ក្រុមមេដឹកនាំសហជីពនិងកម្មករប្រមាណជិត២ពាន់នាក់ នៅព្រឹកថ្ងៃអង្គារនេះ ជួបជុំប្រារព្ធទិវាពលកម្មអន្តរជាតិលើកទី១៣២ នៅសួនច្បារខាងមុខក្រុមប្រឹក្សាអភិវឌ្ឍន៍កម្ពុជា (CDC) ជិតវត្តភ្នំ ដើម្បីថ្លែងសារនិងស្នើលក្ខខណ្ឌការងារជិត២០ចំណុច។
នៅក្នុងញ្ញាតិទាមទាររួម ដែលវីអូឌីទើបទទួលបាន សហភាពការងារ ដែលតំណាងឲ្យសហជីបនិងសមាគមចំនួន៨ទៀត សំដែងនូវទុក្ខកង្វល់ក្តីបារម្ភ និងស្នើសុំទៅរដ្ឋាភិបាលនិងរដ្ឋសភា ឲ្យជួយដោះស្រាយលក្ខខណ្ឌការងារចំនួន១៩ចំណុច។ ចំណុចសំខាន់ៗនៅក្នុងញ្ញាតិរួមនោះ គឺទាមទារកំណត់ប្រាក់ឈ្នួលអប្បរមា២០៧ដុល្លាក្នុងមួយខែ ពង្រឹងសេវាសុខភាពនិងសន្តិសុខសង្គមជូនកម្មករ និងលុបបំបាត់ការប្រើប្រាស់អំណាចរបស់និយោជកមកលើកម្មករ ដែលផ្ទុយនឹងច្បាប់។
បើតាមប្រធានសភាពការងារកម្ពុជា លោក អាត់ ធន់ ក្រុមអាជ្ញាធរនៅព្រឹកនេះ រារាំងមិនឲ្យលើកបដា ដាក់មេក្រូ ដោយសារអាជ្ញាធរខ្លាចក្រុមកម្មករហែក្បួន ហើយមានកងកម្លាំងនៅចាំឃ្លាំមើលនៅជុំវិញកន្លែងប្រារព្ធពិធី ប៉ុន្តែ លោកថា ខាងសណ្ដាប់ធ្នាប់ខណ្ឌដូនពេញជួយសម្រួលចរាចរណ៍។
លោក អាត់ ធន់ ប្រាប់វីអូឌីទៀតថា ក្រុមមេដឹកនាំសហជីបនិងកម្មករ ប្រារព្ធពិធីនៅនឹងកន្លែង ដោយមិនមានការដើរហែក្បួននោះទេ ព្រោះសាលារាធានីមិនបានអនុញ្ញាត ដោយលើកហេតុផលបញ្ហាសន្តិសុខសណ្តាប់ធ្នាប់សាធារណៈ៕