សពព្រះតេជគុណព្រះធម្មវិបស្សនា សំ ប៊ុនធឿន ដែលត្រូវបានឃាតករបាញ់សម្លាប់កាលពីជាង១០ឆ្នាំមុន នឹងត្រូវបូជានៅដើមខែធ្នូ ឆ្នាំ២០១៦នេះ។
បើយោងតាមសេចក្ដីប្រកាស កម្មវិធីបុណ្យនឹងចាប់ផ្ដើមពីថ្ងៃទី១ដល់ថ្ងៃទី៤ ខែធ្នូ ឆ្នាំ២០១៦ នៅពុទ្ធមណ្ឌលសន្តិវ័ន្ត ហៅ «ភ្នំឧត្ដុង្គ» ស្ថិតក្នុងឃុំផ្សារដែក ស្រុកពញាឮ ខេត្តកណ្ដាល។ សម្រាប់ការបូជាព្រះសពរបស់ព្រះអង្គនឹងត្រូវធ្វើឡើងនៅល្ងាចថ្ងៃទី៣ ខែធ្នូ។
សពព្រះសង្ឃ សំ ប៊ុនធឿន ត្រូវបានតម្កល់ទុកនៅពុទ្ធមណ្ឌលសន្តិវ័ន្ត ហៅ «ភ្នំឧត្ដុង្គ» អស់រយៈពេល១៣ឆ្នាំមកហើយ ចាប់តាំងពីមានករណីលួចបាញ់សម្លាប់លើព្រះអង្គឲ្យសុគត។
ព្រះអង្គ សំ ប៊ុនធឿន ជាអតីតអធិបតីពុទ្ធមណ្ឌល អគ្គនាយកវិបស្សនាធុរៈសិក្សា និងជាព្រះសង្ឃដ៏លេចធ្លោមួយអង្គនៅក្នុងប្រទេសកម្ពុជា ក្នុងការបដិបត្តិនិងអប់រំព្រះធម៌ពុទ្ធសាសនាតាំងពីឆ្នាំ២០០០មក។
ព្រះអង្គត្រូវបានខ្មាន់កាំភ្លើងលួចបាញ់សម្លាប់ កាលពីថ្ងៃទី៨ កុម្ភៈ ឆ្នាំ២០០៣ ក្នុងបរិវេណវត្តលង្កា រាជធានីភ្នំពេញ។ ក្រោយហេតុការណ៍បាញ់ប្រហារ ព្រះអង្គត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត្រ និងបានសុគត២ថ្ងៃបន្ទាប់ ក្នុងព្រះជន្ម៤៧ព្រះវស្សា។
បើទោះជាឃាតកម្មនេះបានកន្លងទៅជាង១០ឆ្នាំហើយ តែអាជ្ញាធរនៅមិនទាន់វែកមុខរកឃាតករដែលបានបាញ់សម្លាប់ព្រះអង្គយកមកផ្តន្ទាទោសនៅឡើយ។
កន្លងមក មានករណីឃាតកម្មលើសិល្បករ អ្នកនាង ពិសិដ្ឋ ពិលីកា កញ្ញា ទូច ស៊ុននិច កញ្ញា ពៅ បញ្ញាពេជ្រ អ្នកកាសែតមនសិការខ្មែរ លោក ឃឹម សំបូរ និងកូនប្រុស ឃាតកម្មលើប្រធានសហជីបសេរីកម្មករ លោក ជា វិជ្ជា និងឃាតកម្មលើ លោក កែម ឡី អ្នកវិភាគបញ្ហាសង្គម កាលពីថ្ងៃទី១០ ខែកក្កដា កន្លងទៅ៕
