នាវាដឹកប្រេងមួយគ្រឿងផ្ទុកទៅដោយនាវិកជនជាតិឥណ្ឌា ២២នាក់ កំពុងបាត់ខ្លួននៅឆ្នេរភាគខាងលិចនៃទ្វីបអាហ្វ្រិក នៅក្នុងដែនទឹកដែលសម្បូរទៅដោយចោរសមុទ្រ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
AFP បានដកស្រង់សម្ដីក្រុមមន្ត្រីដែលបាននិយាយថា នាវាដឹកប្រេងឈ្មោះ MT Marine Express ដែលចុះបញ្ជីនៅប្រទេសប៉ាណាម៉ា និងផ្ទុកប្រេងដល់ទៅ ១៣ ៥០០តោននោះ បានចាកចេញពីកំពង់ផែបេនីន នៅទីក្រុងខូតូនូ មុននឹងបាត់ការទាក់ទងជាមួយអាជ្ញាធរកាលពីថ្ងៃព្រហស្បតិ៍សប្ដាហ៍មុន។
អ្នកនាំពាក្យក្រសួងការបរទេសឥណ្ឌា លោក រ៉ាវី កុមារ ត្រូវបានដកស្រង់សម្ដីដែលបាននិយាយថា ឥណ្ឌាបានរក្សាទំនាក់ទំនងជាមួយអាជ្ញាធរនៅទីក្រុងបេនីន និងអាជ្ញាធរប្រទេសនីហ្សេរីយ៉ា ដើម្បីជួយស្វែងរកទីតាំងនាវានោះ ព្រមទាំងតាមដានស្ថានភាពរបស់នាវាផងដែរ។
ក្រុមហ៊ុនដឹកជញ្ជូន Anglo-Eastern មានមូលដ្ឋាននៅទីក្រុងហុងកុង ដែលជាអ្នកគ្រប់គ្រងលើនាវានោះ បាននិយាយថា ក្រុមនាវិកនៃនាវានោះបានរក្សាទំនាក់ទំនងចុងក្រោយកាលពីថ្ងៃព្រហស្បតិ៍សប្ដាហ៍មុន។
សារព័ត៌មានឥណ្ឌាបានចុះផ្សាយថា នេះគឺជានាវាទីពីរដែលបានបាត់ខ្លួននៅតំបន់ឆ្នេរសមុទ្រភាគខាងលិចទ្វីបអាហ្វ្រិកកាលពីខែមុន។
កាសែតហិណ្ឌូស្ថាន ថែមស៍ បានរាយការណ៍ថា កាលពីខែមករា នាវា MT Barret បានបាត់ខ្លួនផងដែរ ប៉ុន្តែ នាវិកដែលភាគច្រើនជាជនជាតិឥណ្ឌានោះ ត្រូវបានដោះលែងមកវិញ ៦ថ្ងៃក្រោយមក បន្ទាប់ពីការបង់ប្រាក់តាមការចាប់ជំរិតនោះ។
នាវាជាច្រើន បានក្លាយទៅជាគោលដៅនៃការចាប់ជំរិតរបស់ក្រុមចោរនៅឈូងសមុទ្រហ្គីណេ ដែលវាធ្វើឲ្យរំខានដល់បណ្ដាញដឹកជញ្ជូនអន្តរជាតិ និងធ្វើឲ្យពិភពលោកខាតបង់ប្រាក់រាប់ពាន់លានដុល្លារ៕