ក្រុមសមាជិកសភាអាស៊ានទទួលបន្ទុកផ្នែកសិទ្ធិមនុស្ស បានហៅការចាប់ខ្លួនមេដឹកនាំបក្សប្រឆាំង លោក កឹម សុខា ថា ធ្វើឡើងដោយរំលោភបំពានលើអភ័យឯកសិទ្ធិសភា ដែលត្រូវបានធានាដោយរដ្ឋធម្មនុញ្ញ។
មេដឹកនាំគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចកម្ពុជាចាប់ខ្លួនកាលពីម៉ោង ១២ និង ៣៥នាទីរំលងអធ្រាត្រឈានចូលថ្ងៃទី០៣ ខែកញ្ញានេះ នៅឯគេហដ្ឋានរបស់លោក។
ប្រធានគណៈកម្មការសិទ្ធិមនុស្សនៃសភាអាស៊ាន លោក Charles Santiago បានលើកឡើងក្នុងសេចក្តីថ្លែងការណ៍ថា ការចាប់ខ្លួនលោក កឹម សុខា បានបំពានលើអភ័យឯកសិទ្ធិសភាដែលការពារដោយរដ្ឋធម្មនុញ្ញ។
ក្នុងសេចក្ដីថ្លែងការណ៍ដដែលនោះ លោក Charles Santiago ដែលជាសមាជិកសភាម៉ាឡេស៊ីផងនោះ ក៏បានលើកឡើងថា ការចាប់ខ្លួននេះ គឺជាសកម្មភាពមួយគួរឲ្យព្រួយបារម្ភ ដោយថា ជាការប៉ុនប៉ងរបស់រដ្ឋាភិបាលបក្សកាន់អំណាចក្នុងការបំភ័យ និងកម្ទេចបក្សប្រឆាំង មុនការយុទ្ធនាការបោះឆ្នោតមកដល់។
លោក Charles Santiago បន្ថែមថា សកម្មភាពគំរាមកំហែងបែបនេះ ហាក់បង្ហាញថា លោកនាយករដ្ឋមន្រ្តី ហ៊ុន សែន ភ័យខ្លាចនឹងលទ្ធផលបោះឆ្នោត ទើបមិនចង់ឲ្យមានការប្រកួតប្រជែងទាល់តែសោះ។
ក្នុងសេចក្ដីថ្លែងការណ៍នោះ លោក Charles Santiago បានលើកឡើងថា លោក កឹម សុខា គួរតែត្រូវបានដោះលែងវិញភ្លាមៗ ដោយគ្មានលក្ខខណ្ឌ។ លោកក៏ជម្រុញទៅសមាជិកនៃសហគមន៍អន្តរជាតិ រួមទាំងម្ចាស់ជំនួយរបស់កម្ពុជា ឲ្យមានចំណាត់ការលើបញ្ហានេះភ្លាមៗ ពុំនោះទេ ពួកគេអាចប្រឈមនឹងការបញ្ចប់សកម្មភាពក្នុងរបបផ្ដាច់ការកម្ពុជានេះ៕
