Voice of Democracy

ក្រុមមេធាវីការពារ នួន ជា ប្តឹងឲ្យ អវតក ចាត់វិធានការលើលោកនាយករដ្ឋមន្ត្រី ហ៊ុន សែន

ដោយ ពៅ មេត្តា និង អ៊ឹង ប៊ុនថន ថ្ងៃព្រហស្បតិ៍ ទី23 កុម្ភៈ ឆ្នាំ2012 ម៉ោង11:17

ក្រុមមេធាវីអន្តរជាតិការពារក្តីឲ្យ លោក នួន ជា ជាបងធំទី២ក្នុងរបបខ្មែរក្រហម ស្នើឲ្យតុលាការខ្មែរកូនកាត់នេះ ចាត់វិធានការប្រឆាំងនឹងលោកនាយករដ្ឋមន្ត្រី ហ៊ុន សែន ដើម្បីបញ្ឈប់រាល់ការអត្ថាធិប្បាយណាមួយបន្ថែមទៀត ដែលគេចាត់ទុកថានឹងធ្វើឲ្យប៉ះពាល់ដល់ការកាត់ទោសប្រកបដោយយុត្តិធម៌នោះ។

នៅក្នុងពាក្យបណ្តឹងកំរាស់ ១៩ទំព័រ ដែលក្រុមមេធាវីអន្តរជាតិ ៤រូប ការពារក្តីឲ្យលោក នួន ជា ផ្ញើជូនសហព្រះរាជអាជ្ញានៃសាលាក្តីខ្មែរក្រហមកាលពីថ្ងៃទី២២ ខែកុម្ភៈ បានលើកឡើងពីការអត្ថាធិប្បាយរបស់លោកនាយករដ្ឋមន្ត្រី ហ៊ុន សែន ជាច្រើនលើកក្នុងវេទិកាសាធារណៈ អំពី លោក នួន ជា ដែលជាជនចោទម្នាក់ ដែលតុលាការកំពុងកាត់ទោស។

មេធាវីម្នាក់ក្នុងចំណោម ៤នាក់ របស់ លោក នួន ជា គឺលោក Michiel PESTMAN ថ្លែងប្រាប់ វីអូឌី តាមទូរស័ព្ទនៅថ្ងៃព្រហស្បតិ៍នេះថា បណ្តឹងនោះ គឺលោកស្នើឲ្យលោកនាយករដ្ឋមន្ត្រី ហ៊ុន សែន បញ្ឈប់រាល់ការអត្ថាធិប្បាយណាបន្ថែមទៀត ដែលពាក់ព័ន្ធនឹងកូនក្តី របស់លោក ៖ “ខ្ញុំគិតថា ការអត្ថាធិប្បាយរបស់លោកនាយករដ្ឋមន្ត្រី ហ៊ុន សែន វាមានឥទ្ធិពលលើ មនុស្សជាច្រើន ក្នុងនោះរួមទាំងចៅក្រមផងដែរ។ ដូច្នេះ ខ្ញុំស្នើឲ្យតុលាការបញ្ឈប់លោក ហ៊ុន សែន កុំឲ្យនិយាយពីនូន ជាទៀត ហើយខ្ញុំយល់ថា ការអត្ថាធិប្បាយនេះ វាផ្ទុយពីខ្លឹមសារច្បាប់ព្រហ្មទណ្ឌជាតិ និងបទបញ្ជាផ្ទៃក្នុងសាលាក្តី។”

ស្តាប់សម្លេង៖

ករណីដែលមេធាវីរបស់ លោក នួន ជា ប្តឹងលោកនាយករដ្ឋមន្ត្រី ហ៊ុន សែន នេះ អង្គភាពប្រតិកម្មរហ័សនៃទីស្តីការគណៈរដ្ឋមន្ត្រី ធ្លាប់ប្រតិកម្មថា ជាការធ្វើឲ្យសាលាក្តីខ្មែរក្រហម មិនអាចដំណើរការតទៅទៀត ហើយអាចដោះលែងកូនក្តីរបស់ខ្លួន ដោយមិនបាច់ឆ្លងកាត់ការសម្រេចក្តីរបស់តុលាការ។

អ្នកនាំពាក្យសាលាក្តីខ្មែរក្រហម លោក នេត ភត្រា មានប្រសាសន៍ថា សំណើរបស់មេធាវី លោក នួន ជា នោះនឹងត្រូវចៅក្រមអង្គជំនុំជម្រះសាលាដំបូងពិចារណា ហើយនឹងសម្រេចដោយឯករាជ្យ ថាតើត្រូវចាត់វិធានការ ឬមិនចាត់វិធានការ ៖ “គេអាចចេញដេកាបង្គាប់មួយ ឈប់ឲ្យមានការអត្ថាធិប្បាយ ដែលប៉ះពាល់ដល់ដំណើរការតុលាការ។”

សម្រាប់អ្នកវិភាគឯករាជ្យ ដែលតាមដានដំណើរការសាលាក្តីខ្មែរក្រហមនេះ លោក ឡៅ ម៉ុងហៃ យល់ឃើញថា ដើម្បីឲ្យដំណើរការសាលាក្តីកូនកាត់មួយនេះ អាចទទួលបានលទ្ធផលត្រឹមត្រូវ យុត្តិធម៌ គឺចៅក្រមគួរតែចេញដីកាបង្គាប់ ដើម្បីហាមរាល់ការអត្ថាធិប្បាយណាមួយដែលជះឥទ្ធិពលដល់តុលាការ។

តាមវិធានផ្ទៃក្នុងរបស់សាលាក្តីខ្មែរក្រហម មាត្រា៣៥ ចែងថា អង្គជុំនុំជម្រះវិសាមញ្ញ អាចដាក់ទណ្ឌកម្ម ឬបញ្ជូនទៅអាជ្ញាធរ មានសមត្ថកិច្ច បើសិនជាមានការជ្រៀតជ្រែកដោយចេតនាពិតប្រាកដក្នុងកិច្ចការអង្គជំនុំជម្រះ។

កន្លងមក ក្រុមមេធាវីការពារក្តីឲ្យ លោក នួន ជា ធ្លាប់បានដាក់ពាក្យបណ្តឹងតវ៉ាជាច្រើនលើក ប្រឆាំងនឹងថ្នាក់ដឹកនាំរដ្ឋាភិបាលកម្ពុជា ថាបានជ្រៀតជ្រែកចូលកិច្ចការសាលាក្តីខ្មែរក្រហម ដូចជាការប្តឹងទៅតុលាការរាជធានីភ្នំពេញ ប្រឆាំងលោកនាយករដ្ឋមន្ត្រី ហ៊ុន សែន និងមន្រ្តីជាន់ខ្ពស់ប្រហែល១០រូបទៀត ប៉ុន្តែបណ្តឹងតវ៉ាទាំងនោះ មិនត្រូវបានតុលាការស៊ីវិលរបស់កម្ពុជាចាត់ការនោះទេ៕

ផ្ញើព័ត៌មាននេះ