លោកនាយករដ្ឋមន្រ្តី ហ៊ុន សែន ទទួលស្គាល់ថាប្រព័ន្ធផ្សព្វផ្សាយជាដៃគូដ៏សំខាន់របស់រដ្ឋាភិបាលដែលមិនអាចខ្វះបាននៅ ក្នុងសង្គមប្រជាធិបតេយ្យ។
ក្នុងសារលិខិតអបអរសាទរ «ទិវាសិទ្ធិសេរីភាពសារព័ត៌មានពិភពលោក» នាថ្ងៃទី៣ខែឧសភានេះ លោកនាយករដ្ឋមន្រ្តី ហ៊ុន សែន បញ្ជាក់ថា រដ្ឋាភិបាលត្រូវការជាចាំបាច់នូវប្រព័ន្ធផ្សព្វផ្សាយប្រកប ដោយគុណភាពយុត្តិធម៌និងព័ត៌មានពិត ហើយថាសារព័ត៌មានត្រូវដើរតួនាទីជាកញ្ចក់ឆ្លុះបញ្ចាំងពីភាពពិតជាក់ស្ដែងក្នុងសង្គម ប្រកាន់ភាពនៅកណ្ដាល ហ៊ាននិយាយការពិត និងហ៊ានរិះគន់ក្នុងន័យស្ថាបនា ដើម្បីចូលរួមការលើកស្ទួយលទ្ធិប្រជាធិបតេយ្យ យុត្តិធម៌សង្គម នីតិរដ្ឋ សន្តិភាព និងការអភិវឌ្ឍ។
លិខិតដដែលនេះ លោក ហ៊ុន សែន បញ្ជាក់ថា ដើម្បីលើកស្ទួយសេរីភាពសារព័ត៌មាននិងនីតិរដ្ឋ រាជរដ្ឋាភិបាលកម្ពុជាអនុវត្តគោលការណ៍សំខាន់ពីរ គឺសេរីភាពក្នុងការផ្សាយព័ត៌មាន ដោយគ្មានការត្រួតពិនិត្យជាមុន និងការផ្ដល់សិទ្ធិអោយជនបរទេសអាចធ្វើជាម្ចាស់ស្ថាប័នប្រព័ន្ធផ្សព្វផ្សាយព័ត៌មានបាន។
ប៉ុន្តែ របាយការណ៍របស់អង្គការអ្នកសារព័ត៌មានគ្មានព្រំដែនដែល ផ្សាយកាលពីថ្ងៃទី២៥ខែមេសាឆ្នាំ២០០១៨នេះ សេរីភាពសារព័ត៌មាននៅកម្ពុជា បានធ្លាក់ចំណាត់ថ្នាក់ដល់ទៅ១០លេខ ក្នុងតារាងសន្ទស្សន៍សេរីភាពសារព័ត៌មានពិភពលោក ពោលគឺនៅឆ្នាំនេះកម្ពុជាស្ថិតនៅលេខរៀងទី១៤២ ធៀបនឹងចំណាត់ថ្នាក់១៣២កាលពីឆ្នាំមុន។
របាយការណ៍ដដែលបង្ហាញថា ការធ្លាក់ចុះនៃសេរីភាពសារព័ត៌មាននេះបណ្ដាលមកពីការបិទស្ថានីយ៍វិទ្យុជាង៣០ ការបិទការសែតខេមបូឌា ដេលី វិទ្យុអាស៊ីសេរី និងការចាប់ខ្លួនអ្នកសារព័ត៌មានជាដើម៕