Voice of Democracy

អ្នកបឹងកក់អំពាវនាវអោយពលរដ្ឋរួមគ្នាទប់ស្កាត់ការបណ្តេញចេញ ខណៈត្រូវចូលបំភ្លឺនៅតុលាការថ្ងៃនេះ

ដោយ ញឹម សុខន និង អ៊ឹង ប៊ុនថន ថ្ងៃព្រហស្បតិ៍ ទី23 កុម្ភៈ ឆ្នាំ2012 ម៉ោង11:54

តំណាងអ្នកភូមិបឹងកក់ នៅថ្ងៃព្រហស្បតិ៍នេះ បានអំពាវនាវអោយពលរដ្ឋទូទាំងប្រទេស រួមគ្នា តស៊ូមតិទប់ទល់នឹងការបណ្តេញចេញពីលំនៅឋានទាំងបង្ខំ ខណៈពួកគេចំនួន ៤នាក់ ត្រូវបានតុលាការកោះហៅឲ្យចូលបំភ្លឺនៅរសៀលថ្ងៃនេះ ជុំវិញបទចោទថា ប្រមាថ និងប្រឆាំងមន្ត្រីសាធារណៈក្នុងអំឡុងតវ៉ាការពារដី និងផ្ទះ។

អ្នកស្រី ទេព វន្នី តំណាងអ្នកភូមិបឹងកក់ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ បាននិយាយថា ពួកគាត់ចំនួន ៤នាក់ មានអ្នកស្រី ហេង មុំ, គង់ ចន្ថា, អ្នកស្រី បូ ឆឹវី រួមទាំងអ្នកស្រីផង នឹងចូលបំភ្លឺនៅសាលាដំបូងរាជធានីភ្នំពេញ នៅរសៀលថ្ងៃព្រហស្បតិ៍នេះ តាមដីកាកោះរបស់ លោក ឆែ វីរៈ ចៅក្រមសាលាដំបូងរាជធានីភ្នំពេញ ជុំវិញបទចោទថា ប្រមាថ និងប្រឆាំងមន្ត្រីសាធារណៈក្នុងអំឡុងតវ៉ាកន្លងមក ។

អ្នកស្រីបន្តថា កាចោទប្រកាន់នេះ មិនមានយុត្តិធម៌ សំរាប់ពួកគាត់ទេ ពីព្រោះពួកគាត់គ្រាន់តែជំរុញអោយអាជ្ញាធរ ពន្លឿនកិច្ចការបស់ខ្លួន ជូនពលរដ្ឋនៅតំបន់នោះ តាមអនុសាសន៍របស់ប្រមុខរដ្ឋាភិបាល ដែលបានកាត់ដីនៅតំបន់បឹងកក់ មួយចំនួន អោយពលរដ្ឋរស់នៅលើដីរបស់ខ្លួនដដែល។ តែទីបំផុតពួកគេបែរជាជាប់ចោទពីបទម៉ាក់ងាយ និងប្រឆាំងនឹងមន្ត្រីសាធារណៈទៅវិញ ករណីនេះអ្នកស្រីអំពាវនាវអោយពលរដ្ឋទំាំងអស់ ត្រូវចេះសហការគ្នា ដើម្បីទប់ស្កាត់ភាពអយុត្តិធម៌នេះ៖” ពួកខ្ញុំអ្នករងគ្រោះនៅតំបន់បឹងកក់មានតែសំនូមពរអោយ សូមអោយខ្មែរទាំងអស់ផ្ដោតអារម្មណ៍មកខ្មែរដែលរងគ្រោះ គ្រប់តំបន់ទាំងអស់ដោយសារតែការបណ្ដេញចេញពីលំនៅស្ថាន វាមិនខុសពីពាក្យ ថ្ងៃនេះផ្ទះខ្ញុំ ថ្ងៃស្អែកផ្ទះអ្នកដទៃទេ ហើយសូមអោយគាត់ ប្រសិនបើគាត់ស្រឡាញ់ខ្មែរដូចគ្នា ទៅចូលរួមទាំងអស់គ្នានៅមុខតុលាការរាជធានីភ្នំពេញ ដោយសារគាត់ការពារសិទ្ធិរស់នៅរបស់គាត់ ឥឡូវត្រូវបានគេយកទៅ ប្រព័ន្ធតុលាការ គាបសង្កត់ប្រជាពលរដ្ឋ”។

ស្តាប់សម្លេង៖

ជាមួយគ្នានេះដែរ អ្នកស្រី ហេង មុំ ដែលត្រូវចូលទៅឆ្លើយបំភ្លឺនៅតុលាការនៅថ្ងៃនេះដែរ បានអះអាងថា កាលពីពាក់កណ្តាលខែកញ្ញា ឆ្នាំ២០១១ ផ្ទះរបស់ពលរដ្ឋនៅភូមិ២២ ចំនួន ៨ខ្នង ត្រូវបានកម្លាំងរបស់សាលារាជធានីភ្នំពេញ សហការណ៍ជាមួយក្រុមហ៊ុនស៊ូការគូអ៊ីន របស់លោក ឡៅ មេងឃីន សមាជិកព្រឹទ្ធសភាគណបក្សប្រជាជនកម្ពុជា វាយកំទេចចោលអស់ ដោយគ្មានដីកាពីតុលាការ។ អ្នកស្រី ហេង មុំ បន្តថា ពួកគេគាត់បានដាក់ពាក្យបណ្តឹងទៅសាលាដំបូងរាជធានីភ្នំពេញ ដើម្បីរកយុត្តិធម៌ ប៉ុន្តែតុលាការមិនទាន់ចំណាត់ការទេ ហើយបែរជាចាត់ការតែបណ្តឹងរបស់អាជ្ញាធរ ដែលប្តឹងពលរដ្ឋខ្លួនទៅវិញ។

VOD មិនអាចសុំអត្ថាធិប្បាយពីចៅក្រមសាកសួរសាលាដំបូងរាជធានីភ្នំពេញ ពី លោក ឆែ វីរះ បានទេនៅព្រឹកថ្ងៃព្រហស្បតិ៍នេះ។

លោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ បានប្រតិកម្មដោយកម្រមួយ កាលពីដើមសប្តាហ៍នេះ នៅពេលថ្លែងក្នុងពិធីបូកសរុបការងារក្រសួងមហាផ្ទៃឆ្នាំ២០១១ ដោយបានហៅការចាប់ខ្លួនប្រជាពលរដ្ឋ ដែលតវ៉ារឿងដីធ្លីទៅដាក់គុកទាំងមិនមានកំហុស និងការប្រើកម្លាំងប្រដាប់អាវុធទៅបង្រ្កាបលើអ្នកតវ៉ាកន្លងមកនោះថា នឹងធ្វើអន្តរជាតិចោទកម្ពុជាថា ជាប្រទេសរំលោភសិទ្ធិមនុស្សធ្ងន់ធ្ងរ ហើយអន្តរជាតិនឹងមិនគាំទ្របេក្ខភាពកម្ពុជាជាសមាជិកមិនអចិន្ត្រៃយ៍របស់អង្គការសហប្រជាជាតិ ដែលកម្ពុជាកំពុងស្វែងរកការគាំទ្រនៅពេលនេះ។

អ្នកភូមិ បានអោយដឹងថា នៅពេលចូលបំភ្លឺនៅតុលាការនៅរសៀលថ្ងៃនេះ ពួកគេនឹងស្លៀកពាក់តាមរបៀប្រពៃណីខែ្មរ ដោយពាក់អាវប៉ាក់ សំពត់ហូល កាន់រូបព្រះពុទ្ធ គ្រប់គ្នាចូលទៅតុលាការ ដើម្បីជាសារបង្ហាញថា ពួកគេគោរពប្រពៃណីខ្មែរ កាន់សាសនាព្រះពុទ្ធសាសនា មិនមានគំនិតលោភលន់ និងមិនមានគំនិតម៉ាក់ងាយអ្នកដទៃដូចការចោទប្រកាន់នោះទេ។ ជាមួយគ្នានោះ នឹងមានពលរដ្ឋជាច្រើនទៀតមកពីសហគមន៍បុរីកីឡា បឹងឈូក សហគមន៍១៤៧ និងសហគមន៍ជាច្រើនទៀត ប្រមូលផ្តុំគ្នានៅមុខសាលាដំបូងរាជធានីភ្នំពេញ នៅរសៀលថ្ងៃនេះ ដើម្បីលើកទឹកចិត្តអ្នកបឹងកក់ នឹងបារម្ភ ពីការចាប់ខ្លួនតំណាងពួកគេ៕

ផ្ញើព័ត៌មាននេះ