រដ្ឋាភិបាលបានបញ្ជាទៅកាន់ក្រុមហ៊ុនផ្គត់ផ្គង់អ៊ិនធើណែតទាំងអស់នៅកម្ពុជា ឲ្យរារាំង ឬប្លុកនូវបណ្ដាញផ្សព្វផ្សាយរបស់សារព័ត៌មានខេមបូឌា ដេលី បន្ទាប់ពីកាសែតនេះបានបិទដំណើរការរបស់ខ្លួនកាលពីឆ្នាំមុន។
ក្នុងលិខិតមួយច្បាប់ផ្ញើទៅកាន់ម្ចាស់ក្រុមហ៊ុនផ្តល់សេវាអ៊ិនធើណែតទាំងអស់ចុះថ្ងៃទី២៨ ខែកញ្ញា ឆ្នាំ២០១៧ ដែលវីអូឌីទើបទទួលបាន ក្រសួងប្រៃសនីយ៍ និងទូរគមនាគមន៍ បានបញ្ជាទៅកាន់ក្រុមហ៊ុនដែលផ្តល់សេវាធើណែតទាំងអស់ ឲ្យរាំងខ្ទប់ និងបញ្ឃប់ដំណើរការ នូវគេហទំព័ររបស់កាសែតខេបូឌា ដេលី និងទំព័រហ្វេសប៊ុក និង Twitter របស់កាសែតនេះ ដើម្បីបញ្ឃប់ដំណើរការនៃគណនី ឬទំព័រទាំងនេះចេញពីប្រទេសកម្ពុជា។
បើតាមលិខិតនោះ ការបញ្ជារបស់ក្រសួងទូរគមនាគមន៍ គឺធ្វើឡើងដោយមានការស្នើសុំពីអគ្គនាយកដ្ឋានពន្ធដាររបស់ក្រសួងសេដ្ឋកិច្ច និងហិរញ្ញវត្ថុ។
កាសែតខេមបូឌា ដេលី បានប្រកាសបិទទ្វារនៅថ្ងៃទី៤ កញ្ញ ឆ្នាំ២០១៧ បន្ទាប់ពីកាសែតនេះបដិសេធបង់ពន្ធតម្លៃជាង ៦លានដុល្លារ ដែលរដ្ឋាភិបាលកម្ពុជាចោទថា កាសែតនេះបានជំពាក់នៅក្នុងរយៈពេល ១០ឆ្នាំចុងក្រោយ។
ទោះជាយ៉ាងណា សារព័ត៌មានដែលមានអាយុកាល ២៤ឆ្នាំនេះ បានបន្តការផ្សាយរបស់ខ្លួនតាមរយៈប្រព័ន្ធអ៊ិនធើណែតរហូតដល់ថ្ងៃដែលរដ្ឋាភិបាលបិទនេះ។
គេហទំព័រសារព័ត៌មាននេះ ត្រូវបានរារាំងកាលពីសប្តាហ៍មុន ប៉ុន្តែ ទំព័រហ្វេសបុក និង Twitter របស់សារព័ត៌មាន មិនទាន់ត្រូវបានរារាំងនៅឡើយទេ។
ក្រុមហ៊ុនអ៊ិនធើណែត Sinet បានបញ្ជាក់ក្នុងគេហទំព័រ Twitter របស់ខ្លួនថា ពួកគេត្រូវបានរដ្ឋាភិបាលបញ្ជាឲ្យបិទគេហទំព័ររបស់កាសែតខេមបូឌា ដេលី ជាច្រើនខែមកហើយ តែដោយសារគេហទំព័រនេះមិនសូវមានប្រជាប្រិយភាពទើបការបិទនេះមិនសូវមានការភ្ញាក់ផ្អើល។
អ្នកនាំពាក្យក្រសួងប្រៃសនីយ និងទូរគមនាគមន៍ លោក អ៊ឹម វត្ថា បានទទួលស្គាល់ថា ក្រសួងពិតជាបានបញ្ជាឲ្យបិទគេហទំព័រនេះមែន ដោយថា ជាការអនុវត្តទៅតាមច្បាប់ទាំងស្រុង បន្ទាប់ពីកាសែតមួយនេះពុំបានគោរពតាមច្បាប់កម្ពុជា។
លោកបញ្ជាក់ថា៖ «ពួកខ្ញុំមិនគិតពីរឿងសារព័ត៌មានទេ! ពួកខ្ញុំកាន់តែ Infrastructure មានន័យថា បើមានការប៉ះពាល់ណាមួយក្នុងការអនុវត្តវិធានការផ្លូវច្បាប់ យើងអនុវត្តន៍តាមហ្នឹង។ […] គេហទំព័រទាំងអស់ដែលមិនមានប៉ះពាល់ផ្លូវច្បាប់ យើងមាននៅដំណើរការធម្មតា។ ឥឡូវដូចខាង VOD មានបិទទេ? អត់ទេ! ខាងណាក៏គេអត់បិទ បើអត់ធ្វើអីខុសច្បាប់ និងទម្លាប់គេអត់បិទទេ! គេបើកសេរីភាពពេញទីនៅកម្ពុជា»។
នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានលោក ម៉ឿន ឈានណារិទ្ធ មានប្រសាសន៍ប្រាប់កាសែតភ្នំពេញ ប៉ុស្តិ៍កាលពីម្សិលមិញថា រដ្ឋាភិបាលមានសិទ្ធិក្នុងការអនុវត្តច្បាប់ ប៉ុន្តែ ការរារាំងគេហទំព័រខេមបូឌា ដេលី គឺជាសកម្មភាពមួយក្នុងការរាំងខ្ទប់នៃសេរីភាពសារព័ត៌មានផងដែរ។
អ្នកជំនាញផ្នែកបច្ចេកវិទ្យា លោក ង៉ែត ម៉ូសេ មានប្រសាសន៍ថា បើទោះបីជាគេហទំព័រខេមបូឌា ដេលី ត្រូវបានរារាំងមែន ប៉ុន្តែ សម្រាប់ទំព័រហ្វេសបុក និង Twitter មិនទាន់អាចរារាំងបាននោះទេ។
លោកថា៖ «URL(គេហទំព័រ)របស់ Twitter ឬរបស់ Facebook គេអាច Block(រារាំង)បាន តែបើសិនជានៅក្នុងរបស់ Content (មាតិកា)ហ្នឹង គឺមិនអាចធ្វើបាននោះទេ ព្រោះអីចង់មិនចង់ គឺត្រូវប្រាប់ទៅហ្វេសបុកអីញ្ចឹង។ បើទោះបីជា Block តាមបច្ចេកទេសឥឡូវ គឺនៅតែបើកបានអញ្ចឹងឯង(សម្រាប់ទំព័រទាំងនោះ)»។
កាសែតភាសាអង់គ្លេសខេមបូឌា ដេលី ត្រូវបានបង្កើតឡើងដោយអ្នកកាសែតអាមេរិកជើងចាស់ លោក Bernard Krisher ក្នុងឆ្នាំ១៩៩៣ មុននឹងកាសែតនេះត្រូវបានលក់ទៅឲ្យអ្នកស្រី Deborah Krisher-Steele នៅក្នុងឆ្នាំ២០១៧។
អត្ថបទការសែតនេះ បានសរសេររិះគន់រដ្ឋាភិបាលជាច្រើនពាក់ព័ន្ធនឹងកិច្ចការនយោបាយ និងការគ្រប់គ្រងសង្គម ដែលយូរៗម្តងកាសែតមួយនេះ ត្រូវបានរដ្ឋាភិបាលប្រតិកម្មទៅនឹងអត្ថបទរបស់ខ្លួនផងដែរ រហូតដល់ថ្ងៃដែលប្រកាសបិទទ្វារនៅខែកញ្ញាឆ្នាំមុន៕