សមាជិកព្រឹទ្ធសភាមកពីគណបក្សប្រឆំាងស្នើទៅរដ្ឋាភិបាលឲ្យរៀបចំចំណតរថយន្តនិងឃ្លាំងធំៗដាក់ទៅជាយក្រុង ដោយថាដើម្បីកាត់បន្ថយគ្រោះថ្នាក់និងការកកស្ទះចរាចរណ៍ ខណៈគ្រោះថ្នាក់នៅតែបន្តកើតមានជារៀងរាល់ថ្ងៃ។
ការស្នើសុំនេះធ្វើឡើងក្នុងអង្គប្រជុំវិសាមញ្ញព្រឹទ្ធសភា នាព្រឹកថ្ងៃទី៤ ខែមករា ឆ្នាំ២០១៧ ដើម្បីឲ្យយោបល់លើសេចក្តីព្រាងច្បាប់ស្តីពីវិសោធនកម្មច្បាប់ចរាចរណ៍ផ្លូវគោក។
សមាជិកព្រឹទ្ធសភាគណបក្ស សម រង្ស៊ី គឺលោក ចេប គឹមអ៊ាង បានថ្លែងថា នៅក្នុងរាជធានីភ្នំពេញមានគ្រោះថ្នាក់និងកកស្ទះចរាចរណ៍ជារៀងរាល់ថ្ងៃ ដោយសារមានឃ្លាំទំនិញធំៗនិងម្ចាស់រថយន្តតាក់ស៊ី រថយន្តក្រុង បានយកទីតំាងសាធារណៈមួយចំនួនធ្វើជាចំណតបង្កឲ្យមានគ្រោះថ្នាក់និងកកស្ទះចរាចរណ៍។ ករណីនេះ លោកស្នើទៅរដ្ឋាភិបាលរៀបចំចំណតរថយន្តនិងឃ្លាំងធំៗទំាងនោះ ដាក់ទៅជាយក្រុងវិញ ដោយថាដើម្បីកាត់បន្ថយគ្រោះថ្នាក់និងការកកស្ទះចរាចរណ៍៖ «សំណូមពរឲ្យឃ្លំាងធំអស់នេះទៅធ្វើនៅជាយក្រុងទៅ ហើយឲ្យចល័តរថយន្តតូចៗរបស់គាត់ដឹកទំនិញចូលក្នុងក្រុងវិញ ហើយចំណតរថយន្តគួរតែនៅក្រៅក្រុង ហើយយើងសួរថា យើងធ្វើបានអត់? សំខាន់យើងមានសុឆន្ទៈធ្វើដែរឬទេ? ខ្ញុំជឿថាមិនខ្វះទេអ្នកវិនិយោគដែលចង់ធ្វើចំណតរថយន្តនេះនៅជាយក្រុង ប៉ុន្តែយើងគួរតែមានលក្ខខណ្ឌបិទចំណតនៅក្នុងទីក្រុងជាស្ថាពរ នោះទើបការអនុវត្តបាន បើសិនជាយើងមានចំណតនៅក្នុងក្រុងផង រថយន្តគេអត់ចតនៅខាងក្រៅទេ គេត្រូវតែមកក្រុងពីព្រោះគេចំណេញអ្វីគ្រប់សព្វបែបយ៉ាង គេត្រូវចូលមកក្នុងក្រុង»។
ឆ្លើយតបនឹងសមាជិកព្រឹទ្ធសភាបក្សប្រឆំាង នៅក្នុងកិច្ចប្រជុំនោះ អ្នកនាំពាក្យព្រឹទ្ធសភា លោក ម៉ម ប៊ុននាង បានឡើងថ្លែងការពារចំណាត់ការរបស់រដ្ឋាភិបាលថា សាលាក្រុងមានផែនការរៀបចំចំណតរថយន្តនៅជាយក្រុងផងដែរ ប៉ុន្តែលោកថាដោយសាររដ្ឋមិនទាន់មានទីតំាងនិងថវិកាគ្រប់គ្រាន់ដើម្បីរៀបចំគម្រោងនេះនៅឡើយ៖ «ខ្ញុំដឹងថាទីក្រុងភ្នំពេញនិងរៀបចំមាន Master Plan បែងចែកតំបន់ដើម្បីឲ្យយើងរៀបចំទំាងចំណតរថយន្តក្រុង រថយន្តផ្សេងៗ ទំាងទីតំាងសម្រាប់ឃ្លំាងជាសិប្បកម្មនិងរោងចក្រខ្នាតតូចផងដែរ ប៉ុន្តែដោយសារកន្លងមកយើងមានបញ្ហាថវិកា ទីពីរបញ្ហាទីតំាង»។
អ្នកនាំពាក្យសាលារាជធានីភ្នំពេញ លោក មាន ចាន់យ៉ាដា បានឲ្យដឹងថា សាលាក្រុងមានគម្រោងរៀបចំឲ្យមានចំណតរថយន្តនៅជាយក្រុងដែរ ប៉ុន្តែរង់ចំាអ្នកវិនិយោគសហការជាមួយសាលាក្រុង។
នៅពេលសួរថា បើមិនមានក្រុមហ៊ុនវិនិយោគ តើចំណតរថយន្តតាក់ស៊ីនិងរថយន្តក្រុង នៅតែបន្តនៅក្នុងរាជធានីភ្នំពេញដដែលឬយ៉ាងណា? ប៉ុន្តែលោក មាន ចាន់យ៉ាដា បានបដិសេធមិនឆ្លើយសំនួរនេះទេ។
ចំណែកករណីឃ្លំាងទំនិញធំៗដែលសមាជិកព្រឹទ្ធសភាមកពីគណបក្ស សម រង្ស៊ី លើកឡើងថានៅតែមាននៅក្នុងរាជធានីភ្នំពេញបង្កឲ្យមានការកកស្ទះចរាចរណ៍នោះ លោក មាន ចាន់យ៉ាដា ថាបក្សប្រឆំាងគ្រាន់តែធ្វើដោយប្រជាភិថុតតែប៉ុណ្ណោះ ខណៈសាលាក្រុងបានធ្វើកិច្ចការនេះប្រមាណ៤ឆ្នាំមកហើយ៖ «ការលើកឡើងរបស់គណបក្ស សម រង្ស៊ី នៅក្នុងព្រឹទ្ធសភាព្រឹកមិញ គ្រាន់តែជាការសម្តែងប្រជាភិថុតប៉ុណ្ណោះ ដោយឡែកបញ្ហាយកឃ្លាំទំនិញក៏ដូចជាសំណង់ទៅជាយក្រុង គឺយើងបានធ្វើតំាងពី៣ទៅ៤ឆ្នាំមុនម្លេះ តាមរយៈយើងកសាងហេដ្ឋារចនាសម្ព័ន្ធ ដូចជាផ្លូវថ្នល់ ចាក់ប៊េតុង រហូតទៅដល់កំរាស់ជាងពីរទឹក ប្រវែងជាង៤០០គីឡូ នៅក្នុងជាយក្រុង ក្នុងរាជធានីភ្នំពេញ»។
ជារៀងរាល់ថ្ងៃគេសង្កេតឃើញថា ចរាចរណ៍នៅភ្នំពេញមានការកកស្ទះចាប់ពីម៉ោង៧ព្រឹកដល់ម៉ោង៨.៣០ព្រឹក ម៉ោង១២ថ្ងៃត្រង់ និងម៉ោង៤.៣០ដល់ម៉ោង៧ល្ងាច។ តំបន់ដែលកកស្ទះនៅម្តុំចំណតរថយន្តតាក់ស៊ីនិងរថយន្តក្រុង រួមមាន ក្បែរផ្សារដើមគរ ផ្សារនាគមាស ផ្សារអូឬស្សី ផ្សារសូរិយា ផ្សារកណ្តាល ផ្សារអូឡំាពិក ក្បែផ្សាររាត្រី និងក្បែរទីលានប្រជាធិបតេយ្យជាដើម។
ចំណែកក្នុងរបាយការណ៍ស្តីពីការអនុវត្តច្បាប់ចរាចរណ៍ផ្លូវគោកថ្មីនៅកម្ពុជាបានបង្ហាញថា ជារៀងរាល់ថ្ងៃយ៉ាងហោចណាស់មានមនុស្សចំនួន៦នាក់បានស្លាប់និង១៧នាក់បានរងរបួស ដោយសារគ្រោះថ្នាក់ចរាចរណ៍នៅទូទំាងប្រទេសកម្ពុជា៕
