គណៈកម្មាធិការជាតិរៀបចំការបោះឆ្នោត និងក្រសួងមហាផ្ទៃ រំលឹកជាថ្មីទៀត ឲ្យពលរដ្ឋដែលគ្មានអត្តសញ្ញាណប័ណ្ណ ទៅបញ្ជាក់ឯកសារ ដើម្បីបានទៅបោះឆ្នោតឃុំសង្កាត់ ខណៈអង្គការសង្គមស៊ីវិលបារម្ភពីការបាត់បង់សិទ្ធិបោះឆ្នោតរបស់ពលរដ្ឋ។
ក្នុងសេចក្ដីប្រកាសព័ត៌មាន ចេញផ្សាយនៅថ្ងៃព្រហស្បតិ៍នេះ រដ្ឋមន្ដ្រីក្រសួងមហាផ្ទៃលោក ស ខេង និងប្រធាន គ.ជ.ប លោក ស៊ិន ប៊ុនហុក ប្រកាសថា ដើម្បីសម្រួលការលំបាករបស់ពលរដ្ឋ ដែលមានសិទ្ធិ និងបានចុះឈ្មោះក្នុងបញ្ជីបោះឆ្នោត ឆ្នាំ២០១៦ ប៉ុន្ដែគ្មានអត្តសញ្ញាណប័ណ្ណ ពួកគេអាចយកឯកសារបញ្ជាក់អត្តសញ្ញាណ ទៅជួបគណៈកម្មាការឃុំសង្កាត់រៀបចំការបោះឆ្នោត ដើម្បីបញ្ជាក់សុពលភាព និងប្រើប្រាស់ក្នុងពេលបោះឆ្នោតឃុំសង្កាត់។
បើតាមសេចក្ដីប្រកាស ការស្នើសុំ និងបញ្ជាក់លើឯកសារបញ្ជាក់អត្តសញ្ញាណនេះ នឹងត្រូវបញ្ចប់នៅថ្ងៃទី៣ ខែមិថុនាឆ្នាំ២០១៧ ពោលគឺសល់តែ២ថ្ងៃទៀតប៉ុណ្ណោះ។
បើតាមរបាយការណ៍ គ.ជ.ប ក្នុងបញ្ជីបោះឆ្នោត ឆ្នាំ២០១៦ មានអ្នកចុះឈ្មោះបោះឆ្នោតសរុបប្រមាណជិត៨លាននាក់ ក្នុងនោះ ប្រមាណ២ភាគរយគឺជាង៣២ម៉ឺននាក់ មិនមានអត្តសញ្ញាណបណ្ណនោះទេ។
នាយកប្រតិបត្តិអង្គការនិចហ្វិចលោក សំ គន្ធាមី មានប្រសាសន៍ថា បើតាមរបាយការណ៍ក្រសួងមហាផ្ទៃ គឺអាជ្ញាធរបានចេញលិខិតបញ្ជាក់អត្តសញ្ញាប័ណ្ណឲ្យពលរដ្ឋជាង៥០ភាគហើយ នៃចំនួនអ្នកចុះឈ្មោះអត់អត្តសញ្ញាបណ្ណជាង៣២ម៉ឺននាក់។
ទោះយ៉ាងនេះក៏ដោយ លោកថា ប្រជាពលរដ្ឋដែលមិនទាន់ធ្វើលិខិតបញ្ជាក់អត្តសញ្ញាណ នឹងបាត់បង់សិទ្ធិបោះឆ្នោតដោយសារពេលវេលានៅសល់តែ២ថ្ងៃទៀតប៉ុណ្ណោះ។
លោកថា៖ «បើតាមបទបញ្ជានិតីវិធី ថ្ងៃទី២ ម៉ោង៥រសៀលហ្នឹង ចប់ហើយ បិទហើយ សុំលែងបានហើយ ដល់ថ្ងៃ៣ (មិថុនា) គេអត់ចេញឲ្យទេ។ អត់មានអីហ្នឹងសោះហើយ អត់មានសិទ្ធិ អត់បានទៅបោះឆ្នោត អត់មានឯកសារផង។ វាពាក់ព័ន្ធសិទ្ធិបោះឆ្នោត គាត់បាត់បង់សិទ្ធិបោះឆ្នោតហើយ គាត់អត់មានឯកសារផង»។
បើតាមប្រតិទិន គ.ជ.ប ការបោះឆ្នោតក្រុមប្រឹក្សាឃុំសង្កាត់អាណត្ដិទី៤ នឹងប្រព្រឹត្តទៅនៅថ្ងៃទី៤មិថុនា ឆ្នាំ២០១៧ ពោលគឺសល់តែ៣ថ្ងៃទៀតប៉ុណ្ណោះ៕