ភាពតានតឹងនៅលើឧបទ្វីបកូរ៉េ បានកើនឡើងខ្លាំងកាលថ្ងៃម្សិលមិញនេះ នៅមុនសមយុទ្ធយោធាដែនអាកាសធំបំផុតរួមគ្នាមួយរវាងអាមេរិក និងកូរ៉េខាងត្បូង ដោយក្រុងព្យុងយ៉ាងបានហៅសមយុទ្ធយោធានេះថា ជា«សកម្មភាពបង្កហេតុពេញទី» ដែលអាចនាំទៅរកជម្លោះនុយក្លេអ៊ែរ ខណៈដែលសមាជិកសភាអាមេរិកម្នាក់់បានព្រមានពីកំណើននៃសង្គ្រាមការពារខ្លួននៅលើឧបទ្វីបមួយនេះ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
យោងតាមសេចក្ដីរាយការណ៍ AFP សមយុទ្ធយោធារយៈពេល ៥ថ្ងៃដែលនឹងមានការចូលរួមពីយន្តហោះយោធាប្រហែល ២៣០គ្រឿង ក្នុងនោះមានទាំងយន្តហោះចម្បាំង F-22 ផងដែរនោះត្រូវចាប់ផ្ដើមនៅថ្ងៃនេះ ពោលគឺតែ ៥ថ្ងៃប៉ុណ្ណោះ ក្រោយពីកូរ៉េខាងជើងបានបាញ់គ្រាប់មីស៊ីលអន្តរទ្វីប ដែលត្រូវបានគេជឿថា អាចវាយប្រហារដល់ទឹកដីអាមេរិក។
កាសែតកូរ៉េខាងជើងឈ្មោះ រ៉ូដុង បានថ្កោលទោសចំពោះសមយុទ្ធយោធាដ៏ធំមិនធ្លាប់មានមួយនេះ។
ក្នុងអត្ថបទវិចារណកថារបស់ខ្លួនកាលពីថ្ងៃម្សិលមិញនេះ កាសែតរ៉ូដុង បានចុះផ្សាយថា សមយុទ្ធនេះ គឺជាសកម្មភាពបង្កហេតុពេញទី និងដោយចំហរប្រឆាំងនឹងកូរ៉េខាងជើង ដែលអាចនាំទៅរកសង្គ្រាមនុយក្លេអ៊ែរភ្លាមៗ។
កាសែតដដែលនេះ បានចុះផ្សាយបន្តថា អាមេរិក និងប្រទេសអាយ៉ងកូរ៉េខាងត្បូង នឹងចាំថា សមយុទ្ធយោធាដែលសំដៅលើកូរ៉េខាងជើង គឺជាទង្វើឆ្កួតលីលា ស្មើនឹងការបំផ្លាញខ្លួនឯង។
កាសែតកូរ៉េខាងជើងមួយនេះ បានចុះផ្សាយដូច្នេះ មួយថ្ងៃក្រោយពីក្រសួងការបរទេសកូរ៉េខាងជើង បានចោទរដ្ឋបាលប្រធានាធិបតី ដូណាល់ ត្រាំ ថា «បង្កសង្គ្រាមនុយក្លេអ៊ែរ» តាមរយៈការបង្កើតនូវអ្វីមួយដែលកូរ៉េខាងជើងហៅថា សមយុទ្ធកងទ័ពអាកាសដ៏ឆ្កួតលីលា៕