អធិការនគរបាលស្រុកកោះធំ ខេត្តកណ្តាលបដិសេធព័ត៌មានថា មានការដកតំណែងលោកចេញ បន្ទាប់ពីលោកបង្ក្រាបបទល្មើសនេសាទ ប្រព្រឹត្តដោយវៀតណាមខុសច្បាប់។
ការបដិសេធនេះ បន្ទាប់ពីព័ត៌មានក្នុងស្រុកមួយចំនួនបានចុះផ្សាយថា លោកអធិការនគរបាលស្រុកកោះធំត្រូវបានគេដកតំណែងចេញ ដោយសារលោកបង្ក្រាបបទល្មើសនេសាទវៀតណាមខុសច្បាប់ជាទ្រង់ទ្រាយធំ។
ទោះជាយ៉ាងណា លោកអធិការវ័យក្មេង ឈឿង ប៊ុនឆន ប្រាប់វីអូឌីនៅថ្ងៃច័ន្ទនេះថា មិនមានការដកតំណែងលោចេញពីតួនាទី ដូចព័ត៌មានចុះផ្សាយនោះទេ។ លោកមានប្រសាសន៍ថា៖” ខ្ញុំបានដំណឹងនេះដែរ ហើយមានអ្នកសារព័ត៌មានខលមកសួរខ្ញុំ។ មិនមានការដកតំណែងខ្ញុំទេ”។
អ្នកប្រើហ្វេសប៊ុក បានចែករំលែកតៗគ្នា ពីព័ត៌មានដែលថា អធិការនគរបាលស្រុកកោះធំត្រូវបានគេដកហូតពីតំណែង បន្ទាប់ពីបង្ក្រាបបទល្មើសនេសាទវៀតណាមខុសច្បាប់ជាទ្រង់ទ្រាយធំចំនួន៣លើក ៕