របាយការណ៍ថ្មីមួយរកឃើញថា ស្ត្រីអ្នកសារព័ត៌មានកម្ពុជាប្រឈមនឹងការបៀតបៀនផ្លូវភេទខ្ពស់នៅកន្លែងធ្វើការ ប៉ុន្តែមិនហ៊ាននិយាយចេញ។
ក្នុងរបាយការណ៍សិក្សាទូទៅស្តីពី «ការឆ្ពោះទៅរកសមភាពយេនឌ័រ-ស្ត្រី និងវិស័យសារព័ត៌មាននៅកម្ពុជា» ដែលផ្សព្វផ្សាយចំទិវាសេរីភាពសារព័ត៌មានពិភពលោកឆ្នាំ២០១៨នេះ បានឲ្យដឹងថា ក្នុងចំណោមស្ត្រី២៣នាក់មានតែ៤នាក់ ប៉ុណ្ណោះបាននិយាយថា ខ្លួនធ្លាប់ទទួលរងការបំពានផ្លូវភេទ។
របាយការណ៍ដែលស្រាវជ្រាវដោយវិទ្យស្ថាន Fojo របស់ប្រទេសស៊ុយអ៊ែតដដែលនេះបន្តថា មូលហេតុដែលស្ត្រីអ្នកសារព័ត៌មានមិនហ៊ាននិយាយលម្អិត ដោយសារតែអ្នកបំពានគឺមិត្តរួមការងារ និងជាអ្នកគ្រប់គ្រងនៅកន្លែងធ្វើការ ឬជាបុគ្គលសាធារណៈដែលមានមុខមាត់។
បើតាមរបាយការណ៍ ក្រុមពិភាក្សាជាស្ត្រី បានលើកឡើងនូវនិន្ន័យជាច្រើនទាក់ទងទៅនឹងការបៀតបៀនផ្លូវភេទជាច្រើនករណី រួមទាំងការនិយាយស្តីមិនសមរម្យ បញ្ឆិតបញ្ឆៀង ត្រូវបានថ្នាក់លើប៉ះពាល់ ឬ ស្ទាបអង្អែល ត្រូវចៅហ្វាយនាយញ៉ែតាមទូរសព្ទ និង២ករណីទៀត គឺបុគ្គលិកបុរសមើលរឿងអាសអាភាសនៅក្នុងការិយាល័យ។ នៅក្នុងរបាយការណ៍ដដែល ស្ត្រីអ្នកសារព័ត៌មានវ័យក្មេងមួយចំនួនបាននិយាយថា បុរសជាច្រើន មិនហ៊ានរំខានគាត់ទេ ដោយសារគាត់ត្រូវបានគេចាត់ទុកថា ជាស្ត្រីខ្លាំង។
រដ្ឋមន្ត្រីក្រសួងកិច្ចការនារី លោកស្រី អ៊ឹង កន្ឋាផាវី មានប្រសាសន៍ថា លោកស្រីចង់ឲ្យមានការស្រាវជ្រាវបន្ថែមទៀត ដើម្បីឲ្យប្រាកដចំពោះករណីបៀតបៀនផ្លូវភេទនេះ ហើយថា ក្រសួងកិច្ចការនារីកំពុងតែផ្តោតលើការអប់រំនិងចង់ឲ្យស្ត្រីជាអ្នកសារព័ត៌មានហ៊ាននិយាយធ្វើជាគំរូ។
រដ្ឋមន្ត្រីក្រសួងកិច្ចការនារី លោកស្រី អ៊ឹង កន្ឋាផាវី
នាយិកាប្រតិបត្តិអង្គការ SILAKA លោកស្រី ធីតា ឃឹះ មានសាសន៍ថា លោកស្រីជឿថា ការស្រាវជ្រាវនេះ មានភាពត្រឹមត្រូវច្រើន និងចង់ឲ្យមានយន្តការជួយដល់ស្ត្រីហ៊ានប្តឹងអំពីករណីបៀតបៀននេះ។
នាយិកាប្រតិបត្តិអង្គការ SILAKA លោកស្រី ធីតា ឃឹះ
របាយការណ៍នេះ ក៏បានរកឃើញផងដែរថា ចំនួនបុរសធ្វើការក្នុងវិស័យសារព័ត៌មាននៅតែមានច្រើនជាងស្ត្រី បើទោះជាមាននិស្សិតស្ត្រីដែលទើបបញ្ចប់ការសិក្សាផ្នែកសារព័តមានកាន់តែច្រើនឡើង ចាប់ផ្តើមចូលប្រឡូកក្នុងវិស័យនេះប៉ុន្មានឆ្មាំចុងក្រោយនេះក៏ដោយ។
របាយការណ៍ក៏រកឃើញដែរថា ស្ត្រីប្រឈមនឹងសម្ពាធការងារ ជាពិសេសក្រុមគ្រួសារដែលព្រួយបារម្ភពីសុវត្ថិភាព និង ទទួលបានឱកាសបណ្តុះបណ្តាលតិចជាងបុរស៕