តំណាងអ្នកភូមិជាង ១ពាន់គ្រួសារ មានជម្លោះដីធ្លីនៅស្រុកកណ្ដាលស្ទឹង ខេត្តកណ្ដាល បាននាំគ្នាទៅតវ៉ានៅសាលាស្រុកនៅព្រឹកថ្ងៃនេះ និងទាមទារទៅអាជ្ញាធរឲ្យជួយទប់ស្កាត់ក្រុមហ៊ុន ហេង អភិវឌ្ឍន៍ កុំឲ្យជួយឆាយលើដីកំពុងមានទំនាស់ជាង ២០០ហិកតា ដោយថា ក្រុមហ៊ុនមួយនេះនៅមិនទាន់ដោះស្រាយនៅឡើយ។
អ្នកស្រី អឿង សាវី ដែលអះអាងថាជាតំណាងប្រជាពលរដ្ឋជាង ១ពាន់គ្រួសារនៅឃុំព្រែកស្លែងនោះ បានឲ្យដឹងថា ក្រុមហ៊ុន ហេង អភិវឌ្ឍន៍របស់អ្នកស្រី សៀង ចាន់ហេង បានបញ្ជូនគ្រឿងចក្រទៅឈូសឆាយលើដីមានទំនាស់កាលពីថ្ងៃម្សិលមិញនេះ ខណៈដែលវិវាទដីធ្លីមួយនេះ នៅមិនទាន់មានដោះស្រាយនៅឡើយទេចាប់តាំងពីផ្ទុះជម្លោះតាំងពីឆ្នាំ២០០៥មក។
អ្នកស្រី៖ «រហូតមកដល់ពេលនេះ គាត់អត់រកដំណោះស្រាយជូនប្រជាពលរដ្ឋទេ និយាយទៅគាត់ធ្វើមិនដឹងមិនលឺ គាត់ចេះតែយកលេសនេះយកលេសនោះ គាត់ដោះស្រាយឲ្យប្រជាពលរដ្ឋ ហើយលូវបានក្រុមហ៊ុនវាចុះទៅកាយ។ លូវខ្ញុំមកសាលាស្រុក ខ្ញុំសួរព័ត៌មានថា តើក្រុមហ៊ុនចុះគេជូនដំណឹងសុំសាលាស្រុកអីយ៉ាងម៉េចៗ ព្រោះអីគេថា សាលាស្រុក និងឃុំជាអ្នកអនុញ្ញាតឲ្យគេចុះកាយ»។
តំណាងប្រជាពលរដ្ឋម្នាក់ទៀត លោក ញ៉ែម អឿន បានបង្ហាញមន្ទិលសង្ស័យថា អាជ្ញាធរអាចឃុបឃិតគ្នាយកដីរបស់ពលរដ្ឋទៅលក់ឲ្យក្រុមហ៊ុន បន្ទាប់ពីពួកគេពុំទទួលបានដំណោះស្រាយពីអាជ្ញាធរស្រុកកណ្ដាលស្ទឹងនោះ។
លោកថា៖ «ប្រជាជនគាត់អស់ជំនឿហើយ គាត់ឥឡូវហ្នឹង អាក្រុមហ៊ុនណាទៅចុះកាយលើដីហ្នឹង គឺគាត់ត្រូវតែកម្ទេចចោលហើយ ព្រោះថា វាអត់មានកិច្ចអន្តរាគមន៍។ ក្រុមហ៊ុនណាមកដោះស្រាយ ហើយអាជ្ញាធរក៏អត់ទៅជួយ។ គាត់ថា ដីនឹងពាក់ព័ន្ធៗតែខ្ញុំមិនដឹងពាក់ព័ន្ធអី បើខ្ញុំប្រជាជនរស់នៅហ្នឹងតាំងពីយូរហើយមកដល់ទល់សព្វថ្ងៃហ្នឹង ខ្ញុំអត់ដែលមានលក់ដីហ្នឹងអីមួយដុំផង ហើយគាត់ថា ពាក់ព័ន្ធនឹងក្រុមហ៊ុន ហើយអញ្ចឹងអ្នកណាជាអ្នកលក់ សួររកអ្នកលក់! ឲ្យយកឯកសារមកទូទាត់គ្នាក៏អត់ហ៊ានយក ហើយក្រុមហ៊ុនដែលទៅទិញ មិនដឹងទិញលើឈ្មោះណាក៏អត់មានទូទាត់គ្នា»។
អភិបាលរងស្រុកកណ្ដាលស្ទឹង លោក អ៊ួច សៅវឿន បានប្រាប់ថា លោកមិនទាន់បានដឹងព័ត៌មាននេះនៅឡើយទេ ហើយប្រាប់ឲ្យបង្វែរសំណួរទៅសួរក្រុមហ៊ុនវិញ។
លោកថា៖ «ទំនាស់នេះ បានផុតដៃអាជ្ញាធរស្រុកហើយ ស្រុកបានសម្របសម្រួលតែមិនត្រូវគ្នា ហើយខាងគាត់បានយកពាក្យបណ្ដឹងនេះទៅដាក់នៅស្ថាប័នពីរខាងលើហើយ ហើយការសម្រេចយ៉ាងណារបស់ស្ថាប័នខាងលើយើងអត់ដឹងទេ។ អត់ទាន់មានសេចក្ដីសម្រេចណាមួយទេ។ ក្នុងនាមយើងជាអាជ្ញាធរ យើងត្រូវតែដឹង ប៉ុន្តែ ការសម្រេចដឹកនាំប្រគល់សិទ្ធិឲ្យ។ ប៉ុន្តែ ជាទូទៅ មានការជូនដំណឹងហើយ បើសិនជាចង់ច្បាស់ទាក់ទងទៅខាងក្រុមហ៊ុនឲ្យគាត់បំភ្លឺមើល តើឯកសារអីមានពាក់ព័ន្ធខ្លះ»។
វីអូឌីនៅមិនទាន់អាចទាក់ទងក្រុមហ៊ុន ហេង អភិវឌ្ឍន៍ ដើម្បីឆ្លើយតបទៅនឹងការចោទប្រកាន់ពីអ្នកភូមិបាននៅឡើយទេជុំវិញវិវាទដីធ្លីនេះ។
ទោះជាយ៉ាងណា ក្រុមប្រជាពលរដ្ឋ អះអាងថា ប្រសិនបើក្រុមហ៊ុននៅតែយកគ្រឿងចក្រឈូសឆាយលើដីទំនាស់បន្តទៀត ពួកគេនឹងលើកគ្នាទៅដុតកម្ទេចគ្រឿងចក្រនោះ៕
