កំណាត់ផ្លូវជាតិលេខ៤៤ស្តារឡើងវិញកាត់ក្រុងច្បារមននិងស្រុក៤ផ្សេងទៀតនៃខេត្តកំពង់ស្ពឺដែលទទួលបានកម្ចីពីចិន ត្រូវរដ្ឋាភិបាលប្រកាសបើកឲ្យប្រើប្រាស់ជាផ្លូវការនៅព្រឹកថ្ងៃអង្គារនេះ។
ក្នុងសុន្ទរកថារបស់លោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនក្នុងពិធីបើកសម្ពោធផ្លូវនៅព្រឹកនេះបានឲ្យដឹងថាកំណាត់ផ្លូវជាតិលេខ៤៤ មានប្រវែង១៣៩,៦១គឺឡូម៉ែត្រ។ ផ្លូវនេះកាត់ក្រុងច្បារមននិង ស្រុក៤ផ្សេងទៀតរួមមាន ស្រុកសំរោងទង ស្រុកឱរ៉ាល់ ស្រុកថ្ពង និងស្រុកឧត្តុង្គ។
គម្រោងស្តារឡើងវិញនូវកំណាត់ផ្លូវជាតិលេខ៤៤នេះចំណាយអស់៨០,៣០លានដុល្លារជាថវិកាកម្ចីឥណទានពីចិននិងប្រាក់បដិភាគរបស់រដ្ឋាភិបាលចំនួន៥ ២៣៣ ៧២៨ដុល្លារអាមេរិក។ គម្រោងនេះអនុវត្តសាងសង់ដោយក្រុមហ៊ុនសាជីវកម្ម ស្ពាន និងថ្នល់របស់ចិន៕