នគរបាលបានបង្ហាញរបាយការណ៍ថា ចំនួនអ្នកស្លាប់ដោយសារគ្រោះថ្នាក់ចរាចរណ៍នៅក្នុងខែកុម្ភៈឆ្នាំ២០១៧មានចំនួន១៤០នាក់និងរងរបួសចំនួន៤១៨នាក់ ដែលចំនួនអ្នកស្លាប់មានការថយចុះ១៧% បើប្រៀបធៀបទៅនឹងខែមករាឆ្នាំដដែល។
របាយការណ៍បានបង្ហាញនៅក្នុងកិច្ចប្រជុំផ្សព្វផ្សាយសេចក្តីណែនាំស្តីពីការកែសម្រួលវិធានការត្រួតពិនិត្យរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក នៅអគ្គស្នងការដ្ឋាននគរបាលជាតិ នៅព្រឹកថ្ងៃសុក្រនេះ។ នេះបើតាមអគ្គស្នងការដ្ឋាននគរបាលជាតិ។
អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ លោក ទី ឡុង ថ្លែងនៅក្នុងកិច្ចប្រជុំនោះថា នៅរាជធានីភ្នំពេញមានអ្នកស្លាប់ច្រើនជាងគេ បន្ទាប់មកនៅខេត្តពោធិ៍សាត់ និងបន្ទាយមានជ័យ។ លោកថា មូលហេតុនៃគ្រោះថ្នាក់ចរាចរណ៍នេះគឺ បើកលើសល្បឿនកំណត់ មិនគោរពសិទ្ធិអាទិភាព មិនប្រកាន់ស្តាំ បើកបរក្នុងស្ថានភាពស្រវឹង បើកប្រជែងគ្នា កត្តាយានយន្ត ស្ថានភាពផ្លូវ និង បើកបរទាំងងងុយ។
របាយការណ៍នគរបាលឲ្យដឹងទៀតថា ក្នុង១ថ្ងៃជាងមធ្យមគ្រោះថ្នាក់ចរាចរណ៍បានសម្លាប់មនុស្សអស់៥នាក់ និងប្រមាណ១៤នាក់រងរបួស៕