រដ្ឋាភិបាលបញ្ជាឲ្យមន្រ្តីដោះស្រាយបញ្ហាខ្វះទឹកនៅតាមសាលារៀន

រដ្ឋមន្រ្តីក្រសួងអប់រំយុវជន និងកីឡាបានបញ្ជាឲ្យមន្រ្តីមន្ទីរអប់រំទាំង២៥រាជធានីខេត្តចូលរួមដោះស្រាយជាបន្ទាន់នូវបញ្ហាខ្វះខាតទឹកសម្រាប់ប្រើប្រាស់នៅតាមសាលារៀនតាមតំបន់ដាច់ស្រយាល។

ក្រសួងអប់រំបានចេញលិខិតមួយទៅកាន់ប្រធានមន្ទីរអប់រំរាជធានីខេត្តចុះថ្ងៃទី០២ ខែឧសភាបានឲ្យដឹងថាបច្ចុប្បន្នប្រទេសកម្ពុជាកំពុងជួបប្រទះនូវបម្រែបម្រួលអាកាសធាតុក្ដៅហួតហែងបណ្ដាលឲ្យខ្វះខាត់ទឹកប្រើប្រាស់យ៉ាងខ្លាំង។ ដូច្នេះក្រសួងអប់រំជំរុញឲ្យមន្ទីរអប់រំទាំងអស់ធ្វើការណែនាំទៅដល់សាលារៀនដែលខ្វះទឹក ឲ្យប្រើប្រាស់នូវថវិកាសម្រាប់ដំណើរការសាលារៀន ដើម្បីចំណាយទិញទឹកប្រើប្រាស់។

ក្នុងលិខិតដដែលឲ្យដឹងថាថវិកាដែលប្រើប្រាស់សម្រាប់ដំណើរការសាលារៀននោះមានដូចជា ថវិកាសម្រាប់ស្បៀង ទឹក ថវិកាជំនួយសម្រាប់លំអសាលា ថវិកាក្នុងខ្ទង់ប្រជុំ ថវិកាសម្ភារៈកែលំអបរិស្ថាន និងទីធ្លាកំសាន្តជាដើម។

គួរបញ្ជាក់ថាទាក់ទងនឹងការប្រែប្រួលអាកាសធាតុក្ដីនេះដែរកាលពីថ្មីៗនេះ ក្រសួងអប់រំក៏បានសម្រេចបន្ថយម៉ោងបង្រៀនពីម៉ោង១១មកត្រឹមម៉ោង១០និង៣០នាទីព្រឹក និងពេលល្ងាចពីម៉ោង០១ មកម៉ោង០១និង៣០នាទី ដោយអះអាងថា ដើម្បីជៀសវាងប៉ះពាល់ដល់សុខភាពសិស្សានុសិស្សពីអាកាសធាតុក្ដៅខ្លាំង៕