សាលារាជធានីភ្នំពេញឲ្យដឹងថា ខ្លួននឹងចាត់វិធានការលើគណបក្សសង្គ្រោះជាតិ ប្រសិនបើនៅតែកៀរគអ្នកគាំទ្រពីបណ្ដាលខេត្តឲ្យឡើងមករាជធានីភ្នំពេញ ដើម្បីមកចូលរួមដង្ហែក្បួនឃោសនាថ្ងៃនេះ។
ក្នុងសេចក្ដីជូនដំណឹងរបស់សាលារាជធានីភ្នំពេញចុះថ្ងៃទី០១ ខែមិថុនា ឆ្នាំ២០១៧ ឲ្យដឹងថា ការប្រកាសរបស់បក្សប្រឆាំងដែលឲ្យកៀរគអ្នកគាំទ្រមកពីបណ្ដាលខេត្ត ឲ្យឡើងមកចូលរួមឃោសនានៅក្នុងរាជធានីភ្នំពេញនៅថ្ងៃនេះថា មិនស្របតាមបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ ជាពិសេសបានធ្វើឲ្យប៉ះពាល់សន្តិសុខ សណ្ដាប់ធ្នាប់ និងរបៀបរៀបរយសាធារណៈក្នុងរាជធានីភ្នំពេញ។ សេចក្ដីជូនដំណឹងឲ្យដឹងបន្តថា សាលារាជធានីភ្នំពេញនឹងចាត់វិធានការទៅលើគណបក្សសង្គ្រោះជាតិ ប្រសិនបើនៅតែមិនបញ្ឈប់ការកៀរគរកអ្នកគាំទ្រពីបណ្ដាលខេត្តមកហែក្បួន បិទយុទ្ធនាការឃោសនាបោះឆ្នោតនៅថ្ងៃទី២ខែមិថុនា។
នៅថ្ងៃទី១ខែមិថុនាម្សិញនេះ គណៈកម្មាធិការជាតិរៀបចំការបោះឆ្នោត ក៏បានចេញសេចក្ដីជូនដំណឹងមួយ ដោយឲ្យគណបក្សសង្គោះជាតិគោរពទៅតាមការជូនដំណឹងរបស់សាលារាជភ្នំពេញផងដែរ។
ពាក់ព័ន្ធរឿងនេះ VOD មិនអាចទាក់ទងអ្នកនាំពាក្យគណបក្សសង្គ្រោះជាតិបាននៅឡើយទេ ដោយទូរសព្ទចូលមិនមានអ្នកទទួល។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី មានប្រសានស៍ថា ការជូនដំណឹងរបស់សាលារាជធានីភ្នំពេញថា មិនមានអ្វីភ្ញាក់ផ្អើលនោះទេ ដោយសារ កន្លងមក សាលារាជធានីភ្នំពេញតែងតែមានវិធានការទៅលើគណបក្សប្រឆាំង ប៉ុន្តែសម្រាប់គណបក្សប្រជាជនកម្ពុជាវិញ មិនដែលចាត់វិធានការអ្វីឡើយ។
លោកថា «ខ្ញុំមើលទៅប្រសិនសង្គ្រោះជាតិមានទំនុកចិត្តខ្លួនឯង មិនបាច់ខ្វល់ទៅប្រមូលមនុស្សពីតាមជនបទ ពីតាមខេត្តមកទេ។ យើងក៏ដឹងហើយថា វិធានការទាំងឡាយដែលបានចាត់មកដល់ពេលនេះ វាតែងមានការលំអៀង ឃើញលំអៀងជាញឹកញាប់ ដូចជាពេលខ្លះ គណបក្សមួយធ្វើបាន ប៉ុន្តែគណបក្សមួយទៀតធ្វើមិនបាន។ ចឹងអាហ្នឹងក៏មិនមានអីភ្ញាល់ផ្អើលដែរ ហើយខ្ញុំក៏គាំទ្រដែលពីរឿងសាលាក្រុងភ្នំពេញ ដែលតែងតែយករឿងចរាចរណ៍ មកដាក់ជាបញ្ហាធំ ប៉ុន្តែបើយើងមើលការស្ទះចរាចរណ៍ទោះបីជាមិនមានហែគណបក្ស ក៏ការស្ទះចរាចរណ៍វានៅតែមានជារាំរៃតាំងពីយូរមកហើយ»។
យ៉ាងណាក៏ដោយ នៅថ្ងៃទី២ខែមិថុនានេះ គណបក្សធំៗចំនួនពីរមាន គណបក្សប្រជាជនកម្ពុជា និងគណបក្សសង្គ្រោះជាតិ ជាគណបក្សដែលមានអាសនៈនៅក្នុងសភាទាំងពីរនេះ កំពុងរៀបចំការហែក្បួនធំនៅរាជធានីភ្នំពេញ សម្រាប់ការឃោសនារកការគាំទ្រ នៅថ្ងៃបិទយុទ្ធនាការឃោសនាបោះឆ្នោតក្រុមប្រឹក្សាឃុំ-សង្កាត់នេះ។
លោក ហ៊ុន សែន ដឹកនាំអ្នកគាំទ្រជួបជុំគ្នាពេលព្រឹកនៅផ្លូវ៦០ម៉ែត្រ បឹងទំពុន បន្ទាប់ពីថ្លែងសារនយោបាយហើយហែទៅកាន់តំបន់ផ្សេងៗក្នុងរាជធានីភ្នំពេញ ដើម្បីជួបអ្នកគាំទ្រ ក៏ដូចជាផ្សព្វផ្សាយគោលនយោបាយអភិវឌ្ឍន៍ឃុំសង្កាត់សម្រាប់ការបោះឆ្នោតចុងសប្តាហ៍នេះ។
ចំណែកលោក កឹម សុខា ជួបជុំអ្នកគាំទ្រនៅត្រើយម្ខាងនៃទន្លេ នៅពេលរសៀល ដោយមានថ្លែងសារនយោបាយ ហើយអ្នកគាំទ្រមានការប្រគំតន្ត្រី បន្ទាប់មកនឹងផ្តើមហែបក្សទៅតំបន់ផ្សេងៗ ក្នុងរាជធានីភ្នំពេញ៕