លោក ស ខេង រដ្ឋមន្ត្រីក្រសួងមហាផ្ទៃនិងប្រធានគណៈកម្មាធិការជាតិសម្រាប់ការអភិវឌ្ឍតាមបែបលទ្ធិប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានណែនាំឲ្យមន្ត្រីពាក់ព័ន្ធយកចិត្តទុកដាក់បន្ថែមទៀត ក្នុងការផ្តល់សេវាសាធារណៈដល់ប្រជាពលរដ្ឋ។
នៅក្នុងកិច្ចប្រជុំលើកទិសដៅឆ្នាំ២០១៧របស់ គ.ជ.អ.ប កាលពីថ្ងៃពុធម្សិលមិញ លោក ស ខេង មានប្រសាសន៍ថា ការផ្តល់សេវារដ្ឋបាលសាធារណៈគឺជារឿងសំខាន់ដែលមន្ត្រីថ្នាក់ជាតិត្រូវចូលរួមអនុវត្ត។ លោកបន្តថា ការផ្តល់សេវាដល់ប្រជាពលរដ្ឋនៅពេលកន្លងនៅមានបញ្ហាខ្លះ ហើយជំរុញឲ្យអ្នកពាក់ព័ន្ធខំបំពេញការងារឲ្យល្អប្រសើរជាងបច្ចុប្បន្ននេះ។ នេះបើតាមគេហទំព័រអគ្គស្នងការដ្ឋាននគរបាលជាតិ។
អ្នកស្រាវជ្រាវពីការអភិវឌ្ឍសង្គមធ្លាប់លើកឡើងថា ការអភិវឌ្ឍនៅថ្នាក់ក្រោមកំពុងជួបបញ្ហាដោយសារអាជ្ញាធរ និងប្រជាពលរដ្ឋ មិនសូវមានទំនាក់ទំនងគ្នានាំឲ្យការអភិវឌ្ឍឬការផ្តល់សេវាមិនចំអ្វីដែលពលរដ្ឋត្រូវការនិងនាំឲ្យកើតមានអំពើពុករលួយ៕