មន្ត្រីនគរបាលចរាចរណ៍ផ្លូវគោក២នាក់ ត្រូវបានផ្អាកការងារបណ្តោះអាសន្ន ក្រោយរងការចោទថា ពួកគេបានទារប្រាក់ពីជនបរទេស ដែលបើកបរមិនគោរពភ្លើងសញ្ញាចរាចរណ៍ ចំនួន២០ដុល្លារ ជាថ្នូរនឹងការមិនចាប់បញ្ជូនទៅការិយាល័យ ធ្វើការផាកពិន័យ។
បើតាមការចុះផ្សាយរបស់អគ្គស្នងការដ្ឋាននគរបាលជាតិ ដែលដកស្រង់សម្ដីរបស់នាយការិយាល័យនគរបាលចរាចរណ៍ផ្លូវគោករាជធានីភ្នំពេញ លោក សែម គន្ធា នៅថ្ងៃនេះថា មន្ត្រីនគរបាលចរាចរណ៍ទាំង២នាក់ ដែលទារប្រាក់ពីជនបរទេសបើកបរមិនគោរពភ្លើងសញ្ញាចរាចរណ៍ ចំនួន២០ដុល្លារនោះ ត្រូវបានផ្អាកពីការងារជាបណ្តោះអាសន្ន ពីការិយាល័យនគរបាលចរាចរណ៍ផ្លូវគោករាជធានីភ្នំពេញ។
លោកបន្តថា ការផ្អាកនេះ ដោយសារ ពួកគេប្រព្រឹត្តខុសនឹងវិន័យកងកម្លាំងលេខ០០៦របស់នគរបាលជាតិ ដោយផាកពិន័យលើសគោលការណ៍និងមិនបានចេញវិក័យបត្រ ដែលធ្វើឲ្យប៉ះពាល់ដល់កិត្តិយសមន្ត្រីនគរបាលផ្សេងទៀត។
ទោះជាយ៉ាងណា ការចាត់វិធានការលើមន្ត្រីនគរបាលទាំង២នាក់ ធ្វើឡើងបន្ទាប់ពីមានការមតិរិៈគន់ពីមហាជន ក៏ដូចជាអ្នកលេងបណ្តាញសង្គម ដែលបានចែករំលែកតៗគ្នានូវវីដេអូ ពាក់ព័ន្ធនឹងករណីមន្ត្រីនគរបាលចរាចរណ៍២នាក់ ដែលបានទារប្រាក់ពីជនបរទេសកាលពីពេលថ្មីៗនេះ៕
