សាលាឧទ្ធរណ៍សម្រេចឲ្យអ្នកភូមិដែលមានជម្លោះដីធ្លី បន្តចាញ់ក្តីក្រុមហ៊ុនទទួលបានដីសម្បទានមួយនៅខេត្តកោះកុង ដោយចៅក្រមសំអាងថា ការប្តឹងជំទាស់របស់ពួកគេ មិនអាចពិចារណាផ្លូវច្បាប់បានទេ។
តំណាងអ្នកមានជម្លោះដីធ្លីនៅឃុំជីខក្រោម ស្រុកស្រែអំបិល អ្នកស្រី ផាវ ញឺង ឲ្យដឹងថា កាលពីឆ្នាំ២០១៥សាលាដំបូងខេត្តកោះកុង បានកាត់ក្តីឲ្យពួកគេ៧គ្រូសារ មានដីសរុប២៣ហិកតា ចាញ់ក្តីក្រុមហ៊ុនរបស់លោក ហេង ហុយ បើទោះបីពួកគាត់ប្តឹងឲ្យតុលាការថ្នាក់ក្រោមមួយនេះ សុំរំលាយកិច្ចសន្យា ដែលគាត់ថាជាកិច្ខសន្យាគំរាមកំហែង ធ្វើឲ្យអ្នកភូមិប្រឈមនឹងបាត់ដីទាំងនោះក៏ដោយ។
អ្នកស្រី ផាវ ញើង ឲ្យដឹងទៀតថា ករណីនេះពួកគាត់បានបន្តប្តឹង មកសាលាឧទ្ធរណ៍ ប្រឆាំងនឹងសាលក្រមនេះ ដើម្បីស្វែងរកយុត្តិធម៌។
ប៉ុន្តែអ្នកស្រី ផាវ ញើង អះអាងថា នៅព្រឹកថ្ងៃទី៤ខែមេសានេះ ចៅក្រមនៅសាលាឧទ្ធរណ៍ បានប្រកាសសាលដីកា ឲ្យពួកគាត់បន្តចាញ់ក្តីក្រុមហ៊ុន របស់លោក ហេង ហុយ ដដែលទៀត ដោយចៅក្រមអះអាងថា ឯកសារ របស់ក្រុមហ៊ុន ត្រឹមត្រូវតាមទម្រង់ច្បាប់ គ្មានចំនុចណាបញ្ជាក់ពីរូបភាពគំរាមកំហែងទេ។
អ្នកស្រី ផាវ ញើង បង្ហាញការខកចិត្តថា សាលដីកានេះ មិនបានការពារប្រយោជន៍ អ្នកភូមិជាម្ចាស់ដីទេ តែថា បែជាលើកទឹកចិត្តដល់ក្រុមហ៊ុនដែលចង់បានដីអ្នកភូមិទៅវិញ។
អ្នកស្រីថា៖ «ទន្ទឹមនឹងយើងឈានជើងមកដល់ទីក្រុងភ្នំពេញនេះ ពួកយើងជំពាក់បំណុលគេរាប់លាន ម្នាក់ៗ យកលុយមកបង់ពន្ធបណ្តឹង យើងសង្ឃឹមថា រដ្ឋនៅប្រទេសកម្ពុជា និងអ្នកច្បាប់គេនឹងរកយុត្តិធម៌ ឲ្យយើង តែទីបំផុតយើងអស់ក្តីសង្ឃឹម យើងអត់ដឹងពឹងទៅណាទៀតទេ។
បើតាមអ្នកស្រី ផាវ ញើង ពួកគាត់នឹងពិភាក្សាជាមួយមេធាវីបន្តប្តឹងករណីនេះទៅតុលាការកំពូលបន្តទៀត ដើម្បីស្វែងរកយុត្តិធម៌។
បើតាមអ្នកភូមិ ជម្លោះដីនៅខេត្តកោះកុង ជាមួយក្រុមហ៊ុន ហេង ហុយ នោះបានអូសបន្លាយជិត១០មកហើយ ធ្វើឲ្យអ្នកភូមិដែលមានជម្លោះ ប្រឈមនឹងបញ្ហាជីវភា ពរស់នៅប្រចាំថ្ងៃ ខ្លះបង្ខំចិត្ត ធ្វើចំណាកស្រុក ទាំងប្រថុយនឹងគ្រោះថ្នាក់ និងខ្លះទៀតបន្តស្នាក់នៅតាមវត្តអារាមក្នុងរាជធានីភ្នំពេញ សុំបាយលោកហូប ដើម្បីបន្តស្វែងរកយុត្តិធម៌ពីក្រសួងពាក់ព័ន្ធ៕