លោកនាយករដ្ឋមន្ត្រី ហ៊ុន សែន បានព្រមានរំលាយគណបក្សសង្គ្រោះជាតិ ប្រសិនបើលូកដៃចូលក្នុងរឿងចាប់ខ្លួនប្រធានគណបក្សសង្គ្រោះជាតិ លោក កឹម សុខា។
ការព្រមាននេះ បន្ទាប់ពីមានការចាប់ខ្លួនលោក កឹម សុខា ដោយគ្មានដីកា កាលពីពាក់កណ្ដាលអធ្រាត្រឈានចូលថ្ងៃទី០៣ កញ្ញានេះ ចំពោះអ្វីដែលរដ្ឋាភិបាលកម្ពុជាចាត់ទុកថា ជាបទល្មើសជាក់ស្ដែង ដែលលោក កឹម សុខា បានថ្លែងនៅក្នុងប្រទេសអូស្រ្តាលី កាលពីជាង ៤ឆ្នាំមុន។
លោក ហ៊ុន សែន លើកឡើងថា៖ «ការចាប់ខ្លួនត្រូវធ្វើភ្លាមអត់មានបង្អង់ទេ ហើយបើគណបក្សលូកដៃ ការពារក្នុងរឿងនេះ ក៏នឹងត្រូវជួបវាសនានៃការរំលាយចោលគណបក្ស»។
លោក ហ៊ុន សែន លើកឡើងថា ការចាប់មនុស្សម្នាក់ជាជាងការយកកម្លាំងប្រដាប់អាវុធទៅបង្រ្កាបដល់គណបក្សសង្គ្រោះជាតិ ដោយថា នេះជាការទទួលខុសត្រូវរបស់លោក កឹម សុខា ជាមួយនឹងពលរដ្ឋដើម្បីធានាដល់គណបក្សរបស់ខ្លួន។
ទោះជាយ៉ាងណា គណបក្សសង្គ្រោះជាតិបានចេញសេចក្ដីថ្លែងការណ៍ដោយថ្កោលទោសចំពោះការចាប់ខ្លួននេះ និង ទាមទារឲ្យដោះលែងដោយគ្មានលក្ខខណ្ឌ។
ជាមួយគ្នានោះ ប្រធានក្រុមសមាជិកសភាអាស៊ានដើម្បីសិទ្ធិមនុស្ស លោក Charles Santiago និងសមាជិកសភាអាមេរិក លោក Alan Lowenthal ហៅការចាប់ខ្លួននេះថា ជាការបង្រ្កាបទៅលើសេរីភានយោបាយ ធ្វើឲ្យប្រជាធិបតេយ្យដើរថយក្រោយ ហើយការបោះឆ្នោតខាងមុខនឹងមិនសេរី និងយុត្តិធម៌។
លោកបន្តថា លោកនឹងជំរុញតាមរយៈក្រសួងការបរទេស សេតវិមាន និងតាមរយៈអង្គការសហប្រជាជាតិ ដើម្បីឲ្យពួកគេដាក់សម្ពាធនយោបាយទៅលើកម្ពុជា ឲ្យផ្លាស់ប្ដូរការរំលោភបំពាន និងធានានូវសិទ្ធិក្នុងការសម្រេចចិត្តខាងនយោបាយ ដែលមិនត្រូវបានដកហូតពីប្រជាជនកម្ពុជានោះឡើយ៕