ចៅសង្កាត់លេខ១ ខេត្តព្រះសីហនុ ដែលទើបឈ្នះឆ្នោត នៅមិនទាន់មានបន្ទប់ធ្វើការ ដោយសារតែចៅសង្កាត់ចាស់ដែលចាញ់ឆ្នោតមិនព្រមប្រគល់បន្ទប់ឲ្យ។ នេះជាការអះអាងរបស់ចៅសង្កាត់ថ្មី។
លោក អ៊ុក ចេត្តនី ជាចៅសង្កាត់ លេខ១ ខេត្តព្រះសីហនុ មកពីគណបក្សសង្គ្រោះជាតិ ដែលទើបតែជាប់ឆ្នោត ប្រាប់ VOD នៅថ្ងៃនេះថា ក្រោយពីប្រកាសសុពលភាពម្សិលមិញ អតីតចៅសង្កាត់អាណត្តិមុនបានបដិសេធមិនប្រគល់បន្ទប់របស់ខ្លួនឲ្យលោកទេ៖ «ចឹង! ស្អែកនេះខ្ញុំកោះប្រជុំក្រុមប្រឹក្សាដើម្បីពិភាក្សាការងារហ្នឹង! ហើយខ្ញុំនឹងធ្វើកំណត់ហេតុ បើគាត់អត់ព្រម ខ្ញុំនឹងបញ្ជូនកំណត់ហេតុទៅក្រុង»។
លោក អ៊ុក ចេត្តនី បន្តថា លោកនឹងអង្គុយធ្វើការនៅក្រៅបន្ទប់ គឺនៅកន្លែងតុក្រុមប្រឹក្សា បើអតីតចៅសង្កាត់មិនព្រមប្រគល់បន្ទប់ឲ្យ។
អតីតចៅសង្កាត់ លោក ឈិត សូផាត ដែលបច្ចុប្បន្នជា ជាចៅសង្កាត់រងទី២ នៃសង្កាត់ លេខ១ ខេត្តព្រះសីហនុ មកពីគណបក្សប្រជាជនកម្ពុជា អះអាងថាលោកមិនអាចឆ្លើយតបបានទេ ដោយលោកថាជាប់រវល់បើកឡាន។
នាយកប្រតិបត្តិអង្គការនិចហ្វិក (NICFEC) លោក សំ គន្ធាមី មានប្រសាសន៍ថា ចៅសង្កាត់គឺជាប្រធានក្រុមប្រឹក្សា ជាអ្នកមានសិទ្ធិចាត់ចែងរៀបចំការិយាល័យធ្វើការ រចនាសម្ព័ន្ធ ទីតាំងគណៈកម្មការស្ត្រី កុមារ បទបញ្ជាផ្ទៃក្នុងជាដើម៖ «សាលាឃុំរបស់រដ្ឋទេតើ! អ្នកណាបានធ្វើមេឃុំឬចៅសង្កាត់អ្នកហ្នឹងមកធ្វើការនៅសាលាឃុំសង្កាត់ហ្នឹងឯង! មិនមែនឯកជនឯណា ត្រូវតែប្រគល់ឲ្យគេ យើងអត់ឲ្យអូហ្វីសគេធ្វើការ ធ្វើម៉េចចេញ? បាទ! ត្រូវតែប្រគល់ឲ្យគេ!!!»។
លទ្ធផលផ្លូវការរបស់ គ.ជ.ប ប្រកាសកាលពីថ្ងៃទី២៥ មិថុនា ២០១៧ បេក្ខជនដែលបានជាប់ឆ្នោតជាសមាជិកក្រុមប្រឹក្សាសង្កាត់លេខ១ ខេត្តព្រះសីហនុ មានចំនួន១១រូប ដែលមាន លោក អ៊ុក ចេត្តនី ជាចៅសង្កាត់ លោក សាន់ សុខហ៊ាង ជាចៅសង្កាត់រងទី១ លោក ឈិត សូផាត ជាចៅសង្កាត់រងទី២ និងសមាជិក៨រូបទៀត។
ក្រសួងមហាផ្ទៃបានចាប់ផ្តើមប្រកាសសុពលភាពរបស់ក្រុមប្រឹក្សាឃុំសង្កាត់ អាណត្តិទី៤ កាលពីថ្ងៃទី៣ កក្កដា ២០១៧ បន្ទាប់ពីបានជាប់ឆ្នោតកាលពីថ្ងៃទី៤ខែមិថុនា៕
