ក្រសួងការងារបានថ្កោលទោសការរិះគន់របស់អតីតមេដឹកនាំបក្សប្រឆាំងលោក សម រង្ស៊ី ថាបានព្យាយាមបំភាន់មតិសាធារណជន ខណៈដែលក្រសួងនេះមិនបានចេញសេចក្តីណែនាំឲ្យកម្មករ និយោជិត បានឈប់ទៅបោះឆ្នោតដូចពេលមុនៗ។
កាលពីថ្ងៃ៣០ខែឧសភា អតីតមេដឹកនាំបក្សសង្រ្គោះជាតិលោក សម រង្ស៊ី បានបង្ហោះវីដេអូឃ្លីបលើបណ្តាញសង្គម របស់លោកថា ការដឹកនាំរដ្ឋាភិបាលបច្ចុប្បន្ន មានអំពើពុករលួយ កេងប្រវ័ញ្ចកម្លាំងពលកម្មអ្នកក្រ។
លោក សម រង្ស៊ី ក៏បានរំឭកពីព្រឹត្តិការណ៍ដែលអាជ្ញាធរ បាញ់សម្លាប់កម្មករ នៅផ្លូវវេងស្រេង កាលពីថ្ងៃទី៣ ខែមករា ឆ្នាំ២០១៤ ព្រមទាំងបានអំពាវនាវឲ្យកម្ម និយោជិត ចំណាយពេល និងថវិកាផ្ទាល់ខ្លួនទៅបោះឆ្នោត ប្តូរមេដឹកនាំថ្នាក់ក្រោមជាតិនៅថ្ងៃអាទិត្យចុងសប្តាហ៍នេះ។
លោក សម រង្ស៊ី បន្តថា មានតែចំណាយពេលទៅបោះឆ្នោតទេ ទើបអាចប្តូរពីការជិះជាន់ មកមានយុត្តិធម៌ ប្តូរពីជីវភាពក្រីក្រ មករស់នៅបែបសមរម្យ។ លោកថា «សង្គមសព្វថ្ងៃពោពេញទៅដោយអំពើពុករលួយ អំពើអយុត្តិធម៌ អំពើជិះជាន់កេងប្រវ័ញ្ចញើសឈាមពីសំណាក់អ្នកមានអំណាចនិងអ្នកមានលុយមកលើប្រជារាស្ត្រទន់ខ្សោយ និងប្រជារាស្ត្រក្រីក្រដូចកម្មករនិងគ្រួសារកម្មករ»។
ប៉ុន្តែក្រសួងការងារ បានចេញសេចក្តីប្រកាសព័ត៌មានចុះថ្ងៃទី៣១ខែឧសភា ដោយហៅលោក សម រង្ស៊ី ថា ជា «ទណ្ឌិត សម រង្ស៊ី និងបក្ខពួកមិនត្រឹមតែមិនយល់ និងមិនគាំទ្រយន្តការត្រីភាគីនោះទេ តែងតែយកបងប្អូនកម្មករ និយោជិតជាឈ្នាន់នយោបាយ របស់ខ្លួន និងញុះញង់បំផុសបំផុលបាតុកម្មហិង្សាខុសច្បាប់»។
ក្រសួងការងារអះអាងថា ការដែលក្រសួងនេះមិនបានចេញសេចក្តីណែនាំឲ្យមានការឈប់សម្រាក ដើម្បីឲ្យកម្មករនិយោជិតទៅបោះឆ្នោត ក្រសួងថាដោយសារតែច្បាប់បោះឆ្នោត ដែលថាមានលោក សម រង្ស៊ី ខ្លួនឯងចូលរួមអនុម័តផងដែរ មិនបានចែងពីចំនួនថ្ងៃឈប់សម្រាកនៅថ្ងៃបោះឆ្នោតនេះទេ។
ទោះជាយ៉ាងណា នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានរិះគន់ក្រសួងការងារថា ការដែលក្រសួងជាសេនាធិការរបស់រដ្ឋាភិបាលមួយនេះ មិនផ្តល់ថ្ងៃឈប់សម្រាកដល់កម្មករ និយោជិតទៅបោះឆ្នោតនេះ គឺផ្ទុយទៅនឹងរដ្ឋធម្មនុញ្ញដែលចែងពីសិទ្ធិពលរដ្ឋនិងសិទ្ធិនយោបាយ។
លោកថា៖ «យើងសុខចិត្តបាត់បង់លុយព្រឹមចំនួន១០ដុល្លារ វាជាជាងឃើញឃុំស សង្កាត់ របស់យើងនៅតែទទួលរងអត់មានផ្លូវ អត់មានផ្លូវចរាចរណ៍ ទឹកលិច ឬក៏គ្មានការអភិវឌ្ឍ ហើយជនជាតិយើងចេះតែធ្វើការចំណាកស្រុក ទៅប្រទេសគេ ឬក៏ចាញ់បោកគេ ចាញ់បោកការជួញដូរអីជាដើមហ្នឹង។ អញ្ចឹងវាជារឿងមួយសំខាន់នៃអាយុជិវិតយើង។ យើងសុខចិត្តចំណាយបាត់បង់លុយ១០ដុល្លារ ជាជាងកុំឲ្យបាត់បង់អនាគតដ៏ភ្លឺស្វាយសម្រាប់កូនចៅយើងជំនាន់ក្រោយ»។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា បានលើកឡើងថា ដោយសារតែកម្មករ និយោជិតក្នុងវិស័យកាត់ដេរជាអ្នកនាំមុខគេក្នុងការតវ៉ា ទាមទារលក្ខខណ្ឌការងារ ហើយពួកគេភាគច្រើនគាំទ្របក្សប្រឆាំងទើបរដ្ឋាភិបាលមិនផ្តល់ថ្ងៃឈប់សម្រាក។
លោកថា៖ «តាមការយល់និន្នាការដែលយើងគិតឃើញ ជាទូទៅគាត់គ្មាននិន្នាការគាំទ្រទៅរកបក្សកាន់អំណាចទេ។ អញ្ចឹងបើកម្មករ និយោជិតភាគច្រើនទៅបោះឆ្នោតគឺសំឡេងគណបក្សប្រឆាំង ឬគណបក្សក្រៅរដ្ឋាភិបាលកើនឡើង។ អញ្ចឹងរដ្ឋាភិបាលមិនចំណេញទេ។ យើងមិនដឹងថាមានការរៀបចំឬក៏ស្អីនៅពីក្រោយទេ ប៉ុន្តែបើការបាត់សំឡេង កម្មករនិយោជិតនេះគឺគណបក្សក្រៅរដ្ឋាភិបាលបាត់សំឡេងច្រើនជាង»។
ទោះជាបែបនេះក្តីក្រសួងការងារ បានអះអាងក្នុងសេចក្តីប្រកាសព័ត៌មានថា រដ្ឋាភិបាលបានខិតខំប្រឹងប្រែងយកចិត្តទុកដាក់ តម្លើងប្រាក់ឈ្នួលដល់កម្មករជាបន្តបន្ទាប់រហូតពេលនេះ ពួកគេទទួលបានប្រាក់ឈ្នួលអប្បរមា១៥៣ដុល្លារក្នុងមួយខែ និងថានៅនៅពេលខាងមុខដ៏ខ្លីនេះ ក្រសួងនឹងបន្តពិភាក្សា ជាមួយភាគីពាក់ព័ន្ធដើម្បីតម្លើងប្រាក់ឈ្នួលដល់កម្មករបន្ថែមទៀត។
ប៉ុន្តែ លោក សម រង្ស៊ី អះអាងថា បើគ្មានការផ្លាស់ប្តូរ របបដឹកនាំ តាមរយៈនៃការបោះឆ្នោតនៅពេលខាងមុខទេ លោកថា ការរំលោភបំពានសិទ្ធិកម្មករ អំពើពុករលួយ ការកេងប្រវ័ញ្ចកម្លាំងពលកម្ម នៅតែបន្តកើតមាន ទៅលើពលរដ្ឋក្រីក្រដដែល៕