មេដឹកនាំបក្សប្រឆាំងអះអាងថា គោលនយោបាយជាអាទិភាព សម្រាប់ពង្រឹងអំណាចថ្នាក់ក្រោមជាតិតាមយន្តការប្រជាធិបតេយ្យនិងត្រូវយកទៅប្រកួតប្រជែងការបោះឆ្នោតឃុំ-សង្កាត់ នាពេលខាងមុខនេះថា មានដាក់បញ្ជូលចំនុច ដែលជាអនុសាសន៍របស់លោក កែម ឡី។
ប្រធានគណបក្សសង្គ្រោះជាតិ លោក កឹម សុខា ដែលសមាជគណបក្ស ទើបផ្តល់សិទ្ធិឲ្យធ្វើប្រធានបក្សជាផ្លូវការនៅថ្ងៃទី២ខែមីនានេះ បានអះអាងថា គោលនយោបាយជា អាទិភាពចំនួន៥ចំនុច សម្រាប់ប្រកួតប្រជែងការបោះឆ្នោតឃុំ-សង្កាត់ ខាងមុខនេះ លោកថា ចំនុចទី៥បានដាក់បញ្ចូលអនុសាសន៍ លោក កែម ឡី។
លោក កឹម សុខា ឲ្យដឹងទៀតថា លោក កែម ឡី បានលើកឡើងថា ដើម្បីពង្រឹងអំណាចនៅថ្នាក់ក្រោមជាតិ ឃុំ សង្កាត់ នីមួយៗ ត្រូវការលុយ១លានដុល្លារក្នុងមួយឆ្នាំ នោះទើបជំរុញឲ្យមន្ត្រីឃុំ-សង្កាត់ ប្រើសិទ្ធិសម្រេចដ៏ពេញលេញមួយ ធានាដល់ការអភិវឌ្ឍ ទាក់ទាញធនធានមនុស្ស និងស្រូបយកកម្លាំងពលកម្ម មិនឲ្យចំណាកស្រុក ទៅរកការងារនៅទីក្រុង ឬក្រៅប្រទេស។ ប៉ុន្តែលោកថា ជាជំហានដំបូង បក្សសម្រេចយល់ព្រមត្រឹម ៥០ម៉ឺនដុល្លារសិន។
លោកថា៖ «ខ្ញុំមិនចង់យកមកអួតមកអាង ចង់ចំណេញអីទេ ខ្ញុំរំឭកបន្តិចចុះ ពីលោកបណ្ឌិត កែម ឡី គាត់បានផ្តល់យោបលឲ្យខ្ញុំ ហើយគាត់ពិគ្រោះខ្ញុំ ព្រោះគាត់ជាអ្នកស្រាវជ្រាវពីការអភិវឌ្ឍសង្គម។គាត់ថាបើចង់ឲ្យឃុំហ្នឹងរីកចម្រើន សម្បូរសប្បាយ ដូចទីក្រុងដែរនោះ ទាល់តែមានថវិការហូតដល់មួយលានដុល្លារ ក្នុងមួយឃុំៗ ក្នុងមួយឆ្នាំ អាហ្នឹងធ្វើអីឃុំហ្នឹងដូចទីក្រុងអញ្ចឹង សប្បាយដូចគ្នាអញ្ចឹង គឺសុវត្ថិភាពជឿនលឿនដូចគ្នាអញ្ចឹង»។
លោក កឹម សុខា បានការពារគោលនយោបាយថ្មីនោះ បែបនេះថា៖ «សុំបញ្ជាក់ជូនណាស់ តិចបោះឆ្នោតហើយ ឃើងឈ្នះឃុំ សង្កាត់ យើងធ្វើមេឃុំ ស្រាប់គេបញ្ចេះថា លុយ៥០ម៉ឺននៅឯណា? កុំដូចអា៤ម៉ឺនហ្អាក កុំលេងអាហ្នឹង។ ៤ម៉ឺនយើងថា យើងឈ្នះឆ្នោតដឹកនាំរដ្ឋាភិបាលជូនចាស់ៗមួយខែម្នាក់៤ម៉ឺន ដល់គេយកមកបំភ្លៃថា ហ្អេឈ្នះហើយឲ្យលុយ៤ម៉ឺនមក ឲ្យទៅទារពី កឹម សុខា។ និយាយនេះ និយាយបំភ្លឺសម៉ង អញ្ចឹងបានប្រជាពលរដ្ឋលែងបោះឆ្នោតឲ្យ»។
កន្លងទៅលោកនាយករដ្ឋមន្ត្រី ហ៊ុន សែន ធ្លាប់រិះគន់គោលនយោបាយ របស់គណបក្សប្រឆាំងថា ជាការសន្យាខ្យល់។
គោលនយោបាយអាទិភាព ៥ចំនុច ដែលបក្សប្រឆាំងលើកឡើងថា សម្រាប់យកទៅឃោសនាប្រកួតប្រជែងការបោះឆ្នោតឃុំសង្កាត់នោះ មានពាក្យថា «ដូរមេឃុំបម្រើបក្ស ដាក់មេឃុំបម្រើរាស្ត្រ ពង្រឹងសិទ្ធិអំណាចដល់ប្រជាពលរដ្ឋ ផ្តល់ឱកាសនឹងលើកទឹកចិត្តដល់ប្រជាពលរដ្ឋឲ្យបង្កើតសហគមន៍ ផ្តល់យោបបល់វាយតម្លៃនិងចូលរួមធ្វើសេចក្តីសម្រេចចិត្តនានាក្នុងឃុំសង្កាត់។ លើកកម្ពស់ជីវភាពប្រជាពលរដ្ឋ និងអភិវឌ្ឍន៍»។
ការពារកម្មសិទ្ធិដីធ្លីស្របច្បាប់ របស់ប្រជាពលរដ្ឋ មិនចុះហត្ថលេខា លើការវិនិយោគ ឬសម្បទានណាដែលប៉ះពាល់ដល់ផលប្រយោជន៍ប្រជាពលរដ្ឋ និងជាតិ។ ផ្តល់ថវិការយ៉ាងតិច ៥០ម៉ឺនដុល្លារ សម្រាប់ឃុំ សង្កាត់និមួយៗក្នុងមួយឆ្នាំ ស្មើនឹង២០ភាគរយនៃថវិកាជាតិ ជាដើម ខណៈបច្ចុប្បន្នឃុំមួយចំនួនទទួលបានចន្លោះពី២ម៉ឺន៥ពាន់ដុល្លារ ទៅ៥ម៉ឺនដុល្លារ។
នាយកប្រតិបត្តិ សម្ព័ន្ធគណនេយ្យភាពសង្គមកម្ពុជា លោក សន ជ័យ លើកឡើងថា ការបង្កើតថវិការ ទៅដល់ឃុំ សង្កាត់ លោកថា ជាការប្រើសើមួយក្នុងការពង្រឹងអំណាចនៅថ្នាក់មូលដ្ឋាន ប៉ុន្តែលោក ដើម្បីបានជោគជ័យ គេត្រូវពង្រឹងធនធានមនុស្សក្នុងការគ្រប់គ្រង និងចាយវាយថវិការឲ្យមានតម្លាភាព។
លោកថា៖«បើឃុំមិនទាន់រឹងមាំដូចសព្វថ្ងៃនេះ ទាំងឃុំ ទាំងសង្កាត់ហ្នឹងបើឲ្យលុយទៅច្រើន ក៏ពិបាកក្នុងការគ្រប់គ្រង និងការចាត់ចែងដែរ ដោយសារអី ដោយសារតែផែនការឃុំសង្កាត់មួយចំនួនមិនទាន់ស្របទៅតាមគោលនយោបាយ ស្តីពីវិមជ្ឈការនៅឡើយទេ បានន័យថាពួកគេមានសមត្ថភាពខ្វះខានច្រើនក្នុងការរៀបចំផែនការ ការលើកផែនការ ហើយនិងការគ្រប់គ្រងហិរញ្ញវត្ថុ»។
បើតាមលោក កឹម សុខា បើឃុំសង្កាត់ ទទួលបានថវិការ៥០ម៉ឺនដុល្លារក្នុងមួយឆ្នាំ លោក ត្រឹម៥ឆ្នាំ ពួកគេអាចកសាងសាបឋមសិក្សាបានគ្រប់គ្រាន់សម្រាប់បណ្តុះបណ្តាលធនធានមនុស្ស ដោយមិនចាំបាច់ រងចាំការទម្លាក់លុយពីថ្នាក់ដឹកនាំថ្នាក់ជាតិនោះទេ៕