរដ្ឋសភាដកអភ័យឯកសិទ្ធិ កាលពីថ្ងៃទី២០ ខែធ្នូ ឆ្នាំ២០១១ ដើម្បីបើកផ្លូវឲ្យតុលាការចាត់ការតាមផ្លូវច្បាប់ ដោយចោទថា តំណាងរាស្ត្ររូបនេះ បានផ្តល់មធ្យោបាយដោះលែងជនជាប់ចោទ ដែលតុលាការឃុំខ្លួន ដោយសារជម្លោះដីធ្លី។ រហូតដល់ពេលនេះ មានតំណាងរាស្ត្រគណបក្សសមរង្ស៊ី មានចំនួន៤រូបហើយ ត្រូវសភាសដកអភ័យឯកសិទ្ធិជាបន្តបន្ទាប់ ក្នុងបទល្មើសផ្សេងៗគ្នាមាន ដូចជា លោក សម រង្ស៊ី ប្រធានគណបក្សសមរង្ស៊ី លោក ហូរ វ៉ាន់ តំណាងរាស្ត្រមណ្ឌលភ្នំពេញ លោកស្រី មូរ សុខហួរ មណ្ឌលកំពត និងលោក ចាន់ ចេង តំណាងរាស្ត្រមណ្ឌលកណ្តាល៕

ចែករំលែកព័ត៌មាននេះ