សមាគមរោងចក្រកាត់ដេរនៅកម្ពុជា ហៅកាត់ថា GMAC បានអំពាវនាវទៅអ្នកបញ្ជាទិញអន្តរជាតិទាំងអស់ ឲ្យបន្តគាំទ្រដល់កម្ពុជា និង រោងចក្រជាសមាជិក ដោយថា ដើម្បីសម្រេចគោលដៅសេដ្ឋកិច្ចកម្ពុជា ខណៈដែលសហគមន៍អន្តរជាតិ បានព្រមានដាក់ទណ្ឌកម្មសេដ្ឋកិច្ចមកលើប្រទេសកម្ពុជា បន្ទាប់ពីការរំលាយបក្សប្រឆាំងដ៏ធំ។
គណបក្សសង្គ្រោះជាតិ ដែលទទួលបានសំឡេងគាំទ្រប្រហែល ៣លានសំឡេង នៅក្នុងការបោះឆ្នោតជាតិកាលពីឆ្នាំ២០១៣នោះ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ទៅតាមបណ្ដឹងរបស់ក្រសួងមហាផ្ទៃ ហើយថ្នាក់ដឹកនាំ ១១៨របស់បក្សនេះ ត្រូវបានហាមឃាត់មិនឲ្យធ្វើនយោបាយរយៈពេល ៥ឆ្នាំ។
ក្រោយពីបក្សប្រឆាំងដ៏ធំមួយនេះ ត្រូវបានរំលាយ ហើយអាសនៈសភា ៥៥របស់បក្សនេះក៏ត្រូវបានដកហូត និងបែងចែកនោះ សហគមន៍អន្តរជាតិ នាំមុខដោយសហរដ្ឋអាមេរិក សហភាពអឺរ៉ុប និងចក្រភពអង់គ្លេស បានព្រមានសើរើភាពអនុគ្រោះពន្ធសម្រាប់ទំនិញនាំចូលពីប្រទេសកម្ពុជា ដែលនេះគឺជាផ្នែកមួយនៃការប្រតិកម្មទៅនឹងវិធានការរដ្ឋាភិបាលកម្ពុជានាពេលថ្មីៗនេះ។
ស្ថិតក្នុងស្ថានភាពនយោបាយមិនច្បាស់លាស់បែបនេះ GMAC អំពាវនាវទៅអ្នកបញ្ជាទិញអន្តរជាតិទាំងអស់ ឲ្យបន្តគាំទ្រដល់កម្ពុជា និង រោងចក្រជាសមាជិក ដោយថា ដើម្បីសម្រេចគោលដៅសេដ្ឋកិច្ច និងនាំមកនូវសុខុមាលភាពប្រសើរឡើងរបស់ពលរដ្ឋ។ តំណាងរោងចក្រកាត់ដេរមួយនេះ បានអំពាវនាវបែបនេះនៅក្នុងសេចក្ដីថ្លែងការណ៍មួយកាលពីថ្ងៃម្សិលមិញនេះ។
GMAC ក៏បានស្នើទៅអ្នកបញ្ជាទិញអន្តរជាតិ កុំឲ្យបកស្រាយស្ថានការណ៍នយោបាយបច្ចុប្បន្ន ទៅជាសកម្មភាពណាមួយដែលនឹងធ្វើឲ្យប៉ះពាល់ជាអវិជ្ជមានដល់ផលិតកម្ម និងសង្វាក់ផ្គត់ផ្គង់នៃឧស្សាហកម្មកាត់ដេរ។
ក្នុងសេចក្ដីថ្លែងការណ៍ដដែលនោះ GMAC លើកឡើងបន្តថា សមាគមចង់រក្សាឲ្យមានប្រតិបត្តិការរលូនសម្រាប់រោងចក្រជាសមាជិកចំនួន ៦០០ ដែលទ្រទ្រង់សេដ្ឋកិច្ចដល់កម្មករជាង ៧០ម៉ឺននាក់ ដែលភាគច្រើនជាស្រ្តីទ្រទ្រង់សមាជិកគ្រួសារពួកគេ ដែលជាពលរដ្ឋប្រមាណ ២លាននាក់ទៀត។
សេចក្ដីថ្លែងការណ៍ដដែលបន្តថា និយោជក កម្មករទាំងអស់ ព្រមទាំងសហជីព កំពុងធ្វើការងារដូចធម្មតា និង ដោយសន្តិភាព ដើម្បីផ្គត់ផ្គង់សេដ្ឋកិច្ចផ្ទាល់ខ្លួនរបស់ពួកគេ និងសេដ្ឋកិច្ចកម្ពុជា ហើយការអភិវឌ្ឍនៃឧស្សាហកម្មរបស់កម្ពុជារហូតមកដល់ពេលនេះ បានយកប្រជាពលរដ្ឋរាប់លាននាកចេញពីភាពក្រីក្រ។
GMAC អះអាងថា រដ្ឋាភិបាលកម្ពុជា និងនិយោជក នៅតែប្ដេជ្ញាភ្ជាប់ឧស្សាហ៍កម្មកម្ពុជាទៅនឹងលក្ខខណ្ឌការងារប្រសើរឡើងតាមរយៈការគោរពច្បាប់ជាតិ និងស្ដង់ដារការងារអន្តរជាតិ៕