សាលាឧទ្ធរណ៍អាមេរិក នៅថ្ងៃណេះ បានច្រានចោលបណ្តឹងឧទ្ធរណ៍ពីក្រសួងយុត្តិធម៌អាមេរិក ដែលទាមទារឲ្យស្ដារបទបញ្ជារបស់ប្រធានាធិបតី លោក ដូណាល់ ត្រាំ ឡើងវិញ ដែលបទបញ្ជានោះបានហាមឃាត់ពលរដ្ឋមកពីប្រទេសមូស្លីមចំនួន ៧ និងជនភៀសខ្លួន មិនឲ្យចូលអាមេរិកជាបណ្ដោះអាសន្ន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
សាលដីការបស់សាលាឧទ្ធរណ៍អាមេរិក បាននិយាយថា សាលាឧទ្ធរណ៍បានច្រានចោលបណ្ដឹងឧទ្ធរណ៍ពីរដ្ឋបាល ដែលទាមទារឲ្យរក្សាបទបញ្ជារបស់ប្រធានាធិបតី។
ក្រសួងយុត្តិធម៌ បានដាក់បណ្ដឹងឧទ្ធរណ៍មួយថ្ងៃក្រោយពីចៅក្រមសហព័ន្ធនៅទីក្រុងស៊ីអាថល ចេញបញ្ជាឲ្យដកបម្រាមរបស់លោក ត្រាំ។ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី២៧ ខែមករាកន្លងមកនេះ បានចេញបញ្ជាហាមឃាត់ពលរដ្ឋមកពីប្រទេសមូស្លីមចំនួន ៧ មិនឲ្យចូលទឹកដីអាមេរិករយៈពេល ៩០ថ្ងៃ៕