ក្នុងវេបសាយអគ្គស្នងការដ្ឋាននគរបាលជាតិចុះផ្សាយកាលពីថ្ងៃ៣ កក្កដា ម្សិលមិញ បានដកស្រង់សម្តីរដ្ឋមន្ត្រី ក្រសួងមហាផ្ទៃលោក ស ខេង ដែលបញ្ជាឲ្យអភិបាលខេត្តបន្ទាយមានជ័យ លោក សួន បវរ បិទច្រករបៀងខុសច្បាប់ទាំង៤៣កន្លែង តាមខ្សែបន្ទាត់ព្រំដែនក្នុងខេត្តបន្ទាយមានជ័យជាប់ព្រំដែនកម្ពុជា-ថៃ ប្រមាណជាង១០០គីឡូម៉ែត្រ ដើម្បីទប់ស្កាត់ពលករចំណាកស្រុកនិងទំនិញរថយន្តគេចពន្ធ ដែលឈ្មួញនាំចូលមកកម្ពុជាខុសច្បាប់ នាំឲ្យបាត់បង់ចំណូលរដ្ឋជាច្រើន។
វេបសាយដដែលបញ្ជាក់ថា បើសមត្ថកិច្ចនៅតាមច្រករបៀងនៅតែបន្តបើកដោយខុសច្បាប់ នឹងទទួលខុសត្រូវចំពោះមុខច្បាប់។
ទោះជាយ៉ាងណា VOD បានសុំបំភ្លឺបន្ថែមពីអ្នកនាំពាក្យក្រសួងមហាផ្ទៃលោក ខៀវ សុភ័គ ដែរ ប៉ុន្តែលោកថា សុំមិនធ្វើការអត្ថាធិប្បាយទេ ដោយលោកបង្វែសំនួរឲ្យសួរ អភិបាលខេត្តបន្ទាយមានជ័យលោក សួន បវរ វិញ ប៉ុន្តែ VOD មិនអាចសុំការបំភ្លឺបានទេនៅព្រឹកថ្ងៃនេះ។
មន្ត្រីឃ្លាំមើលសិទ្ធិមនុស្សសមាគមអាដហុកប្រចំាខេត្តបន្ទាយមានជ័យ លោក ស៊ុំ ចន្ទគា រកឃើញថាច្រករបៀងនៅតាមព្រំដែនកម្ពុជា ថៃ ក្នុងខេត្តនោះ មាន៦៧ច្រក មិនមែនដូចការលើកឡើងរបស់រដ្ឋមន្ត្រីក្រសួងមហាផ្ទៃថា៤៣ច្រកនោះទេ។ លោកយល់ថា វិធានការរបស់ក្រសួងមហាផ្ទៃហាក់ដូចជាយឺតពេល និងមិនមានប្រសិទ្ធិភាពទេ ដោយថាមន្ត្រីប៉ូលីស និងយោធានៅតាមច្រករបៀងភាគច្រើនទទួលបានប្រយោជន៍ពីពលករចំណាកស្រុកទំាងនោះ។
លោក ស៊ុំ ចន្ទគា បញ្ជាក់ថា វិធានការទប់ស្កាត់ពលករចំណាកស្រុកឲ្យមានប្រសិទ្ធភាពបាន លុះត្រាតែរដ្ឋាភិបាលបង្កើតការងារក្នុងស្រុកឲ្យបានច្រើន និងរកទីផ្សារសម្រាប់កសិផលដែលប្រមូលបានស្របតាមសេដ្ឋកិច្ចជាក់ស្តែង ជាជាងឲ្យពួកគេធ្វើការចំណាកស្រុកប្រឈមនឹងហានិភ័យ។
លោកផ្តល់ជាយោបល់ថា «បើសិនជាមានទីផ្សារក្នុងស្រុកគាត់[ពលករចំណាកស្រុក]អាចជួយប្រពន្ធ កូនគាត់ អាចរស់នៅមានសុភ័ក្រមង្គល ហើយចំណែកអ្វីដែលសំខាន់នោះ គាត់រួចផុតពីការធ្វើបាប ការចាប់ ការចង ការបាញ់នៅស្រុកគេ ហើយនឹងគ្រោះថ្នាក់ផ្សេងៗនៅស្រុកគេ នេះគឺកាត់បន្ថយបានច្រើន»។
ចំណែកមន្រ្តីកម្មវិធីការពារសិទ្ធិពលករចំណាកស្រុក នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក ឌី ថេហូយ៉ា គំាទ្រវិធានការរបស់ក្រសួងមហាផ្ទៃដែលបិទច្រករបៀងមិនឲ្យពលរដ្ឋទៅធ្វើការងារចំណាកស្រុកខុសច្បាប់នៅប្រទេសថៃ។
លោកលើកឡើងថា «បើសិនជាធ្វើបាន[បិទច្រករបៀងមិនឲ្យពលករចំណាកស្រុកខុសច្បាប់]វាល្អ ឲ្យគាត់មកវិញ ដើម្បីធ្វើប័ណ្ណត្រឹមត្រូវ វាល្អប្រសើរជាង ព្រោះកាលណាយើងទៅចំណាកស្រុក យើងអត់មានច្បាប់ត្រឹមត្រូវ គេបន្លំកម្លាំងពលកម្មពួកគាត់ វាពិបាក ណាមួយពួកគាត់ជួបបញ្ហាច្រើន ដោយសារយើងទៅស្រុកគេអត់មានច្បាប់ទម្លាប់វាពិបាក គ្រោះថ្នាក់ណាស់ បើសិនជាគាត់អាចមានច្បាប់ទៅគាត់ស្រួលជួយការពារ ជួនកាលគាត់មានបញ្ហា យើងមានសហជីពនៅស្រុកគេ ឈឺស្កាត់ទៅវាស្រួល»។
បើតាមមន្ត្រីសិទ្ធិមនុស្សនៅខេត្តបន្ទាយមានជ័យ ចាប់តាំងពីចុងខែមិថុនា រហូតដល់ដើមខែកក្កដានេះ មានពលករខ្មែរខុសច្បាប់ និងពលករមានឯកសារសម្រាប់បំរើការងារជាង ៦០០នាក់ក្នុងមួយថ្ងៃៗ ត្រូវបានអាជ្ញាធរថៃចាប់បញ្ជូនមកវិញ តាមច្រកព្រំដែនអន្តរជាតិប៉ោយប៉ែត។
ប៉ុន្តែអ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈ លោក ហេង សួគ៌ បានច្រានចោលព័ត៌មាននេះ ដោយថាពលករចំណាកស្រុកដែលត្រូវបានអាជ្ញាធរថៃចាប់បញ្ជូនមកកម្ពុជាវិញ មានចំនួនត្រឹមតែ ១០០ ទៅ ២០០នាក់ប៉ុណ្ណោះ ជាចំនួនដែលលោកថា ដូចគ្នាទៅចំនួនដែលអាជ្ញាធរថៃចាប់បញ្ជូនមកវិញដូចសព្វមួយដង។
កាលពីខែមិថុនាឆ្នាំ២០១៤ អាជ្ញាធរថៃចាប់បញ្ជូនពលករខ្មែរជាង២២ម៉ឺននាក់មកប្រទេសកម្ពុជាវិញ ក្រោយពីរកឃើញថាពួកគេចូលធ្វើការក្នុងប្រទេសថៃដោយខុសច្បាប់។ ក្រោយមកអាជ្ញាធរថៃបានទទួលយកពលករខ្មែរវិញដោយឲ្យបំពេញបែបបទតាមផ្លូវច្បាប់។
ប៉ុន្តែនៅពាក់កណ្តាលឆ្នាំ២០១៧នេះ រដ្ឋាភិបាលយោធាថៃ បានអនុវត្តវិធានការថ្មីមួយទៀត ដោយបានចាប់បញ្ជូនពលករបរទេសទៅប្រទេសកំណើតរបស់ពួកគេវិញ ដោយថា ជាផ្នែកមួយនៃការអនុវត្តច្បាប់គ្រប់គ្រងពលករបរទេសខុសច្បាប់នៅក្នុងប្រទេសមួយនេះ៕