Voice of Democracy

ជំនួយការសមេ្តចសីហនុ ហៅការលើកឡើងរបស់អតីតមេខ្មែរក្រហមថាធ្វើឲ្យភ័ន្តច្រឡំ

ដោយ កែវ រតនៈ និង អ៊ឹង ប៊ុនថន ថ្ងៃព្រហស្បតិ៍ ទី23 កុម្ភៈ ឆ្នាំ2012 ម៉ោង11:35

ជំនួយការផ្ទាល់អតីតព្រះមហាក្សត្រខ្មែរ សម្តេច នរោត្តម សីហនុ បានហៅការលើកឡើងរបស់អតីតមេដឹកនាំខ្មែរក្រហម នៅក្នុងសវនាការកន្លងមកថា ធ្វើឲ្យមានការភ័ន្តច្រឡំ ពោលគឺសម្តេចឪ សីហនុ មិនមានពាក់ព័ន្ធនឹងការសម្លាប់កម្មាភិបាលជាន់ខ្ពស់ខ្មែរក្រហម គឺលោក ហ៊ូ នឹម និងហ៊ូ យន់ ឡើយ។

នៅក្នុងលិខិតមួយច្បាប់ របស់ព្រះអង្គម្ចាស់ធម្មិកោ ជំនួយការផ្ទាល់ សម្តេច សីហនុ ផ្ញើរជូនគេហទំព័រក្នុងស្រុកមួយ ក្រោមចំណងជើងថា ទីកន្លែងនៃការភ័ន្តច្រឡំ បានសរសេរថា បន្ទាប់ពីយាងនិវត្តន៍ មកកម្ពុជាវិញ សម្តេច សីហនុ បានដាក់ពាក្យលាឈប់ ព្រះរាជឋានៈជាប្រធានរដ្ឋ នៃកម្ពុជាប្រជាធិបតេយ្យជាផ្លូវការ ហើយនៅថ្ងៃទី៣១ ខែធ្នូ ឆ្នាំ១៩៧៥ រហូតមកដល់ថ្ងៃទី១ ខែមេសា ឆ្នាំ១៩៧៦ ទើបការស្នើសុំនេះ ទទួលស្គាល់ជាផ្លូវការ ដោយអង្គការ។

បន្ទាប់ពីនោះ មុខដំណែងរបស់ព្រះអង្គត្រូវបានជំនួសដោយ លោក ខៀវ សំផន។ នៅក្នុងលិខិតដដែល បន្តថា សម្តេច នរោត្តម សីហនុ ត្រូវបង្ខំឲ្យគង់នៅក្នុងវាំង តាំងពីឆ្នាំ ១៩៧៦មក។ លិខិតបំភ្លឺនោះ បានចោទសួរវិញថា តើព្រះអង្គមានលទ្ធភាពណា ទៅជាប់ពាក់ព័ន្ធនឹងការធ្វើឃាត លើ ហ៊ូ យន់ និង ហ៊ូ នឹម នៅឆ្នាំ ១៩៧៧នោះ?

សូមបញ្ជាក់ថា ការបំភ្លឺរបស់ជំនួយការអតីតព្រះមហាក្សត្រ នៅពេលនេះ ធ្វើឡើងបន្ទាប់ពី សហព្រះរាជអាជ្ញា គេបានដកស្រង់សម្តីរបស់ លោក ខៀវ សំផន ដែលបានផ្តល់សំភាសន៍ជាមួយអ្នកកាសែតបរទេស ដោយនិយាយអំពីទំនាក់ទំនង រវាងសម្ដេច សីហនុ, ប៉ុល ពត និងលោក ជូ អេន ឡាយ (Zhou Enlai) អតីតនាយករដ្ឋមន្ត្រីនៃសាធារណរដ្ឋប្រជាមានិតចិន នៅចុងទសវត្សន៍ឆ្នាំ១៩៦០ ។ ឯកសារដែលដាក់បង្ហាញ នៅក្នុងសវនាការកន្លងមកនោះ ត្រូវបានអ្នកបកប្រែ និយាយថា អតីតព្រះមហាក្សត្រសម្ដេចព្រះបាទ នរោត្ដម សីហនុ បានបញ្ជាឲ្យសម្លាប់អតីតកម្មាភិបាលខ្មែរក្រហមជាន់ខ្ពស់ ២រូប គឺលោក ហ៊ូ យន់ និង ហ៊ូ នឹម ៕

ផ្ញើពត៌មាននេះ